ປະເທດລາວມີຜູ້ເສຍຊີວິດຈາກພະຍາດໄຂ້ຍຸງລາຍ 22 ຄົນ

0
203



ອີງ​ຕາມ​ການ​ລາຍ​ງານ​ຂອງ​ສູນ​ວິ­ເຄາະ ແລະ ລະ­ບາດ​ວິ­ທະ­ຍາ ກະ­ຊວງ​ສາ­ທາ­ລະ­ນະ​ສຸກ ວັນ​ທີ 26 ມິ­ຖຸ­ນາ 2019 ໃຫ້​ຮູ້​ວ່າ: ນັບ​ແຕ່​ວັນ​ທີ 29 ທັນ­ວາ 2018-21 ມິ­ຖຸ­ນາ 2019 ພົບ​ຄົນ​ເຈັບ​ທີ່​ເປັນ­ໄຂ້​ຍຸງ​ລາຍ 7.922 ຄົນ ຜູ້​ເສຍ​ຊີ­ວິດ​ແລ້ວ 22 ຄົນ ໃນ​ນີ້ ແຂວງ​ຈຳ­ປາ​ສັກ ມີ​ຄົນ​ເຈັບ 2.133 ຄົນ ເສຍ​ຊີ­ວິດ 5 ຄົນ

ນະ­ຄອນ­ຫຼວງ​ວຽງ​ຈັນ 1.396 ຄົນ ເສຍ​ຊີ­ວິດ 6 ຄົນ ສະ­ຫວັນ​ນະ​ເຂດ 1.288 ຄົນ ເສຍ​ຊີ­ວິດ 6 ຄົນ ສາ­ລະ​ວັນ 819 ຄົນ ເສຍ​ຊີ­ວິດ 2 ຄົນ ຄຳ​ມ່ວນ 641 ຄົນ ເສຍ​ຊີ­ວິດ 2 ຄົນ ບໍ​ລິ​ຄຳ​ໄຊ 255 ຄົນ ເສຍ​ຊີ­ວິດ 1 ຄົນ ແລະ ແຂວງ​ອື່ນໆ​ທີ່​ມີ​ຄົນ​ເຈັບ ແຕ່​ບໍ່​ມີ​ກໍ­ລະ­ນີ​ເສຍ​ຊີ­ວິດ.

ປັດ­ຈຸ­ບັນ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ໄດ້​ມີ​ທິດ​ຊີ້​ນຳ​ໃນ​ການ​ຕອບ​ໂຕ້ ແລະ ຢຸດ­ຕິ​ການ­ລະ­ບາດ­ພະ­ຍາດ​ດັ່ງ­ກ່າວ ບໍ່​ໃຫ້​ມີ​ຄົນ​ເຈັບ ແລະ ເສຍ​ຊີ­ວິດ​ເພີ່ມ​ຂຶ້ນ ໃນ​ນີ້ ໄດ້​ມີ​ມາດ​ຕະ­ການ​ຫຼາຍ​ດ້ານ​ເພື່ອ​ຮັບ​ມື​ກັບ​ການ​ລະ­ບາດ ເຊິ່ງ​ໜຶ່ງ​ໃນ​ມາດ​ຕະ­ການ​ແມ່ນ​ສ້າງ​ຄວາມ​ເຂົ້າ­ໃຈ​ໃຫ້​ປະ­ຊາ­ຊົນ ກ່ຽວ​ກັບ​ພະ­ຍາດ​ໄຂ້­ຍຸງ​ລາຍ ປະ­ຊາ­ຊົນ​ຈະ​ຕ້ອງ​ເປັນ​ເຈົ້າ​ການ​ໃນ​ການ​ທຳ­ລາຍ ແຫຼ່ງ​ເພາະ​ພັນ​ຂອງ​ຍຸງ​ໃນ​ຄອບ­ຄົວ​ຂອງ​ຕົນ ເວ­ລາ​ເປັນ­ໄຂ້​ກໍ​ໃຫ້​ຮີບ​ຟ້າວ​ໄປ​ໂຮງ­ໝໍ ໂດຍ​ບໍ່​ໃຫ້​ຊື້​ຢາ​ມາ​ກິນ​ເອງ.

ໄຂ້­ເລືອດ­ອອກ​ພາ­ໃຫ້​ເສຍ​ຊີ­ວິດ ແຕ່​ສາ­ມາດ​ປ້ອງ​ກັນ​ໄດ້ ໂດຍ​ການ​ປະ­ຕິ­ບັດ 5ປ ຄື: ປິດ​ຝາ​ພາ­ຊະ­ນະ​ທີ່​ເກັບ​ນ້ຳ​ໃນ​ເຮືອນ ແລະ ນອກ​ເຮືອນ ເພື່ອ​ບໍ່​ໃຫ້​ຍຸງ​ມາ​ໄຂ່​ໃສ່ ປ່ຽນ​ນ້ຳ ແລະ ຜັດ​ຖູ​ພາ­ຊະ­ນະ ເຊັ່ນ: ເຕົ້າ​ດອກ​ໄມ້ ນ້ຳ​ຮອງ​ຕີນ​ຕູ້ ຖ້ານ​ຮອງ​ຈອກ​ນ້ຳ… ປ່ອຍ​ປາ​ຫາງ​ນົກ​ຍຸງ ເພື່ອ​ກິນ​ໜອນ​ນ້ຳ ປັບ­ປຸງ​ບໍ່​ໃຫ້​ມີ​ນ້ຳ​ຄ້າງ​ຂັນ ກະ­ໂປະ ກະ​ປ໋ອງ ຮາງ­ລິນ ຢ່າງ​ຕີນ­ລົດ​ເກົ່າ… ປະ­ຕິ­ບັດ​ເປັນ​ປະ­ຈຳ​ທຸກ​ອາ­ທິດ ແລະ ຖ້າ​ເປັນ­ໄຂ້ ໃຫ້​ໄປ​ປິ່ນ­ປົວ​ຢູ່​ໂຮງ­ໝໍ ສຸກ­ສາ­ລາ ໃກ້​ບ້ານ​ທ່ານ ຫຼື ໂທ​ສາຍ​ດ່ວນ​ໃຫ້­ການ​ຊ່ວຍ­ເຫຼືອ ເບີ​ໂທ: 166.

ຂອບໃຈຂໍ້ມູນຈາກ: ນສພ ວຽງຈັນໃຫ່ມ

LEAVE A REPLY

Please enter your comment!
Please enter your name here