ຂົວຂ້າມນໍ້າຮຸ່ງ ເມືອງໄຊຍະບູລີ ຄືບໜ້າ 30%

0
290



ຂົວຂ້າມນໍ້າຮຸ່ງ ເມືອງໄຊຍະບູລີ ສອງຈຸດ ຄື: ຈຸດບ້ານທ່ານາ – ບ້ານນາຍາວ ແລະ ບ້ານນາຕໍນ້ອຍ – ບ້ານນາຕໍໃຫຍ່ ແມ່ນໄດ້ເລີ່ມລົງມືກໍ່ສ້າງມາແຕ່ທ້າຍເດືອນທັນວາ ປີ 2018 ມາຮອດປັດຈຸບັນມີຄວາມຄືບໜ້າແລ້ວ ເກືອບ 30% ແລະ ຄາດວ່າທ້າຍປີ 2020 ຈະໄດ້ເປີດນຳໃຊ້ຢ່າງເປັນທາງການ, ທ່ານ ສົມບູນ ບຸນຈະເລີນ ຫົວໜ້າໂຄງການກໍ່ສ້າງຂົວຂ້າມນໍ້າຮຸ່ງ ບ້ານທ່ານາ ແລະ ບ້ານນາຕໍນ້ອຍ ໄດ້ເປີດເຜີຍຕໍ່ທີມຂ່າວແຂວງໄຊຍະບູລີ ໃນຕົ້ນເດືອນມິຖຸນາ ນີ້ວ່າ:

ໂຄງການກໍ່ສ້າງຂົວຂ້າມນໍ້າຮຸ່ງ ເມືອງໄຊຍະບູລີ ຈຸດບ້ານທ່ານາ ຫາ ບ້ານນາຍາວ ແລະ ບ້ານນາຕໍນ້ອຍ ຫາ ບ້ານນາຕໍໃຫຍ່ ແມ່ນໂຄງການບຸລິມະສິດໃນແຜນພັດທະນາຂະຫຍາຍຜັງເມືອງອອກໄປທາງທິດຕາເວັນອອກຂອງແຂວງໄຊຍະບູລີ ເພື່ອສາມາດເຮັດໃຫ້ການໄປ – ມາຫາສູ່ແລກປ່ຽນຄ້າຂາຍ ນັບທັງການໄປ – ມາຂອງລູກຫຼານນ້ອງນັກຮຽນມີ ຄວາມວ່ອງໄວ ແລະ ປອດໄພດີ.

ໂຄງການກໍ່ສ້າງຂົວນໍ້າຮຸ່ງ ບ້ານທ່ານາ ແລະ ບ້ານນາຕໍນ້ອຍ ເປັນຂົວປະສົມເຫຼັກ ແລະ ຄອນກຣີດ ພາກສ່ວນລຸ່ມເປັນເສົາຄອນກຣີດເສີມເຫຼັກ ພາກສ່ວນເທິງເປັນຂາງເຫຼັກ ແລະ ຢຶດດ້ວຍຄອນກຣີດ ສ່ວນໜ້າຂົວປູຢາງ 2 ຊັ້ນ ມີລວງກວ້າງ 10,5 ແມັດ, ມີ 2 ຊ່ອງຈະລາຈອນກວ້າງ ຊ່ອງລະ 3,75 ແມັດ, ມີທາງຄົນຍ່າງສອງເບື້ອງ ເບື້ອງລະ 1,5 ແມັດ, ລວງຍາວຂອງຂົວແຕ່ລະແຫ່ງ 103,4 ແມັດ ປະກອບມີ 3 ຊ່ວງ 2 ເສົາກາງນໍ້າ ແລະ 2 ເສົາຂອກ, ຂົວແຫ່ງນີ້ສາມາດຮັບນໍ້າໜັກໄດ້ 50 ໂຕນ,

ເຈົ້າຂອງໂຄງການແມ່ນກົມຂົວທາງກະຊວງໂຍທາທິການ ແລະ ຂົນສົ່ງ, ພະແນກໂຍທາແຂວງ ເປັນວິສະວະກອນປະຈຳສະໜາມ, ບໍລິສັດ ຮັບເໝົາຫຼັກແມ່ນ ບໍລິສັດ MCE ຈາກປະເທດໂອຕຣິດ ບໍລິສັດ ຮັບເໝົາຊ່ວງຕໍ່ແມ່ນລັດວິສາຫະກິດກໍ່ສ້າງຄົມມະນາຄົມ ( secc ) ມູນຄ່າການກໍ່ສ້າງຂົວທັງສອງແຫ່ງທັງໝົດ 6.100.000 ເອີໂຣ ໂດຍແມ່ນທຶນລັດຖະບານ ສປປ ລາວ ກູ້ຢືມບໍ່ມີດອກເບ້ຍຈາກລັດຖະບານໂອຕຣິດ ຜ່ານທະນາຄານຢູ່ ເນເຄຼຍດິດ ຂອງໂອຕຣິດ ສັງລວມແລ້ວຂົວຂ້າມນໍ້າຮຸ່ງທັງສອງຈຸດແມ່ນມີຂະໜາດເທົ່າກັນ ໃຊ້ທຶນແຫຼ່ງດຽວກັນ ແລະ ຈະໃຫ້ສຳເລັດນຳໃຊ້ເປັນທາງການໃນວັນດຽວກັນ.

LEAVE A REPLY

Please enter your comment!
Please enter your name here