ຜ່ອນລົດຈັກ 12 ຄັນແລ້ວເອົາໄປຂາຍຕໍ່ ຖືກຈັບດໍາເນີນຄະດີຂໍ້ຫາສໍ້ໂກງຊັບ (ຄລິບ)

0
176



ນາງ ສົມພາວັນ ອາຍຸ 24 ປີ ປະຊາຊົນ ບ້ານຖິ່ນ ເມືອງໄຊຍະບູລີ ແຂວງໄຊຍະບູລີ ປັດຈຸບັນພັກເຊົາຢູ່ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ຖືກເຈົ້າໜ້າທີ່ກັກຕົວມາດໍາເນີນຄະດີ ຂໍ້ຫາສໍ້ໂກງຊັບພົນລະເມືອງ ໃນວັນທີ 4 ມີນາ 2019. ພາຍຫຼັງບໍລິສັດຈາກາ 2006 ເຊົ່າສິນເຊື່ອ ນໍາຕົວຜູ່ກ່ຽວມາມອບໃຫ້ເຈົ້າໜ້າທີ່ ຍ້ອນຜ່ອນລົດຈັກແລ້ວບໍ່ປະຕິບັດຕາມສັນຍາ.


ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ເມືອງໄຊທານີ ຜູ່ກ່ຽວຮັບສາລະພາບວ່າ: ຖິ່ນຖານກໍາເນີດເປັນຄົນຕ່າງແຂວງ ແລະ ໄດ້ເຂົ້າມາອາໄສນໍາແມ່ ຢູ່ບ້ານດ່ານຊ້າງ ເມືອງໄຊທານີ ນວ ໄດ້ 3 ປີແລ້ວ, ແຕ່ຕົນເອງບໍ່ມີບັດປະຈໍາຕົວ ຫຼື ສໍາມະໂມຄົວ ທີ່ຂຶ້ນກັບນະຄອນຫຼວງວຽງຈັນ ຈຶ່ງບໍ່ສາມາດຜ່ອນລົດຈັກໄດ້ ເລີຍໄປຫາພີ່ນ້ອງຢູ່ບ້ານ ຮ່ອງແຊງ ເມືອງຈັນທະບູລີ ໃຫ້ເປັນຜູ່ຄໍ້າປະກັນອອກຊື່ໃນການຜ່ອນລົດແທນໃຫ້ຕົນ. ສ່ວນການຈ່າຍເງິນຄ່າງວດຕ່າງໆໃຫ້ບໍລິສັດ ແມ່ນຕົນເອງເປັນຄົນຮັບຜິດຊອບ. ທໍາອິດບໍລິສັດເອົາເງິນຄ່າຄໍ້າປະກັນນໍາຕົນກ່ອນ ຈໍານວນ 15% ຕົກເປັນເງິນ 1 ລ້ານກວ່າກີບ. ຈາກນັ້ນ, ກໍຈ່າຍຜ່ອນເດືອນລະ 5 ແສນກວ່າກີບ ຈົນຄົບຕາມຈໍານວນທີ່ໄດ້ຕົກລົງກັນ, ແຕ່ຕົນເອງຈ່າຍເງິນໃຫ້ບໍລິສັດພຽງແຕ່ງວດດຽວ ແລ້ວກໍເອົາລົດໄປຕິດຕໍ່ຂາຍທາງເຟສບຸກ ໄດ້ເງິນ 5 ລ້ານກີບ.


ນາງ ສົມພາວັນ ຍັງຮັບສາລະພາບອີກວ່າ: ຜ່ານມາເຄີຍເຮັດແບບນີ້ມາແລ້ວກັບ 7 ບໍລິສັດ ໂດຍໃຫ້ພີ່ນ້ອງ ແລະ ຄົນທີ່ຮູ້ຈັກຮັກແພງກັນອອກຊື່ໃນການຜ່ອນລົດຈັກແທນໃຫ້; ເຊິ່ງໄດ້ຜ່ອນລົດຈັກລວມທັງໝົດຈໍານວນ 12 ຄັນ, ແລ້ວກໍເອົາໄປຂາຍຕໍ່; ໄດ້ເງິນຄັນລະ 5 ລ້ານກີບ ແລະ ເງິນທີ່ໄດ້ແມ່ນເອົາໄປໃຊ້ຈ່າຍທ່ຽວຫຼີ້ນຈົນໝົດ.

ປັດຈຸບັນ ຄະດີດັ່ງກ່າວ ເຈົ້າໜ້າທີ່ໄດ້ສົ່ງສໍານວນຄະດີໃຫ້ອົງການໄອຍະການປະຊາຊົນ ເພື່ອສັ່ງຟ້ອງຫາສານຕັດສິນຕາມລະບຽບກົດໝາຍຕໍ່ໄປ; ສ່ວນຂອງກາງຄະດີເຈົ້າໜ້າທີ່ຈະໄດ້ເລັ່ງຕິດຕາມເກັບກູ້ຄືນ.


ຂ່າວ: ບ່າວເມືອງເໜືອ

ຂອບໃຈຂໍ້ມູນຈາກ: ປກສ ນວ

LEAVE A REPLY

Please enter your comment!
Please enter your name here