ແຂວງຄຳມ່ວນມ້າງຄະດີຢາເສບຕິດລາຍໃຫຍ່ ພ້ອມຂອງກາງຢາໄອສ໌ 599 ກິໂລກຼາມ (ມີຄລິບ)

0
560


ເດືອນຜ່ານມານີ້ ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄໍາມ່ວນຮ່ວມກັບ ກອງບັນຊາການ ປກສ ເມືອງຫີນບູນ ສາມາດສະກັດຈັບຜູ້ຖືກຫາຄ້າຂາຍຢາໄອສ໌ ໄດ້ 3 ຄົນພ້ອມຂອງກາງຢາໄອສ໌ 599 ກິໂລກຼາມ ຢູ່ເສັ້ນທາງ 13 ໃຕ້ ຜູ້ຖືກຫາ ຊື່ ທ້າວ ລອດ ອາຍຸ 35 ປີ, ທ້າວ ແປະ ອາຍຸ 31 ປີ ທັງສອງຄົນ ຢູ່ບ້ານນາໂຄ ເມືອງສອງຄອນ ແຂວງສະຫວັນນະເຂດ ແລະ ທ້າວ ໄພລີ ອາຍຸ 35 ປີ ຢູ່ບ້ານ ນາວາງທົ່ງ ເມືອງ ໜອງບົກ ແຂວງຄຳມ່ວນ.

ຄະດີຢາເສບຕິດດັ່ງກ່າວນີ້, ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄໍາມ່ວນ ໃຫ້ຮູ້ວ່າ: ໃນວັນທີ 4 ມີນາ 2019 ໄດ້ຮັບລາຍງານຈາກແຫຼ່ງຂ່າວວ່າ: ຈະມີການລັກລອບຂົນຢາເສບຕິດຈໍານວນຫຼາຍ, ແຕ່ນະຄອນ ຫຼວງວຽງຈັນ ຜ່ານແຂວງຄໍາມ່ວນ ຈຶ່ງໄດ້ຂຶ້ນແຜນຕິດຕາມ ມ້າງລາຍຄະດີດັ່ງກ່າວ, ຜ່ານການຕິດຕາມພົບລົດເປົ້າໝາຍສົງໃສ ເປັນລົດກະບະ ມັດສະດ້າ ຈໍານວນ 3 ຄັນ ແລະ ລົດກະບະວີໂກ້ ສີປອນເງິນ ບໍມີປ້າຍທະບຽນ 1 ຄັນ.

ຈາກນັ້ນ, ຈຶ່ງປະສານກັບຕໍາຫຼວດຈະລາຈອນ ປກສ ເມືອງຫີນບູນ ລົງຕັ້ງດ່ານກວດກາຢູ່ເສັ້ນທາງ 13 ໃຕ້ ເພື່ອສະກັດກວດຄົ້ນລົດຈຳນວນດັ່ງກ່າວ ແຕ່ຜູ້ຂັບຂີ່ລົດທັງ 4 ຄັນ ບໍ່ຍອມຈອດ ແລ້ວໄດ້ລ້ຽວລົດກັບທາງເກົ່າ. ຈຶ່ງໄດ້ຂັບລົດໄລ່ຕິດຕາມ ໄປໄດ້ປະມານ 2 ກິໂລແມັດ ຈຶ່ງໄດ້ພົບເຫັນລົດກະບະມັດສະດາ ຈຳນວນ 3 ຄັນ ຈອດປະໄວ້ຢູ່ໃນປ່າ ທາງເຂົ້າ ບ້ານນາໂພ ເມືອງຫີນບູນ ສ່ວນຜູ້ຂັບຂີ່ລົດໄດ້ຫຼົບໜີໄປພ້ອມລົດກະບະວິໂກ້.

ຜ່ານການກວດຄົ້ນລົດກະບະຈຳນວນ 3 ຄັນ ກໍ່ພົບເຫັນຢາເສບຕິດ ປະເພດ ຢາໄອສ໌ ຈຳນວນ 24 ເປົາ ມີນໍ້າໜັກ 599 ກິໂລກຼາມ. ໃນນັ້ນ, ຢູ່ລົດກະບະ ມັດສະດໍາ ສີດໍາ ປ້າຍທະບຽນ ກຜ 5454 ສະຫວັນນະເຂດ ມີ ຢາໄອສ໌ ຈໍານວນ 12 ເປົາ, ລົດກະບະຍີ່ຫໍ້ ມັດສະຕາ ສີເທົ່າ ປ້າຍທະບຽນ ກມ 9199 ສະຫັວນນະເຂດ ມີຢາໄອສ໌ ຈໍານວນ 12 ເປົາ ແລະ ລົດກະບະມັດສະດ້າ ສີດໍາ ປ້າຍທະບຽນ ກກ 2468 ສາລະວັນ ພົບເຫັນ ໃບຢັ້ງຢືນການນໍາໃຊ້ ອາວຸດ 1 ໃບ ປະເພດປືນສັ້ນ ພ້ອມລູກກະສູນ 15 ລູກ ຜ່ານການກວດກາເອກະສານລົດທັງສາມຄັນ ຈຶ່ງຮູ້ວ່າ : ເຈົ້າຂອງລົດຊື່ ທ້າວ ລອດ, ທ້າວ ເເປະ ແລະ ທ້າວ ໄພລີ. ມື້ຕໍ່ມາ ທາງເຈົ້າໜ້າທີ່ກໍ່ສາມາດຕິດຕາມກັກຕົວພວກກ່ຽວໄດ້.

ຜ່ານການສອບສວນ ພວກກ່ຽວສາລະພາບວ່າ: ຢາໄອສ໌ ຈໍານວນດັ່ງກ່າວ ໄດ້ຊື້ມາຈາກຄົນຮູ້ຈັກຢູ່ນະຄອນຫຼວງວຽງຈັນ ເພື່ອຈະເອົາໄປສົ່ງໃຫ້ຜູ້ສັ່ງຊື້ ຢູ່ແຂວງສາລະວັນ ແຕ່ພໍເດີນທາງໄປຮອດດ່ານກວດກາ ເຂດບ້ານຈຸດໜຶ່ງ ເມືອງຫີນບູນ ຈຶ່ງພົບເຫັນ ຕໍາຫຼວດຈະລາຈອນລັດກວດກາ ຈຶ່ງພາກັນຂັບລົດຫຼົບໜີ ແລະ ຈອດລົດຖີ້ມປະໄວ້ແຄມທາງ ເຂດ ບ້ານນາໂພ ເມືອງຫີນບູນ ແລ້ວໄປຂັບຂີ່ລົດກະບະວີໂກ້ ໃນເວລາຕໍ່ມາຈຶ່ງຖືກເຈົ້າໜ້າທີ່ ຕິດຕາມຈັບທັນ. ສ່ວນຜູ້ຂັບຂີ່ລົດກະບະວີໂກ້ ໄດ້ຫຼົບໜີໄປຄົນລະທາງ.

ຄະດີດັ່ງກ່າວ, ເຈົ້າໜ້າທີ່ພວມສືບຕໍ່ດໍາເນີນການສອບສວນຂະຫຍາຍຜົນ ເພື່ອຕິດຕາມຜູ້ຖືກຊັດທອດ ແລະ ຜູ້ຂັບລົດວີໂກ້ທີ່ຫຼົບໜີໄປມາດໍາເນີນຄະດີຕາມກົດໝາຍ.
ຂ່າວ: ແກ້ວດວງສອນ

ຂໍ້ມູນຈາກ: ນສພ ເສດຖະກິດ-ການຄ້າ



LEAVE A REPLY

Please enter your comment!
Please enter your name here