ລັດຖະບານ ຈະສ້າງດຳລັດເພື່ອດຶງດູດເອົາຄົນເຊື້ອຊາດລາວ, ໃນຕ່າງປະເທດກັບຄືນລາວ ເພີ່ມຂຶ້ນ

0
508



ທ່ານ ແສງເພັດ ຮູງບຸນຍວງ ຮອງລັດຖະມົນຕີກະຊວງການຕ່າງປະເທດ ຖະແຫລງຢືນຢັນວ່າ ແຜນການສຳຄັນທີ່ກະຊວງການຕ່າງປະເທດກຳລັງກະກຽມຢູ່ໃນປັດຈຸບັນນີ້ ດ້ວຍເປົ້າໝາຍທີ່ຈະສົ່ງເສີມ ແລະ ອຳນວຍຄວາມສະດວກສຳລັບຄົນເຊື້ອຊາດລາວໃນຕ່າງປະເທດ ທີ່ຕ້ອງການຈະເດີນທາງມາລາວ ທັງທີ່ເປັນການຊົ່ວຄາວ ແລະ ເປັນການຖາວອນ ໃນໄລຍະຕໍ່ໄປນີ້ ກໍຄືການຍົກລະດັບປະກາດແຈ້ງການຂອງລັດຖະບານໃຫ້ຂຶ້ນເປັນດໍາລັດຂອງປະທານປະເທດ ຊຶ່ງຈະເຮັດໃຫ້ຄົນເຊື້ອຊາດລາວ ໃນຕ່າງປະເທດໝັ້ນໃຈໄດ້ວ່າ ລັດຖະບານໃຫ້ຄວາມສຳຄັນຢ່າງຍິ່ງ ຕໍ່ການເດີນທາງກັບຄືນມາລາວ ຂອງພວກເຂົາເຈົ້າ ທີ່ຕ້ອງການຈະປະກອບສ່ວນເຂົ້າໃນການພັດທະນາປະເທດຊາດລາວ ໂດຍທ່ານກ່າວວ່າ:

“ໃນປັດຈຸບັນ ທາງກະຊວງການຕ່າງປະເທດກຳລັງຄົ້ນຄວ້າຮ່າງດຳລັດ ວ່າດ້ວຍການຮັບ ແລະ ອຳນວຍຄວາມສະດວກດ້ານວີຊ່າ ໃຫ້ແກ່ຄົນເຊື້ອຊາດລາວເຮົາ ຢູ່ຕ່າງປະເທດ ຊຶ່ງໃນປັດຈຄບັນນີ້ ພວກເຮົາປະຕິບັດພຽງແຕ່ເປັນລັກສະນະແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ແຕ່ໃນຂັ້ນຕໍ່ໄປ ພວກເຮົາຢາກສ້າງເປັນດຳລັດ ຈະມີຄວາມໜັກແໜ້ນຂຶ້ນ. ອີກຢ່າງໜຶ່ງພວກເຮົາກໍຈະໄດ້ສົມທົບກັບບັນດາຂະແໜງການທີ່ກ່ຽວຂ້ອງ ພິຈາລະນານິຕິກຳ ຈຳນວນໜຶ່ງຕື່ມ ເພື່ອອຳນວຍຄວາມສະດວກ ໃຫ້ແກ່ພີ່ນ້ອງເຊື້ອຊາດລາວ ຂອງພວກເຮົາຢູ່ຕ່າງປະເທດ ໄດ້ອ່ວຍໜ້າກັບມາຫາປະເທດຂອງພວກເຮົາ.”

ທາງດ້ານເຈົ້າໜ້າທີ່ຂັ້ນສູງໃນສູນກາງແນວລາວສ້າງຊາດຢືນຢັນວ່າ ສູນກາງແນວລາວສ້າງຊາດໄດ້ຮັບມອບໝາຍຈາກສູນກາງພັກປະຊາຊົນປະຕິວັດລາວໃຫ້ຮັບຜິດຊອບໃນການດຳເນີນງານເພື່ອສົ່ງເສີມ ແລະ ອຳນວຍຄວາມສະດວກໃຫ້ແກ່ບັນດາຄົນເຊື້ອຊາດລາວ ໃນຕ່າງປະເທດ ທີ່ຕ້ອງການຈະເດີນທາງກັບຄືນມາຢ້ຽມຢາມ ແລະ ລົງທຶນດຳເນີນທຸລະກິດ ຢູ່ໃນລາວໃຫ້ຫຼາຍຂຶ້ນ ເພາະເຊື່ອວ່າຄົນເຊື້ອຊາດລາວໃນຕ່າງປະເທດ ຈະປະກອບສ່ວນຢ່າງສຳຄັນເຂົ້າໃນການພັດທະນາເສດຖະກິດລາວ ໃຫ້ຈະເລີນກ້າວໜ້າໃນອະນາຄົດນັ້ນເອງ.

ທັງນີ້ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໃນຖານະປະທານ ຄະນະຮັບຜິດຊອບໃນການຈັດຕັ້ງປະຕິບັດດັ່ງກ່າວ ກໍໄດ້ໃຫ້ການຕ້ອນຮັບ ແລະ ພົບປະກັບບັນດາຜູ້ຕາງໜ້າຂອງຄົນເຊື້ອຊາດລາວ ຈາກຕ່າງປະເທດ ມາແລ້ວຫຼາຍຄັ້ງ ເຊັ່ນຄະນະຄົນເຊື້ອຊາດລາວຈາກລັດ Queensland ປະເທດອອສເຕຣເລຍ ທີ່ໄດ້ເດີນທາງມາຢ້ຽມຢາມ ແລະ ຈັດກິດຈະກຳແຂ່ງຂັນກິລາຕີກັອຟ ເພື່ອມິດຕະພາບ ຢູ່ນະຄອນວຽງຈັນ ແລະ ຫລວງພະບາງເມື່ອປີ 2018 ຊຶ່ງກໍປາກົດວ່າ ຄະນະຜູ້ຕາງໜ້າຂອງຄົນເຊື້ອຊາດລາວດັ່ງກ່າວ ກໍໄດ້ສະແດງຄວາມຕ້ອງການ ທີ່ຈະໄດ້ຮັບການສະໜັບສະໜຸນ ແລະ ການຕອບສະໜອງຈາກລັດຖະບານລາວ ຊຶ່ງລວມເຖິງການໄດ້ຮັບສິດໃນການຖືຄອງຊັບສິນຢູ່ທີ່ລາວ ເຊັ່ນທີ່ດິນ ເຮືອນ ແລະ ສິດທີ່ຈະພັກອາໄສຢູ່ໃນລາວ ຢ່າງຖາວອນ ຫຼື Permanent Resident (PR) ເປັນຕົ້ນ. ທັງນີ້ໂດຍໃນໂອກາດກອງປະຊຸມສາມັນຄົບຄະນະຂອງສູນກາງແນວລາວສ້າງຊາດ ຄັ້ງທີ 4 ສະໄໝທີ 10 ເມື່ອກາງເດືອນມີນາ 2019 ນີ້ ກອງປະຊຸມດັ່ງກ່າວ ກໍໄດ້ກຳນົດໃຫ້ການພົວພັນ-ຮ່ວມມືກັບຄົນເຊື້ອຊາດລາວໃນຕ່າງປະເທດ ເປັນວຽກງານໜຶ່ງ ທີ່ຈະຊຸກຍູ້ໃຫ້ມີການຂະຫຍາຍຕົວຢ່າງກວ້າງຂວາງດ້ວຍການສົ່ງຜູ້ຕາງໜ້າຂອງແນວລາວສ້າງຊາດໄປປະຈຳຢູ່ສະຖານທູດ ແລະ ສະຖານກົງສຸນລາວ ໃນຕ່າງປະເທດ.

ສ່ວນກົດໝາຍວ່າດ້ວຍສັນຊາດລາວທີ່ດັດແກ້ ແລະ ປະກາດໃຊ້ນັບແຕ່ວັນທີ 11 ທັນວາ 2017 ເປັນຕົ້ນມາ ກໍໄດ້ກຳນົດເງື່ອນໄຂ ອຳນວຍຄວາມສະດວກໃຫ້ກັບຄົນເຊື້ອຊາດລາວ ທີ່ຢາກຈະໄດ້ສັນຊາດລາວ ເປັນກໍລະນີພິເສດ ເຊັ່ນ ການເປັນພົນລະເມືອງກິດຕິມະສັກ ສຳລັບຜູ້ທີ່ບໍ່ຢາກສະຫຼະສັນຊາດຕ່າງປະເທດແຕ່ຕ້ອງເປັນຜູ້ທີ່ມີຜົນງານດີເດັ່ນທີ່ປະກອບສ່ວນເຂົ້າໃນການພັດທະນາ ແລະ ເປັນນັກທຸລະກິດດີເດັ່ນທີ່ສັງຄົມລາວຍອມຮັບ ແລະ ເພື່ອໃຫ້ວ່ອງໄວໃນການປະຕິບັດຕົວຈິງ ກໍໄດ້ໂອນອຳນາດການພິຈາລະນາໃຫ້ສັນຊາດລາວ ຈາກຄະນະປະຈຳສະພາແຫ່ງຊາດມາເປັນຄວາມຮັບຜິດຊອບຂອງລັດຖະບານລາວ ອີກດ້ວຍ

cr: Support Prime Minister Thongloun Sisoulith

LEAVE A REPLY

Please enter your comment!
Please enter your name here