ເມືອງໄຊພູທອງ ມອບເຄື່ອງໃຫ້ປະຊາຊົນ, ທີ່ຖືກເຄາະຮ້າຍຈາກໄຟໄໝ້ເຮືອນ

0
446


ໃນວັນທີ 24 ເມສາ 2019 ນີ້, ທ່ານ ນາງ ທອງໃບ ສອນວິໄລ ຫົວໜ້າ ຫ້ອງການ ແຮງງານ-ສະຫວັດດີການສັງຄົມເມືອງ ໄຊພູທອງ ໄດ້ລົງມອບເຄື່ອງໃຫ້ຜູ້ປະສົບເຄາະຮ້າຍໄຟໄໝ້ເຮືອນປະຊາຊົນຢູ່ບ້ານເວີນຄູນ ທີ່ຂື້ນກັບກຸ່ມບ້ານທີ 8 ເມືອງໄຊພູທອງ ແຂວງສະຫວັນນະເຂດ ທີ່ຖືກໄຟໄໝ້ໃນຄັ້ງວັນທີ 22 ເມສາ 2019 ຜ່ານມານີ້, ຈຳນວນ 1 ຫຼັງຖືກໄຟໄໝ້ຈົນໝົດ ເຄາະດີບໍມີໃຜໄດ້ຮັບບາດເຈັບ ຫຼື ເສຍຊີວິດ ແຕ່ສ້າງຄວາມເສຍຫາຍລວມແລ້ວ 14 ລ້ານກວ່າກີບ.


ສໍາລັບເຄື່ອງທີ່ນໍາມາມອບໃນຄັ້ງນີ້ ແມ່ນເຄື່ອງໃຊ້ທີ່ຈໍາເປັນເຊັ່ນ: ເຄື່ອງອຸປະໂພກ,ບໍລີໂພກ ລວມມູນຄ່າ 1.480.000 ກີບ,ໂດຍໃຫ້ກຽດມອບຂອງ ທ່ານ ນາງ ທອງໃບ ສອນວິໄລ ຫົວໜ້າຫ້ອງການແຮງງານ-ສະຫວັດດີການສັງຄົມເມືອງ ແລະ ກ່າວຮັບໂດຍພໍ່ເຖົ້າ ສີ ອິນທະປັນຍາ ເຈົ້າຂອງເຮືອນທີ່ຖືກໄຟໄໝ້ ໂດຍການຊ້ອງໜ້າອໍານາດການປົກຄອງບ້ານ

ພ້ອມດຽວກັນນັ້ນກໍ່ໄດ້ເຮັດບົດບັນທຶກມອບ-ຮັບເງິນໃຫ້ແກ່ຄອບຄົວຜູ້ຖືກເຄາະຮ້າຍໄຟໄໝ້ເຮືອນ ພໍ່ເຖົ້າສີ ອິນທະປັນຍາ ປະຊາຊົນບ້ານເວີນຄູນ ຈໍານວນເງິນ 500,000 ກີບ,ຈາກນັ້ນ ທ່ານ ນາງ ທອງໃບ ສອນວິໄລ ພ້ອມຄະນະ ກໍ່ໄດ້ລົງໄປມອບເງິນສົງເຄາະໃຫ້ຄອບຄົວຜູ້ຖືກຜົນກະທົບຈາກລົມພາຍຸພັດໃຫ້ແກ່ຄອບຄົວ ທ້າວ ຄໍາ ໄຊຍະແສງ ປະຊາຊົນ ບ້ານເຮືອນຫີນ ຈໍານວນເງິນ 300,000 ກີບ.

ພາບ-ຂ່າວ ພັນທະມິດ ວົງສຸທິ



LEAVE A REPLY

Please enter your comment!
Please enter your name here