ຫຼາຍບ້ານໃນແຂວງສາລະວັນ ໄດ້ຮັບຜົນກະທົບຢ່າງໜັກຈາກລົມພາຍຸລະດູຮ້ອນ

0
404


ປະຊາຊົນບ້ານນາໄຊໃຫຍ່ ເມືອງ ແລະ ແຂວງສາລະວັນ ແຕກຕື່ນກັບເຫດການພາຍຸພັດເຂົ້າບ້ານໃນວັນທີ 21 ເມສານີ້ ເວລາ 15:30 ນາທີ ເຮັດໃຫ້ເຮືອນຂອງພໍ່ແມ່ປະຊາຊົນພາຍໃນບ້ານເສຍຫາຍຢ່າງໜັກໜ່ວງ ແລະ ເປັນຄັ້ງທີ 2 ໃນຮອບ 10 ປີ ຄາດຄະເນມູນຄ່າເສຍຫາຍເບື້ອງຕົ້ນ 280 ລ້ານກີບ, ນອກຈາກຈະມີລົມພາຍຸພັດແຮງແລ້ວ ຍັງມີໝາກເຫັບຂະໜາດໃຫຍ່ຕົກໃສ່ເຮືອນຂອງປະຊາຊົນ.


ທ່ານ ອັອກເອ ແກ້ວສົມພູ ນາຍບ້ານນາໄຊໃຫຍ່ ໄດ້ເປີດເຜີຍຂໍ້ມູນໃຫ້ຮູ້ວ່າ: ເວລາ 15:30 ໂມງ ໃນວັນທີ 21 ເມສານີ້ ໄດ້ເກີດມີລົມພາຍຸລະດູຮ້ອນພັດເຂົ້າບ້ານຢ່າງແຮງ ເຮັດໃຫ້ເຮືອນຊານບ້ານຊ່ອງຂອງພໍ່ແມ່ປະຊາຊົນເສຍຫາຍຫຼາຍຫຼັງຄາເຮືອນ. ໃນນັ້ນ, ເສຍຫາຍໜັກ 12 ຫຼັງຄາເຮືອນ, ເຮືອນຊັ້ນເຄິ່ງ 4 ຫຼັງ, ເຮືອນວິລລາ 2 ຫຼັງ ແລະ ເຮືອນໄມ້ 6 ຫຼັງ ສ່ວນໃຫຍ່ເສຍຫາຍແມ່ນປະເພດຫຼັງຄາເຮືອນ ແລະ ໂຄງຫຼັງຄາເຮືອນ ເຊັ່ນ: ກະເບື້ອງ, ສັງກະສີ ແລະ ເສົາໄຟຟ້າຫັກ, ສາຍໄຟຂາດ, ເລົ້າເຂົ້າເສຍຫາຍເລັກໜ້ອຍ.


ເຫດການຄັ້ງນີ້ເປັນຄັ້ງທີ່ຮ້າຍແຮງທີ່ສຸດ ໂຊກດີພໍ່ແມ່ປະຊາຊົນຫຼົບໜີທັນບໍ່ມີໃຜໄດ້ຮັບບາດເຈັບ ຫຼື ເສຍຊີວິດ ເນື່ອງຈາກວ່າເຫດການເກີດຂຶ້ນຕອນກາງເວັນ. ສຳລັບປະຊາຊົນທີ່ໄດ້ຮັບຜົນກະທົບ ມີ 84 ຄົນ ຍິງ 45 ຄົນ, ຄາດຄະເນມູນຄ່າເສຍຫາຍ 280 ລ້ານກີບ.
ປັດຈຸບັນອຳນາດການປົກຄອງບ້ານໄດ້ລະດົມກຳລັງຊາວໜຸ່ມ ແລະ ປະຊາຊົນໃນບ້ານຊ່ວຍເຫຼືອເຊິ່ງກັນ ແລະ ກັນ. ພ້ອມນັ້ນ, ອຳນາດການປົກຄອງເມືອງກໍໄດ້ລົງຕິດຕາມ ແລະ ເກັບກຳຂໍ້ມູນເພື່ອໃຫ້ການຊ່ວຍເຫຼືອຕື່ມອີກ.


ເຊັ່ນດຽວກັນເມືອງຕຸ້ມລານ ກໍໄດ້ຮັບຜົນກະທົບຈາກລົມພາຍຸລະດູຮ້ອນປະຊາຊົນ 10 ບ້ານ ກໍໄດ້ຮັບຜົນກະທົບຢ່າງໜັກໜ່ວງເຊັ່ນກັນ. ນອກນັ້ນ, ຍັງມີເມືອງຄົງເຊໂດນ ກໍມີຫຼາຍບ້ານທີ່ໄດ້ຮັບຜົນກະທົບ ປັດຈຸບັນອຳນາດການປົກຄອງເມືອງ, ບ້ານ ແລະ ຂະແໜງການທີ່ກ່ຽວຂ້ອງກໍໄດ້ລົງສົມທົບເກັບກຳຂໍ້ມູນຕົວຈິງ, ລົງໃກ້ຊິດໃຫ້ກຳລັງໃຈ, ໃຫ້ການຊ່ວຍເຫຼືອເບື້ອງຕົນ ແລະ ປະເມີນຄ່າເສຍຫາຍຕື່ມອີກ.
( ໂດຍ: ວິໄລວອນ ສິດທິໄຊ )



LEAVE A REPLY

Please enter your comment!
Please enter your name here