ທະຫານເມືອງໄຊ ປະກາດການແຕ່ງຕັ້ງຫົວໜ້າການທະຫານຄົນໃໝ່

0
485



ພິທີປະກາດການຈັດຕັ້ງພະນັກງານນຳພາບັນຊາ, ພະນັກງານພັກຜ່ອນລໍຖ້າເຂົ້າບຳນານຢູ່ກອງບັນຊາການທະຫານເມືອງໄຊ ແຂວງອຸດົມໄຊ ໄດ້ຈັດຂື້ນໃນຕອນເຊົ້າຂອງວັນທີ່ 23 ເມສາ 2019 ນີ ຢູ່ທີ່ສະໂມສອນກົມກອງດັ່ງກ່າວ, ໂດຍພາຍໃຕ້ການເປັນປະທານຂອງ ທ່ານ ພັນເອກ ຄຳຍີນ ແສງສຸລີ ຮອງເລາຂາພັກ ຫົວໜ້າການເມືອງກອງບັນຊາການທະຫານແຂວງອຸດົມໄຊ, ເປັນກຽດເຂົ້າຮ່ວມໂດຍມີ ທ່ານ ວາລີ ຈືນໍເຢັງ ຮອງເລຂາພັກເມືອງ ປະທານກວດກາພັກ-ລັດເມືອງໄຊ, ພັນໂທ ສົມເພັດ ສຸລິວັນ ຄະນະປະຈຳພັກເມືອງ ຫົວໜ້າການເມືອງກອງບັນຊາການທະຫານເມືອງໄຊ, ມີຄະນະພັກ-ຄະນະບັນຊາກົມກອງ, ພະແນກການກ່ຽວຂ້ອງເມືອງ, ກອງບັນຊາການທະຫານແຂວງ ແລະ ພະນັກງານ-ນັກຮົບພາຍໃນເຂົ້າຮ່ວມ.


ໃນພິທີ ພັນໂທ ຄຳປານ ອີນທຳມະລັດ ຮອງຫົວໜ້າຫ້ອງການເມືອງກອງບັນຊາການທະຫານແຂວງອຸດົມໄຊ ໄດ້ຂື້ນຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນປະເທດ ວ່າດ້ວຍການແຕ່ງຕັ້ງຫົວໜ້າການທະຫານກອງບັນຊາການທະຫານເມືອງໄຊ ໂດຍໄດ້ແຕ່ງຕັ້ງເອົາ ສະຫາຍ ພັນໂທ ບຸນທອງ ແກ້ວປັນຍາ ຫົວໜ້າພະແນກສູ້ຮົບຫ້ອງເສນາທິການທະຫານແຂວງອຸດົມໄຊ ເປັນຫົວໜ້າການທະຫານກອງບັນຊາການທະຫານເມືອງໄຊຜູ້ໃໝ່, ຂໍ້ຕົກລົງ ຂອງລັດຖະມົນຕີກະຊວງປ້ອງກັນປະເທດ ວ່າດ້ວຍການອານຸຍາດໃຫ້ ສະຫາຍ ພັນໂທ ບຸນປັນຍາ ຫຼຽນໄຊສີ ຫົວໜ້າການທະຫານກອງບັນຊາການທະຫານເມືອງໄຊ ພັກຜ່ອນລໍຖ້າເຂົ້າຮັບບຳນານ ແລະ ຂໍ້ຕົກລົງ ຂອງກົມໃຫຍ່ການເມືອງກອງທັບ ວ່າດ້ວຍການແຕ່ງຕັ້ງຮອງພະແນກການເມືອງທີ່ຂື້ນກັບກອງບັນຊາການທະຫານເມືອງໄຊ ແຂວງອຸດົມໄຊ ໂດຍໄດ້ແຕ່ງຕັ້ງເອົາ ສະຫາຍ ຮ້ອຍເອກ ສົມພອນ ສຸລິເຮືອງ ຫົວໜ້າການເມືອງກອງຮ້ອຍ 16 ເປັນຮອງພະແນກການເມືອງກອງບັນຊາການທະຫານເມືອງໄຊ.


ໃນຕອນທ້າຍພິທີໄດ້ຮັບຟັງການໂອ້ລົມຂອງທ່ານ ພັນເອກ ຄຳຍີນ ແສງສຸລີ ເຊິ່ງກ່ອນອື່ນໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜູ້ທີ່ຂື້ນຮັບໜ້າທີ່ໃໝ່ ພ້ອມທັງຍົກໃຫ້ເຫັນຄວາມໝາຍ, ຄວາມສຳຄັນໃນການສືບທອດປ່ຽນແທນຂອງພະນັກງານ-ນັກຮົບຮົບໃນຖັນແຖວກອງທັບປະຊາຊົນລາວ ແລະ ໄດ້ເໜັ້ນໜັກໃຫ້ເອົາໃຈໃສ່ຍົກສູງຕໍ່ໜ້າທີ່ການເມືອງຂອງຕົນ, ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບໄດ້ຮັບຮູ້ເຊື່ອມຊືມຕໍ່ແນວທາງນະໂຍບາຍຂອງພັກ, ປັບປຸງແບບແຜນວິທີເຮັດວຽກໃຫ້ຖຶກຕ້ອງສອດຄ່ອງຕາມສະພາບຄວາມເປັນຈິງຂອງກົມກອງ, ຈັດຕັ້ງປະຕິບັດຂໍ້ກຳນົດ, ກົດລະບຽບຂອງກອງທັບໃຫ້ເຂັ້ມງວດ, ມີສະຕິກຽມພ້ອມທຸກພາວະ, ປະຕິບັດນະໂຍບາຍຕໍ່ນາຍ ແລະ ພົົນທະຫານໃຫ້ຖຶກຕ້ອງຕາມເງື່ອນໄຂຂອງກອງທັບ, ມີຄວາມສາມມັກຄີພາຍໃນຢ່າງໜັກແໜ້ນ,ມີຫົວຄິດປະດິດສ້າງ-ນຳພາຄຸ້ມຄອງກົມກອງກ້າວຂື້ນປະສົບຜົນສຳເລັດໃຫ້ຍິ່ງໃຫຍ່ກ່ວາເກົ່າ.

ໂດຍ: ທະນູວັນ

LEAVE A REPLY

Please enter your comment!
Please enter your name here