ຕາດໂກ່ນ ແຫຼ່ງທ່ອງທ່ຽວທາງທຳມະຊາດ ອັນງົດງາມຂອງ ເມືອງຊ່ອນ ແຂວງຫົວພັນ

0
617


ຕາດໂກ່ນຢູ່ທີ່ ບ້ານເມືອງເກົ້າ ເມືອງຊ່ອນ ແຂວງຫົວພັນ

ຕາດໂກ່ນ ຖືວ່າເປັນແຫຼ່ງທ່ອງທ່ຽວທາງທຳມະຊາດອີກໜຶ່ງແຫ່ງຂອງເມືອງຊ່ອນ ແຂວງຫົວພັນ ທີ່ມີຄວາມສວຍສົດງົດງາມ ແລະ ມີຄວາມອຸດົມສົມບູນໄປດ້ວຍທິວທັດທຳມະຊາດ ເຊິ່ງໃນປັດຈຸບັນຕາດດັ່ງກ່າວແມ່ນໄດ້ຮັບການປັບປຸງພັດທະນາຄືນໃໝ່ ເພື່ອໃຫ້ດຶງດູດນັກທ່ອງທ່ຽວເຂົ້າມາຢ້ຽມຢາມຫຼາຍຂຶ້ນ.

ທ່ານ ບຸນມີໄຊ ວິລະສານ ຜູ້ສຳປະທານຕາດໂກ່ນ ກ່າວວ່າ: ໃນການເຂົ້າມາສຳປະທານ ຕາດໂກ່ນ ແຫ່ງນີ້ ຈຸດປະສົງຫຼັກໆກໍ່ແມ່ນເພື່ອຢາກພັດທະນາໃຫ້ເປັນແຫຼ່ງທ່ອງທ່ຽວທີ່ມີຄວາມສວຍງາມ ເພື່ອໃຫ້ພໍ່ແມ່ປະຊາຊົນໃນຂອບເຂດເມືອງຊ່ອນ ມີສະຖານທີ່ທ່ອງທ່ຽວທີ່ເປັນທຳມະຊາດໄວ້ພັກຜ່ອນຢ່ອນອາລົມ ເຊິ່ງການປັບປຸງໃນເບື້ອງຕົ້ນແມ່ນໄດ້ສ້າງສິ່ງອຳນວຍຄວາມສະດວກຕ່າງໆ ບໍ່ວ່າຈະເປັນສະຖານທີ່ຈອດລົດ, ຮ້ານອາຫານ, ຫ້ອງນ້ຳ, ສ້າງບ່ອນລອຍນ້ຳ ແລະ ອື່ນໆ. ນອກຈາກນັ້ນ, ກໍ່ຍັງໄດ້ສ້າງຂັ້ນໄດຂຶ້ນໄປຮອດຊັ້ນທີ 3 ຂອງຕາດ ເພື່ອເຮັດໃຫ້ນັກທ່ອງທ່ຽວສາມາດຂຶ້ນໄປຊົມວິວດ້ານເທິງຂອງຕາດໄດ້.


ພາຍຫຼັງທີ່ໄດ້ມີການປັບປຸງກໍ່ສ້າງໃນເບື້ອງຕົ້ນນີ້ ເພິ່ນຍັງໄດ້ເຮັດປ້າຍເພື່ອບອກເຕືອນໃຫ້ນັກທ່ອງທ່ຽວ ໄດ້ຮູ້ເຖິງການປົກປັກຮັກສາທຳມະຊາດ, ການຮັກສາຄວາມສະອາດຢູ່ໃນບໍລິເວນອ້ອມຮອບຂອງຕາດໂກ່ນ ແຫ່ງນີ້ ເພື່ອໃຫ້ຄົງ ຄວາມອຸດົມສົມບູນຂອງທຳມະຊາດໄວ້ໃຫ້ຫຼາຍທີ່ສຸດ.

ການພັດທະນາຕາດແຫ່ງນີ້ແມ່ນໄດ້ແບ່ງອອກເປັນ 2 ໄລຍະຄື : ໄລຍະທີ 1 ນັບແຕ່ປີ 2017 ຫາ 2018 ຈະໄດ້ດໍາເນີນການກໍ່ສ້າງທາງເຂົ້າຫາເຂດນໍ້າຕົກຕາດ, ສ້າງຂັ້ນໄດທີ່ເຮັດດ້ວຍໄມ້, ສ້າງຈຸດຊົມວິວ, ເຮືອນພັກຊົມວິວ, ຮ້ານອາຫານ, ສ້າງບ່ອນຈອດລົດ, ເອົາໄຟຟ້າເຂົ້າເຂດພັດທະນາ.


ສຳລັບໄລຍະທີ 2 ແຕ່ປີ 2019 – 2020 ເລີ່ມກໍ່ສ້າງເຮືອນພັກແບບຣີສອດ, ສ້າງຫ້ອງປະຊຸມ, ຮ້ານຂາຍເຄື່ອງທີ່ລະນຶກ, ຮ້ານອາຫານທີ່ໄດ້ມາດຕະຖານ, ສ້າງເຕັກນິກໃນການອອກແບບເປັນໜ້າປະທັບໃຈແກ່ສັງຄົມ ແລະ ນັກທ່ອງທ່ຽວ, ການອະນຸລັກຮີດຄອງປະເພນີແທດເໝາະກັບທໍາມະຊາດ ແລະ ສິ່ງແວດລ້ອມ ເພື່ອໃຫ້ຕິດພັນກັບປະຊາຊົນ, ສ້າງໃຫ້ປະຊາຊົນມີວຽກເຮັດງານທໍາ.


ສະນັ້ນ, ການພັດທະນາຕາດແຫ່ງນີ້ ຈະສາມາດດຶງດູດນັກທ່ອງທ່ຽວໄດ້ຈຳນວນຫຼາຍ ໂດຍສະເພາະນັກທ່ອງທ່ຽວຊາວຕ່າງຊາດທີ່ມັກຮັກໃນທຳມະຊາດ ໂດຍສ້າງກິດຈະກຳທີ່ຫຼາກຫຼາຍຂຶ້ນ ໂດຍສະເພາະການຍ່າງປ່າທີ່ຫຼາຍຄົນໃຫ້ ຄວາມສົນໃຈໃນປັດຈຸບັນນີ້ ແລະ ຈະເປັນອີກທ່າແຮງທີ່ຈະສ້າງລາຍຮັບໃຫ້ແກ່ເມືອງຊ່ອນ ເມືອງທີ່ຫາກໍ່ສ້າງຕັ້ງຂຶ້ນມາໃໝ່ແຫ່ງນີ້.



LEAVE A REPLY

Please enter your comment!
Please enter your name here