22.7 C
Vientiane
ວັນສຸກ, ເດືອນຕຸລາ 7, 2022

8 ມີນາ 2014 ເຮືອບິນໂດຍສານ MH370 ຫາຍສາບສູນພ້ອມຜູ້ໂດຍສານ ແລະ ຈຸບິນ 239 ຄົນ

ເມື່ອວັນທີ 8 ມີນາ 2014 ຖ້ຽວບິນ MH370 ຂອງສາຍການບິນ Malaysia Airlines ສູນຫາຍໄປແບບບໍ່ມີຮ່ອງຮອຍ ພ້ອມຜູ້ໂດຍສານ ແລະ ຈຸບິນ 239 ຄົນ ຂະນະເດີນທາງຈາກນະຄອນຫລວງກົວລາລຳເປີ ປະເທດມາເລເຊຍ ມຸ່ງໜ້າສູ່ນະຄອນຫລວງປັກກິ່ງ ສປ ຈີນ ແລະ ກາຍຫາຍໄປຍັງເປັນປິດສະໜາ ໂດຍໃນປີ 2018 ຫລັງການຫາຍສາບສູນໄປກວ່າ 4 ປີ ລັດຖະບານມາເລເຊຍປະກາດຢຸດພາລະກິດໃນການຄົ້ນຫາເຮືອບິນໂດຍສານດັ່ງກ່າວ.

ໂດຍໃນໄລຍະທຳອິດ ລັດຖະບານມາເລເຊຍເລີ່ມຕົ້ນພາລະກິດຄົ້ນຫາຜູ້ລອດຊີວິດ ແລະ ຖ້ຽວບິນລຳດັ່ງກ່າວ ໂດຍໄດ້ຮັບການຮ່ວມມືຈາກຈີນ ແລະ ອົດສະຕຣາລີ ຄົ້ນຫາໃນມະຫາສະໝຸດອິນເດຍ ຈຸດທີ່ຄາດວ່າເຮືອບິນອາດຈະຕົກລົງໄດ້ ກວມເນື້ອທີ່ຫລາຍກວ່າ 710.000 ຕາກິໂລແມັດ ໃນຄັ້ງນັ້ນລັດຖະບານມາເລເຊຍໄດ້ໃຊ້ງົບປະມານສະໜັບສະໜູນພາລະກິດຄົ້ນຫາດັ່ງກ່າວມູນຄ່າຫລາຍກວ່າ 151 ລ້ານໂດລາສະຫະລັດ ເຊິ່ງຖືເປັນພາລະກິດຄົ້ນຫາເຮືອບິນທີ່ໃຊ້ງົບປະມານຫລາຍທີ່ສຸດໃນປະຫວັດສາດ.

ຫລັງຈາກນັ້ນມີການຢຸດ ແລະ ເລີ່ມຕົ້ນປະຕິບັດອີກ ໂດຍຫວັງຈະພົບເບາະແສ ຫລື ຮ່ອງຮອຍຂອງຖ້ຽວບິນ MH370 ເຊິ່ງຕໍ່ມາພົບພຽງເສດຊາກຊິ້ນສ່ວນເຮືອບິນລຳໜຶ່ງບໍລິເວນທາງທິດຕາເວັນອອກຂອງທະວີບອາຟຣິກາ ເຊິ່ງຢູ່ຫ່າງຈາກຈຸດທີ່ຖືກເຊື່ອວ່າເຮືອບິນໄດ້ຫາຍໄປເປັນໄລຍະທາງໄກຫລາຍ ໂດຍລັດຖະບານມາເລເຊຍອອກມາຢືນຢັນພາຍຫລັງວ່າ: ຊິ້ນສ່ວນດັ່ງກ່າວເປັນຂອງຖ້ຽວບິນ MH370 ແທ້.

ຫລັງຈາກຂະຫຍາຍໄລຍະເວລາປະຕິບັດພາລະກິດອີກຕາມຄຳຮ້ອງຂໍຂອງບໍລິສັດ ໂອຊຽນ ອິນຟິນິຕີ້ ຂອງອາເມລິກາ ມາຍາວນານກວ່າ 4 ປີ ລັດຖະບານມາເລເຊຍຕັດສິນໃຈຈະຢຸດປະຕິບັດພາລະກິດນີ້ ເຖິງວ່າຈະຍັງບໍ່ພົບຜູ້ໂດຍສານ ແລະ ຈຸບິນທີ່ສູນຫາຍ ແລະ ຍັງມີຄົນລໍຄອຍພວກເຂົາກັບເຮືອນກໍຕາມ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here