25 C
Vientiane
ວັນອາທິດ, ເດືອນພຶດສະພາ 22, 2022

3 ບໍລິສັດ ວາງເງິນຄໍ້າປະກັນ ໃນການເປັນຜູ້ບໍລິການ ແຈ້ງພາສີ

ພິທີເຊັນສັນຍາ ແລະ ວາງເງິນຄໍ້າປະກັນ ລະຫວ່າງກົມພາສີ ແລະ 3 ບໍລິສັດ ຊຶ່ງປະກອບມີ: ບໍລິສັດ ໂຊກໄຊ ຂາເຂົ້າ-ຂາອອກ ຈໍາກັດ, ບໍລິສັດ ເອັກຊິມ ຈໍາກັດ ແລະ ບໍລິສັດ ບີວີເອັມວີ ຈໍາກັດ ທີ່ມີເງື່ອນໄຂຄົບຖ້ວນຕາມມາດຖານ ຕາມລະບຽບການ ແລະ ກົດໝາຍກຳນົດໃນການເປັນຜູ້ບໍລິການແຈ້ງພາສີ ໃນເງື່ອນໄຂທີ່ກະຊວງການເງິນກໍານົດອອກ ໄດ້ຈັດຂຶ້ນໃນວັນທີ 28 ກຸມພາ ຜ່ານມານີ້ ທີ່ກົມພາສີ ນະຄອນຫຼວງວຽງຈັນ, ໂດຍມີ ທ່ານ ສາຍມະໂນລິນ ສິນບັນດິດ ຮອງຫົວໜ້າກົມພາສີ ມີບັນດາແຂກຖືກເຊີນ ພະແນກການກ່ຽວຂ້ອງ ເຂົ້າຮ່ວມ.


ການເຊັນສັນຍາໃນຄັ້ງນີ້, ເພື່ອເປັນການຊຸກຍູ້ສົ່ງເສີມບັນດາບໍລິສັດທີ່ມີຄວາມພ້ອມດຳເນີນກິດຈະການ ເປັນຜູ້ບໍລິການແຈ້ງພາສີ ໃນການຈັດຕັ້ງປະຕິບັດບັນດາກົດໝາຍ ເປັນຕົ້ນ: ກົດໝາຍວ່າດ້ວຍພາສີ, ກົດໝາຍວ່າດ້ວຍສ່ວຍສາອາກອນ ແລະ ກົດໝາຍວ່າດ້ວຍການບັນຊີ ເວົ້າລວມ, ເວົ້າສະເພາະ ແມ່ນການຈັດຕັ້ງປະຕິບັດຄໍາແນະນໍາຂອງລັດຖະມົນຕີກະຊວງການເງິນ ສະບັບເລກທີ 5916/ກງ, ລົງວັນທີ 25 ພະຈິກ 2021 ວ່າດ້ວຍການຄຸ້ມຄອງຜູ້ບໍລິການແຈ້ງພາສີ ແລະ ຜູ້ແຈ້ງພາສີທົ່ວໄປ.

ພາຍຫຼັງຄຳແນະນຳສະບັບດັ່ງກ່າວໄດ້ຖືກຮັບຮອງຈາກກະຊວງການເງິນ ດັ່ງນັ້ນ, ຈຶ່ງໄດ້ມີການເຜີຍແຜ່ ໃຫ້ຄຳແນະນຳ ແລະ ປຶກສາຫາກັບບໍລິສັດທີ່ດຳເນີນບໍລິການແຈ້ງພາສີ ລວມໄປເຖິງບັນດາບໍລິສັດທີ່ມີຄວາມສົນໃນດຳເນີນໃນກິດຈະການດັ່ງກ່າວ ຕາມຂໍ້ຕົກລົງແຕ່ງຕັ້ງ ສະບັບເລກທີ 0401/ກງ, ລົງວັນທີ 7 ກຸມພາ 2022. ຜ່ານການຈັດຕັ້ງປະຕິບັດວຽກງານດັ່ງກ່າວສາມາດຄົ້ນຄວ້າ ແລະ ຮັບຮອງເອົາໃນເບື້ອງຕົ້ນ 3 ບໍລິສັດ ທີ່ເຫັນວ່າສາມາດປະກອບມາດຖານເງື່ອນໄຂຄົບຖ້ວນ, ສ່ວນບໍລິສັດອື່ນໆທີ່ກຳລັງມີການປັບປຸງຕົວເອງຄາດວ່າຈະມີການຮັບຮອງໃນໄວໆນີ້.


ຮ່ວມລົງນາມໃນຄັ້ງນີ້ຕາງໜ້າກົມພາສີມີ ທ່ານ ສາຍມະໂນລິນ ສິນບັນດິດ ແລະ ຕາງໜ້າບໍລິສັດມີທ່ານ ໂຊກໄຊ ສົມໃຈນຶກ ຜູ້ອໍານວຍການ ບໍລິສັດ ໂຊກໄຊ ຂາເຂົ້າ-ຂາອອກ ຈໍາກັດ, ມີທ່ານ ໄກສອນ ສຸລິຍະສັກ ຜູ້ຕາງໜ້າບໍລິສັດ ເອັກຊິມ ຈໍາກັດຜູ້ດຽວ ແລະ ທ່ານນາງ ແສງມະນີ ພົມພັກດີ ຜູ້ຕາງໜ້າ ບໍລິສັດ ບີວີເອັມວີ ຈໍາກັດ.
(ຂ່າວ-ພາບ: ພູວັນ)

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here