22.7 C
Vientiane
ວັນສຸກ, ເດືອນຕຸລາ 7, 2022

ຜູ້ເດີນທາງເຂົ້າລາວ ຈະກັກຕົວບໍ່ເກີນ 48 ຊົ່ວໂມງ ແລ້ວກັບເຮືອນໄດ້ເລີຍ

ເພື່ອຮັບປະກັນການອຳນວຍຄວາມສະດວກໃຫ້ແກ່ນັກການທູດ, ນັກລົງທຶນ, ນັກທຸລະກິດ, ຊ່ຽວຊານ, ວິຊາການ, ແຮງງານ, ນັກທ່ອງທ່ຽວຕາມແຜນທ່ອງທ່ຽວສີຂຽວ ແລະ ຄົນລາວທີ່ຈະກັບຄືນປະເທດ ໃຫ້ມີຄວາມວ່ອງໄວ, ແຕ່ຮັດກຸມ ແລະ ຂໍ້ມູນຊັດເຈນ.

ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ ໄດ້ຖະແຫຼງກ່ຽວກັບທິດຊີ້ນໍາໃນການດັດປັບບາງມາດຕະການ ເຂົ້າ-ອອກ ສປປ ລາວ ໃນໄລຍະມີການລະບາດຂອງພະຍາດໂຄວິດ-19 ນັບແຕ່ວັນທີ 2 ມີນາ 2022 ເປັນຕົ້ນໄປ ວ່າ: ອີງຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 258/ຫສນຍ, ລົງວັນທີ 1 ມີນາ 2022 ໂດຍໄດ້ເຫັນດີໃຫ້ສືບຕໍ່ການຜ່ອນຜັນ ໄລຍະເວລາໃນການຈໍາກັດບໍລິເວນ ສຳລັບຜູ້ທີ່ຈະເດີນທາງເຂົ້າມາ ສປປ ລາວຄື:

ສໍາລັບຄະນະຜູ້ແທນ ຫຼື ພະນັກງານລັດ ທີ່ໄປເຄື່ອນໄຫວເຮັດວຽກ ແລະ ສໍາມະນາຢູ່ຕ່າງປະເທດ ແລະ ພົນລະເມືອງລາວ ທີ່ມາຈາກຕ່າງປະເທດ ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR, ເຂົ້າພັກກັກຕົວຢູ່ສະຖານທີ່ ທີ່ຄະນະສະເພາະກິດອະນຸມັດ ໃນໄລຍະລໍຖ້າຜົນກວດບໍ່ເກີນ 48 ຊົ່ວໂມງ (ໄລຍະນີ້ຫ້າມອອກຈາກບໍລິເວນຈົນກ່ວາຈະຮູ້ຜົນ) ແລະ ຖ້າຜົນກວດບໍ່ພົບເຊື້ອ ແມ່ນໃຫ້ສືບຕໍ່ຈໍາກັດບໍລິເວນຢູ່ສະຖານທີ່ພັກເຊົາຂອງຕົນ ໃຫ້ຄົບ 7 ວັນ ພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ.

ສຳລັບນັກການທູດ ແລະ ພະນັກງານສະຖານທູດຕ່າງປະເທດ, ພະນັກງານຜູ້ຕາງໜ້າອົງການຈັດຕັ້ງສາກົນ ທີ່ນອນໃນເຄືອຂ່າຍ ຂອງອົງການສະຫະປະຊາຊາດ, ອົງການຈັດຕັ້ງສາກົນທີ່ ໄດ້ຮັບເອກະສິດ ແລະ ອະພິສິດທາງການທູດ ລວມທັງສະມາຊິກຄອບຄົວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR ແລະ ໃຫ້ລໍຖ້າຜົນກວດບໍ່ເກີນ 48 ຊົ່ວໂມງ ຢູ່ສະຖານທີ່ພັກເຊົາຂອງຕົນ. ຖ້າຜົນກວດບໍ່ພົບເຊື້ອ ອະນຸຍາດໃຫ້ໄປບ່ອນເຮັດວຽກໄດ້ເທົ່ານັ້ນ ໃນໄລຍະ 7 ວັນ

ສຳລັບກຸ່ມນັກທຸລະກິດ ແລະ ນັກລົງທຶນ ເມື່ອມາເຖິງ ສປປ ລາວ ແລ້ວ ຕ້ອງໄດ້ກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR ແລະ ຈຳກັດບໍລິເວນ ຢູ່ສະຖານທີ່ ທີ່ຄະນະສະເພາະກິດ ກຳນົດ ເພື່ອລໍຖ້າຜົນກວດບໍ່ເກີນ 48 ຊົ່ວໂມງ (ໄລຍະນີ້ຫ້າມອອກຈາກບໍລິເວນຈົນກວ່າຈະຮູ້ຜົນ), ຖ້າຜົນກວດບໍ່ພົບເຊື້ອ ສາມາດອອກໄປປະຕິບັດວຽກງານ ຕາມແຜນທີ່ກຳນົດໄວ້ ແລະ ຕ້ອງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອ ຢ່າງເຂັ້ມງວດ.

ສໍາລັບຄົນຕ່າງປະເທດ ທີ່ເປັນ ຊ່ຽວຊານ, ວິຊາການ, ແຮງງານ ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR ແລະ ລໍຖ້າຜົນກວດບໍ່ເກີນ 48 ຊົ່ວໂມງ ຢູ່ໂຮງແຮມທີ່ຄະນະສະເພາະກິດກໍານົດ (ໄລຍະນີ້ຫ້າມອອກຈາກບໍລິເວນຈົນກ່ວາຈະຮູ້ຜົນ), ຖ້າຜົນກວດບໍ່ພົບເຊື້ອ ແມ່ນໄປສະຖານທີ່ ພັກເຊົາຂອງຕົນ ແລະ ອະນຸຍາດໃຫ້ໄປບ່ອນເຮັດວຽກໄດ້ເທົ່ານັ້ນ ໃນໄລຍະ 7 ວັນ.

ສຳລັບຄົນຕ່າງປະເທດ ທີ່ເປັນ ພໍ່ຄ້າຊາວຂາຍ, ນັກສຶກສາ, ຄົນເຊື້ອຊາດລາວ ແລະ ຄອບຄົວຂອງພົນລະເມືອງລາວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR ແລະ ລໍຖ້າຜົນກວດບໍ່ເກີນ 48 ຊົ່ວໂມງ ຢູ່ໂຮງແຮມທີ່ຄະນະສະເພາະກິດກໍານົດ (ໄລຍະນີ້ຫ້າມອອກຈາກບໍລິເວນຈົນກ່ວາຈະຮູ້ຜົນ), ຖ້າຜົນກວດບໍ່ພົບເຊື້ອ ແມ່ນໃຫ້ສືບຕໍ່ຈຳກັດບໍລິເວນ ຢູ່ສະຖານທີ່ ພັກເຊົາຂອງຕົນ ໃຫ້ຄົບ 7 ວັນ.

ສຳລັບ ນັກທ່ອງທ່ຽວເປັນກຸ່ມ ທີ່ຈະເດີນທາງເຂົ້າມາລາວ ພາຍໃຕ້ໂຄງການເສັ້ນທາງທ່ອງທ່ຽວສີຂຽວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ ໂຄວິດ-19 ດ້ວຍເຄື່ອງກວດ RT-PCR, ເຂົ້າພັກຢູ່ໂຮງແຮມ ທີ່ຄະນະສະເພາະກິດໄດ້ກຳນົດໄວ້ ເພື່ອລໍຖ້າຜົນກວດບໍ່ເກີນ 48 ຊົ່ວໂມງ (ໄລຍະນີ້ຫ້າມອອກຈາກບໍລິເວນຈົນກ່ວາຈະຮູ້ຜົນ) ແລະ ຖ້າຜົນກວດບໍ່ພົບເຊື້ອ ຈຶ່ງອະນຸຍາດ ໃຫ້ອອກໄປເຄື່ອນໄຫວກິດຈະກຳຕາມແຜນທ່ອງທ່ຽວ ທັງນີ້, ສໍາລັບຄ່າໃຊ້ຈ່າຍໃນການຈໍາກັດບໍລິເວນ ແລະ ຄ່າກວດຫາເຊື້ອພະຍາດໂຄວິດ-19 ດ້ວຍເຄື່ອງ RT-PCR ແມ່ນໃຫ້ຜູ້ເດີນທາງເຂົ້າປະເທດ ຮັບຜິດຊອບເອງ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here