22.7 C
Vientiane
ວັນສຸກ, ເດືອນຕຸລາ 7, 2022

ອາໄສພື້ນຖານລູກຊາວນາ ຫາເງິນເພີ່ມເຕີມໃສ່ເງິນເດືອນຊີວິດດີຂຶ້ນໄດ້

ຢາກໃຫ້ທຸກຄົນອ່ານໃຫ້ຈົບ! ທຸກສິ່ງທຸກຢ່າງເຮົາເລືອກທີ່ຈະເຮັດໄດ້ດ້ວຍສອງມືທີ່ມີຢູ່ ບໍ່ຕ້ອງໂທດໂຊກຊະຕາວ່າບໍ່ດີເທົ່າຄົນອື່ນ ຢາກໃຫ້ເອົາເລື່ອງນີ້ເປັນແຮງບັນດານໃຈໃນການດຳເນີນຊີວິດ ທຸກຄົນມີດີທີ່ແຕກຕ່າງກັນ ບໍ່ວ່າຈະຢືນຢູ່ຈຸດໃດ ກໍ່ຈົ່ງໃຊ້ສິ່ງທີ່ຕົນເອງມີ, ເຊື່ອໝັ້ນຕົນເອງ ເຖິງຈະເປັນຄົນລະສະພາບແວດລ້ອມແຕ່ມັນກໍ່ສາມາດມາປຽບທຽບກັນໄດ້ ແລະ ເຊື່ອວ່າມັນຈະປ່ຽນຊີວິດໄດ້ຢ່າງແນ່ນອນ.

ມາເບິ່ງເລື່ອງນີ້, ສະຫາຍ ສິບເອກ ລາຊັນ ຈັນທະວົງ ແມ່ນສັງກັດຢູ່ໂຮງຮຽນການທະຫານທ້ອງຖິ່ນຂອງກອງບັນຊາການທະຫານ ແຂວງຫຼວງພະບາງ, ສະຫາຍເປັນນັກຮົບຜູ້ທີ່ມີຄວາມຫ້າວຫັນ ແລະ ດຸໝັ່ນ ເປັນຜູ້ມີແນວຄິດ ຊອກແຫຼ່ງລາຍຮັບໃຫ້ຕົນເອງ ນອກຈາກເງິນເດືອນ ໃນແຕ່ລະເດືອນ ທັງນີ້ ອ້າຍສິບເອກ ອາໄສພື້ນຖານທີ່ເປັນລູກຊາວໄຮ່, ຊາວນາສືບທອດຕາມພໍ່-ແມ່ມາແຕ່ຖິ່ນຖານບ້ານເກີດ, ເມື່ອໄກຖິ່ນຖານ ຕ້ອງມີແນວຄິດໃນການພັດທະນາຕົນເອງດ້ວຍການປູກຝັງ- ລ້ຽງສັດ ຈົນໄດ້ຮັບການຍ້ອງຍໍຊົມເຊີຍຈາກຄະນະພັກ – ຄະນະບັນຊາ ແລະ ໝູ່ເພື່ອນສະຫາຍພາຍໃນກົມກອງວ່າ ສົມແລ້ວທີ່ເປັນນັກຮົບຜູ້ຫ້າວຫັນຕະຫຼອດມາ.

ດ້ວຍອຸດົມການທີ່ມຸ້ງໝັ້ນ ແນວຄິດຢາກຮັບໃຊ້ຊາດ ພາຍຫຼັງໄດ້ຮຽນຈົບຊັ້ນມໍ 7 ສະຫາຍກໍໄດ້ສະໝັກໃຈເຂົ້າຮັບໃຊ້ຊາດໃນຊຸດເຄື່ອງແບບສີຂຽວ ແລະ ເປັນສະມາຊິກຄອບຄົວໃຫຍ່ຂອງກອງທັບປະຊາຊົນລາວ ໃນປີ 2017 ເຊິ່ງເບື້ອງຕົ້ນແມ່ນໄດ້ເປັນທະຫານພັນທະ ແລະ ຖືກປະກອບບັນຈຸຢູ່ໂຮງຮຽນການທະຫານທ້ອງຖິ່ນຂອງກອງບັນຊາການທະຫານ ແຂວງຫຼວງພະບາງ ແລະ ກໍ່ມີຜົນງານໂດດເດັ່ນຕະຫຼອດມາ.

ນອກຈາກນີ້ຍັງໃຊ້ເວລາໂມງເລີກການໃຫ້ເກີດປະໂຫຍດຢ່າງສູງໃຫ້ແກ່ຕົນເອງ ດ້ວຍການປູກຝັງ – ລ້ຽງສັດ, ໃນເບື່ອງຕົ້ນ ອ້າຍສິບເອກ ໄດ້ປູກພືດຜັກລົ້ມລຸກຕາມລະດູການເພື່ອເປັນອາຫານເຂົ້າເຮືອນຄົວລວມ ຕາມການກໍານົດຂອງຂັ້ນເທິງກໍຄືທາງໂຮງຮຽນວາງອອກ ເຊິ່ງຄາດໝາຍຜູ້ໜຶ່ງແມ່ນໃຫ້ໄດ້ 80 ກິໂລຕໍ່ຄົນຕໍ່ປີ, ໃນນັ້ນການປູກຝັງແມ່ນໄດ້ແບ່ງອອກເປັນ 3 ງວດ, ເຊິ່ງເຫັນວ່າຜົນໄດ້ຮັບແມ່ນໄດ້ລື່ນຄາດໝາຍ ຈິ່ງໄດ້ນໍາມາຂາຍໃຫ້ຄອບຄົວຂອງພະນັກງານ ແລະ ນໍາສົ່ງສູ່ທ້ອງຕະຫຼາດ, ນອກຈາກນີ້ຍັງໄດ້ລ້ຽງສັດປີກປະເພດເປັດ, ໄກ່ລາດ ຈຳນວນໜຶ່ງ ເຊິ່ງໃນໜຶ່ງປີຜ່ານມາສະຫາຍໄດ້ມີລາຍຮັບຈາກການຂາຍພືດຜັກ ແລະ ສັດລ້ຽງ ໄດ້ເງິນບໍ່ຕໍ່າກວ່າ 3-4 ລ້ານກີບ.

ດ້ວຍຄວາມອົດທົນ ແລະ ປະຢັດມັດທະຍັດ, ບໍ່ຫຼີ້ນກິນຟຸມເຟືອຍ ແລະ ໃຊ້ຈ່າຍຢ່າງມີເຫດຜົນ ເພື່ອຮັບປະກັນເຮັດໃຫ້ຊີວິດການເປັນຢູ່ຂອງຕົນເອງໄດ້ຮັບການພັດທະນາດີຂື້ນ, ອ້າຍສິບເອກ ຈິ່ງໄດ້ເກັບທ້ອນເງິນເດືອນທີ່ເຫຼືອຢູ່ຈາກການຫັກອັດຕາກິນ ແລະ ເຂົ້າຫວຍ ເພື່ອເປັນແຫຼ່ງທຶນຮອນຊື້ເປັດ – ໄກ່ມາລ້ຽງເພີ່ມຕໍ່ໄປ. ໃນປີ 2021 ໄດ້ຂາຍພືດຜັກລົ້ມລຸກຕາມລະດູການ ແລະ ສັດລ້ຽງເປັນ 3 ງວດ ໄດ້ເງິນ 6 – 7 ລ້ານກີບຕໍ່ປີ, ເງິນທີ່ໄດ້ມາສ່ວນໜຶ່ງສະຫາຍໄດ້ຝາກໄປໃຫ້ຄອບຄົວພໍ່ແມ່, ອີກສ່ວນໜຶ່ງສະຫາຍໄດ້ເກັບຮັກສາໄວ້ເປັນແຫຼ່ງທຶນຮອນເພື່ອຂະຫຍາຍຊື້ສັດລ້ຽງພໍ່ພັນ – ແມ່ພັນມາເພີ່ມຕື່ມ.

.

ນອກຈາກນີ້ ສະຫາຍຍັງມີແຜນທີ່ຈະສ້າງໜອງລ້ຽງປາ, ຊື້ເຫຼັກໜາມມາລ້ອມສວນຜັກ ແລະ ພ້ອມທັງເຂົ້າຫວຍຕື່ມອີກ ເພື່ອສະສົມເປັນທືນຮອນໃນການປູກຝັງ – ລ້ຽງສັດ ໃຫ້ໄດ້ຕາມແຜນການທີ່ຕົນເອງກໍານົດໄວ້. ຈາກຜົນງານ ແລະຄຸນງາມຄວາມດີດັ່ງກ່າວ ສະຫາຍ ພັນໂທ ຖາວອນ ວິລະສັກ ເລຂາຄະນະພັກຮາກຖານ, ຫົວໜ້າການເມືອງໂຮງຮຽນການທະຫານທ້ອງຖິ່ນ ແຂວງຫຼວງພະບາງ ໄດ້ໃຫ້ການຢັ້ງຍືນ ວ່າ: ນັບແຕ່ມື້ ສະຫາຍ ສິບເອກ ລາຊັນ ຈັນທະວົງ ໄດ້ເຂົ້າມາສັງກັດຢູ່ກົມກອງຂອງພວກເຮົາ, ສະຫາຍໄດ້ມີຄວາມຕື່ນຕົວຍົກສູງສະຕິຕໍ່ການຈັດຕັ້ງ ແລະ ຍາມໃດກໍ່ຄົ້ນຄ້ວາຊອກຮູ້ຮໍ່າຮຽນ, ເຝິກຝົນຫຼໍ່ຫຼອມຕົນເອງຢ່າງຕໍ່ເນື່ອງ ເພື່ອໃຫ້ກາຍເປັນນັກຮົບຜູ້ທີ່ດີເດັ່ນ, ສະຫາຍເປັນຜູ້ໜຶ່ງທີ່ມີຄວາມຖະໜອມຖ່ອມຕົວໃນໝູ່ມະຫາຊົນ ແລະ ມີຄວາມເປັນແບບຢ່າງທີ່ດີ ມີຄວາມສາມັກຄີຮັກແພງໝູ່ເພື່ອນມິດສະຫາຍພາຍໃນ ແລະພາຍນອກຢ່າງກ້ວາງຂວາງ, ສົມແລ້ວທີ່ເປັນນັກຮົບຜູ້ຂະຫຍັນ.
ຂໍ້ມູນຈາກ: ຂ່າວສານຫຼວງພະບາງ

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here