32 C
Vientiane
ວັນຈັນ, ເດືອນພຶດສະພາ 23, 2022

ຈຳປາສັກ ແລະ ລັດວິສາຫະກິດໄຟຟ້າລາວ ຮ່ວມມື ປັບປຸງວຽກງານ ໄຟຟ້າສາທາລະນະ

ໃນວັນທີ 24 ກຸມພາ ນີ້, ຢູ່ຫ້ອງວ່າການແຂວງຈຳປາສັກ ໄດ້ມີພິທີ ລົງນາມບົດບັນທຶກ ຄວາມເຂົ້າໃຈ (MOU) ວ່າດ້ວຍການຮ່ວມມືສຶກສາ, ສຳຫລວດຄວາມເປັນໄປໄດ້ ໃນການປັບປຸງວຽກງານໄຟຟ້າສາທາລະນະ ລະຫວ່າງ ອົງການປົກຄອງແຂວງຈຳປາສັກ ຕາງໜ້າໂດຍແມ່ນ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ແລະ ລັດວິສາຫະກິດໄຟຟ້າລາວ ໂດຍແມ່ນ ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ, ມີຄະນະນຳແຂວງ, ພະແນກການທີ່ກ່ຽວຂ້ອງ ແລະ ຄະນະນຳລັດວິສາຫະກິດໄຟຟ້າລາວ ເຂົ້າຮ່ວມ ເປັນສັກຂີພິຍານ.


ທັງນີ້ ກໍເພື່ອເປັນການເພີ່ມທະວີ ແລະ ສົ່ງເສີມການຮ່ວມມືທັງສອງຝ່າຍ ກ່ຽວກັບວຽກງານການສະໜອງ ແລະ ການບໍລິການໄຟຟ້າສາທາລະນະ, ແນໃສ່ເຮັດໃຫ້ລະບົບຊົມໃຊ້ໄຟຟ້າສາທາລະນະ ທົ່ວແຂວງຈຳປາສັກ ໄດ້ຮັບການປັບປຸງ ແລະ ພັດທະນາຕາມນະໂຍບາຍຂອງພັກ-ລັດ, ໃຫ້ມີຄວາມຮັບປະກັນທາງດ້ານມາດຕະ ຖານເຕັກນິກ, ປອດໄພ, ມີສະຖຽນລະພາບ, ຊົມໃຊ້ພຽງພໍ, ປະຢັດ, ເປັນລະບຽບຮຽບຮ້ອຍ ແລະ ມີຄວາມສວຍງາມ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ.


ສ່ວນຂອບເຂດການຮ່ວມມືພາຍໃຕ້ ບົດບັນທຶກຄວາມເຂົ້າໃຈສະບັບນີ້, ກວມເອົາການຮ່ວມມື ເພື່ອສຶກສາສຳຫລວດຄວາມເປັນໄປໄດ້ ໃນການປັບປຸງດ້ານການສະໜອງ ກະແສໄຟຟ້າ, ການຊຳລະສະສາງ, ການຕິດຕັ້ງດໍາເນີນງານສ້ອມແປງ, ປ່ຽນຖ່າຍ ແລະ ບຳລຸງຮັກສາລະບົບຊົມໃຊ້ໄຟຟ້າສາທາລະນະ ທີ່ຂຶ້ນກັບ ແຂວງຈຳປາສັກ ໂດຍສະເພາະເທສະບານນະຄອນປາກເຊ ເຊັ່ນ: ການຍົກລະດັບປະສິດທິພາບການຈຳໜ່າຍ, ການຊົມ ໃຊ້, ຄວາມປອດໄພ ແລະ ການປະຢັດພະລັງງານ, ໃນສຳນັກງານອົງການລັດ ແລະ ສະຖານທີ່ສາທາລະນະ.

ພ້ອມນີ້ຕິດຕັ້ງ ແລະ ປັບປຸງລະບົບໄຟເຍືອງທາງ, ເຍືອງຂົວ, ສະໜາມຫລວງ, ສວນສາທາລະນະອື່ນໆ; ລະບົບໄຟສັນຍານຈະລາຈອນ; ລະບົບໄຟຊົນລະປະ ທານ ແລະ ນ້ຳເສຍ ການຕິດຕັ້ງລະບົບໄຟຟ້າໃນລະບົບສູບນ້ຳ; ການກໍ່ສ້າງ, ຕິດຕັ້ງ ແລະ ສ້ອມແປງລະບົບສາຍຈຳໜ່າຍແຮງກາງ 22 KV ແລະ ແຮງຕ່ຳ 0,4 KV; ການຈັດສັນ, ການຕັດ ແລະ ການສ້ອມແຊມຕົ້ນໄມ້ຕາມແລວສາຍຕາຂ່າຍຈຳໜ່າຍ ໃນເຂດນະຄອນປາກເຊ; ການຈັດສັນ, ການຍ້າຍ ແລະ ການເອົາສາຍລົງດິນຕາມຈຸດຕ່າງໆໃນຕົວເມືອງຕາມຄວາມຈຳເປັນ ລວມເຖິງສາຍໂທລະຄົມມະນາຄົມ.
ຂ່າວ: ທັດຊະນະ ແສງດາຣາ

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here