22.7 C
Vientiane
ວັນສຸກ, ເດືອນຕຸລາ 7, 2022

ຕຳຫລວດອິນເດຍຈັບຊາຍນັກຕົ້ມຕຸນ ຫລອກແຕ່ງດອງກັບຜູ້ຍິງ 18 ຄົນ

ຕຳຫລວດອິນເດຍຈັບກຸມຊາຍນັກຕົ້ມຕຸນທີ່ຫລອກແຕ່ງດອງກັບຜູ້ຍິງທົ່ວປະເທດຢ່າງໜ້ອຍ 18 ຄົນໄດ້ກ່ອນທີ່ລາວວາງແຜນຈະແຕ່ງດອງກັບຜູ້ຍິງອີກ 2 ຄົນ ໂດຍຊາຍຄົນນີ້ມັກໃຊ້ອຸບາຍຫລອກເຫຍື່ອວ່າ: ລາວເປັນຄົນເຊື່ອເລື່ອງເນື້ອຄູ່ ແລະ ຕ້ອງການຕາມຫາຮັກແທ້.

ຕຳຫລວດອິນເດຍເຜີຍວ່າ: ທ້າວ ບິບູ ປຣາກາຊ ສເວນ ອາຍຸ 67 ປີ ມັກໂພສຫລອກລວງໃນເວັບໄຊຫາຄູ່ແຕ່ງດອງຂອງອິນເດຍວ່າ: ລາວເປັນແພດ ອາຍຸ 51 ປີ ແລະ ສານສຳພັນກັບກຸ່ມຜູ້ຍິງເປົ້າໝາຍທີ່ເປັນອາຈານມະຫາວິທະຍາໄລ, ທະນາຍຄວາມ, ເຈົ້າໜ້າທີ່ການແພດ ແລະ ເຈົ້າໜ້າທີ່ທະຫານທົ່ວປະເທດ ດ້ວຍການແອບອ້າງວ່າລາວມີເງິນເດືອນສູງ, ໃຊ້ບັດປະຈຳຕົວປອມ ແລະ ປອມແປງໜັງສືແຕ່ງຕັ້ງເພື່ອສ້າງຫລັກຖານປອມດ້ານຂໍ້ມູນສ່ວນຕົວ ແລະ ຖານະຄອບຄົວໃຫ້ເບິ່ງໜ້າເຊື່ອຖື ໂດຍມີຈຸດປະສົງເພື່ອຫວັງຫລອກເອົາເງິນຈາກຜູ້ຍິງ ແລະ ມີຄວາມສຳພັນທາງເພດ.

ຕຳຫລວດຄົນດັ່ງກ່າວຍັງລະບຸວ່າ: ເຈົ້າໜ້າທີ່ຈັບກຸມທ້າວ ສເວນ ໄດ້ຫລັງຈາກໃຊ້ເວລາຫລາຍເດືອນເພື່ອຕິດຕາມລາວ ໂດຍພົບເອກະສານປອມແປງຕົວຕົນທີ່ຫລາກຫລາຍ, ບັນຊີທະນາຄານ ລວມທັງແຜນແຕ່ງດອງອີກ 2 ຄັ້ງໃນເດືອນກຸມພາ ແລະ ມີນາ. ທ້າວ ສເວນ ໃຊ້ວາຈາຊັກຊວນໃຈຄົນເກັ່ງ ແລະ ມັກມຸ່ງເປົ້າໃສ່ກຸ່ມຜູ້ຍິງໂສດ, ແມ່ໝ້າຍ ຫລື ຜູ້ຍິງຜ່ານການຢ່າຮ້າງອາຍຸ 40 ກວ່າປີ.

ຫລັງເຂົ້າພິທີແຕ່ງດອງກັບເຫຍື່ອໄດ້ພຽງບໍ່ເທົ່າໃດວັນ, ທ້າວ ສເວນ ມັກອອກອຸບາຍຂໍຢືມເງິນ ຫລື ເຄື່ອງປະດັບຂອງພັນລະຍາໃໝ່ໄປໃຊ້ ເນື່ອງຈາກເຫດສຸກເສີນ. ຈາກນັ້ນລາວຈະຖິ້ມຜູ້ຍິງຄົນກ່ອນໜ້າໄປຫາເຫຍື່ອຜູ້ຍິງຄົນໃໝ່ທີ່ມີສະຖານະໂສດ, ໝ້າຍ ຫລື ຜ່ານການຢ່າຮ້າງ ເພາະຜູ້ຍິງກຸ່ມນີ້ຈະບໍ່ກ້າແຈ້ງຕຳຫລວດ ເນື່ອງຈາກສັງຄົມອິນເດຍຍັງບໍ່ຍອມຮັບເລື່ອງຜູ້ຍິງທີ່ແຕ່ງດອງໃໝ່ອີກ. ທັງນີ້ ຕຳຫລວດສືບສວນຄາດວ່າ: ທ້າວ ສເວນ ໄດ້ຫລອກແຕ່ງດອງກັບຜູ້ຍິງຫລາຍກວ່າ 18 ຄົນຈາກການສືບຂໍ້ມູນໃນໂທລະສັບມືຖືທີ່ບັນທຶກຊື່ຂອງພັນລະຍາຫລາຍຕໍ່ຫລາຍຄົນເປັນຊື່ເມືອງ ຫລື ລັດຕ່າງໆທີ່ຜູ້ຍິງອາໄສຢູ່ຈົນຖືກເປີດເຜີຍເລື່ອງຕົ້ມຕຸນໃນທີ່ສຸດ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here