22.7 C
Vientiane
ວັນສຸກ, ເດືອນຕຸລາ 7, 2022

ລັດວິສາຫະກິດໄຟຟ້າລາວ ເອົາໃຈໃສ່ແກ້ໄຂບັນຫາ ຂາດທຶນທີ່ແກ່ຍາວມາຫລາຍປີ ແລະ ບັນຫາໜີ້ສິນທີ່ເພີ່ມຂຶ້ນຢ່າງຫລວງຫລາຍ ແຕ່ກໍຍັງມີຫລາຍບັນຫາທີ່ຕ້ອງແກ້ໄຂຕື່ມ

ວັນທີ 11 ກຸມພາ 2022 ທີ່ຜ່ານມາ, ຢູ່ສໍານັກງານໃຫຍ່ ລັດວິສາຫະກິດໄຟຟ້າລາວ ໄດ້ຈັດກອງປະຊຸມສະຫລຸບວຽກງານປະຈໍາປີ 2021 ແລະ ທິດທາງແຜນການ 2022 ຂອງລັດວິສາຫະກິດໄຟຟ້າລາວ, ໂດຍການເປັນປະທານຂອງ ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ໃຫ້ກຽດເຂົ້າຮ່ວມຂອງ ທ່ານ ດາວວົງ ພອນແກ້ວ ລັດຖະມົນຕີ ກະຊວງພະລັງງານ ແລະ ບໍ່ແຮ່, ມີຜູ້ຕາງໜ້າຈາກຫ້ອງການ, ສະຖາບັນ, ບໍລິສັດຜະລິດ-ໄຟຟ້າລາວ ມະຫາຊົນ, ບໍລິສັດ ໄຟຟ້ານໍ້າງື່ມ 3 ພາວເວີ, ບໍລິສັດ ກໍ່ສ້າງ-ຕິດຕັ້ງໄຟຟ້າ, ລັດວິສາຫະກິດຖືຮຸ້ນລາວ, ລັດວິສາຫະກິດແຮ່ທາດລາວ, ພ້ອມດ້ວຍພະນັກງານອ້ອມຂ້າງ ລັດວິສາຫະກິດໄຟຟ້າລາວ ແລະ ມີຫົວໜ້າສາຂາໄຟຟ້າລາວຢູ່ບັນດາແຂວງ ກໍໄດ້ເຂົ້າຮ່ວມປະຊຸມ ໂດຍຜ່ານລະບົບວິດີໂອ ອອນລາຍ.

ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ ໄດ້ລາຍງານສະພາບການເຄື່ອນໄຫວວຽກງານທີ່ພົ້ນເດັ່ນໃນໄລຍະ 1 ປີຜ່ານມາ, ໂດຍສະເພາະ ການໄຂບັນຫາການດໍາເນີນທຸລະກິດທີ່ຂາດທຶນທີ່ແກ່ຍາວມາເປັນເວລາຫລາຍປີ, ບັນຫາໜີ້ສິນທີ່ເພີ່ມຂຶ້ນຢ່າງຫລວງຫລາຍ, ການປະຕິຮູບຮອບດ້ານພາຍໃນລັດວິສາຫະກິດໄຟຟ້າລາວ ແລະ ວຽກງານອື່ນໆ, ເພື່ອຮັບປະກັນໃຫ້ການຄຸ້ມຄອງ, ບໍລິຫານ ລາຍຮັບ-ລາຍຈ່າຍ ໃຫ້ລວມສູນ, ຮັດກຸມ ແລະ ທັນສະໄໝ ເພື່ອແທດເໝາະກັບສະພາບເສດຖະກິດ-ສັງຄົມ ທັງໃນປັດຈຸບັນ ແລະ ໃນອະນາຄົດ.

ສໍາລັບທິດທາງແຜນການໃນ ປີ 2022 ແມ່ນຈະສືບຕໍ່ສຸມໃສ່ວຽກງານສະໜອງພະລັງງານໃຫ້ພຽງພໍ ແລະ ໝັ້ນຄົງ, ເອົາໃຈໃສ່ແກ້ໄຂບັນຫາພະລັງງານໄຟຟ້າຕົກເຮ່ຍ, ການດໍາເນີນມາດຕະການຕໍ່ຜູ້ກະທໍາຜິດ (ລັກຊົມໃຊ້ໄຟຟ້າ) ທັງໃນພາກຜູ້ຊົມໃຊ້ ແລະ ພະນັກງານຂອງບໍລິສັດເອງ, ແກ້ໄຂບັນຫາໄຟຕົກ-ໄຟມອດ, ການສ້າງລາຍຮັບເພີ່ມ ແລະ ວຽກງານອື່ນໆ ກໍໃຫ້ມີການຫັນປ່ຽນທີ່ດີຂຶ້ນ.

ໃນໂອກາດນີ້, ທ່ານ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ມີຄໍາເຫັນໂອ້ລົມຊີ້ນໍາຕໍ່ກອງປະຊຸມ, ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະນໍາ ແລະ ພະ ນັກງານ ທົ່ວລັດວິສາຫະກິດໄຟຟ້າລາວ ທີ່ມີຄວາມເອົາໃຈໃສ່ຢ່າງຕັ້ງໜ້າ ເພື່ອບຸກບືນຜ່ານຜ່າຄວາມຫຍຸ້ງ ຍາກຕ່າງໆ, ພ້ອມທັງໄດ້ເນັ້ນບາງບັນຫາໃຫ້ລັດວິສາຫະກິດໄຟຟ້າລາວ ຕ້ອງເອົາໃຈໃສ່ປັບປຸງແກ້ໄຂ ເປັນຕົ້ນ:1)ຄວາມຫຍຸ້ງຍາກໃນກົງຈັກການຈັດຕັ້ງທີ່ມີລັກສະນະໃຫຍ່ໂຕ, ບັນຫາບຸກຄະລາກອນໃນສະພາບແບບເຫລືອບໍ່ພໍ.

2)ການຈັດຕັ້ງປະຕິບັດແຜນພັດທະນາພະລັງງານ ແລະ ບໍ່ແຮ່ 5 ປີຄັ້ງທີ IX (2021-2025) ຕ້ອງໄດ້ກໍານົດເປັນແຜນງານລະອຽດ ແລະ ໃຫ້ສອດຄ່ອງກັບພາກປະຕິບັດຕົວຈິງໃຫ້ມີຜົນສໍາເລັດ. ເອົາໃຈໃສ່ສືບຕໍ່ແກ້ໄຂສະພາບຄວາມຫຍຸ້ງຍາກດ້ານການເງິນ ໃນການດໍາເນີນທຸລະກິດ, ສົ່ງເສີມການປະຢັດ, ຕ້ານການຟູມເຟືອຍ.

3)ສືບຕໍ່ປັບປຸງ ແລະ ຍົກປະສິດທິຜົນໃນ ການດໍາເນີນທຸລະກິດໃນເງື່ອນໄຂໃໝ່. ການຈັດສັນ ແລະ ສັບຊ້ອນບຸກຄະລາກອນ ຕ້ອງໃຫ້ຖືກກັບວຽກຕົວຈິງ, ທັງມີຄຸນະພາບ ແລະ ສອດຄ່ອງກັບຄວາມຮຽກຮ້ອງຕ້ອງການຂອງ ໜ້າທີ່ການເມືອງ.

ຂໍ້ມູນ: ຂປລ

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here