11-17 ເມສາ ເຈົ້າໜ້າທີ່ວາງກຳລັງອອກກວດກາ 3 ຈຸດ ຈັບຄວາມໄວ ແລະ ກວດທາດເຫຼົ້າ

0
111

ທ່ານ ພັນ​ໂທ ກົງ­ສີ ສຸ­ວັນ­ນະ​ຕຸ້ມ ຫົວ­ໜ້າ​ກົມ​ຕໍາ­ຫຼວດ​ຈະ­ລາ­ຈອນ ໄດ້​ກ່າວ​ວ່າ: ເພື່ອ​ເຮັດ​ໃຫ້­ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ ແລະ ຕ້ອນ­ຮັບ​ປີ​ໃໝ່​ລາວ ພສ 2562 ໃນ​ວັນ​ທີ 14 – 16 ເມ­ສາ 2019 ມີ​ຄວາມ​ສະ­ຫງົບ​ປອດ​ໄພ ມີ​ບັນ­ຍາ­ກາດ​ເບີກ­ບານ​ມ່ວນ­ຊື່ນ ແລະ ປາ­ສະ­ຈາກ​ໄດ້­ຜົນ​ເສຍ​ຫາຍ​ທາງ​ສຸ­ຂະ­ພາບ​ຊີ­ວິດ ແລະ ຊັບ​ສິນ ທີ່​ເກີດ​ຂຶ້ນ​ຈາກ​ອຸ­ບັດ­ເຫດ.

ສະ­ນັ້ນ, ກົມ​ຕໍາ­ຫຼວດ​ຈະ­ລາ­ຈອນ ຈຶ່ງ​ໄດ້​ວາງ​ແຜນ​ປ້ອງ​ກັນ​ງານ​ບຸນ​ດັ່ງ­ກ່າວ​ນີ້ ໃຫ້​ມີ​ຄວາມ​ສະ­ຫງົບ​ປອດ​ໄພ ນັບ​ແຕ່​ວັນ​ທີ 11 – 17 ເມ­ສາ 2019 ເຈົ້າ​ໜ້າ­ທີ່​ຈະ​ໄດ້​ຈັດ​ຕັ້ງ​ກໍາລັງ​ອອກ​ກວດ­ກາ​ຈັບ​ຄວາມ​ໄວ ແລະ ກວດ​ທາດ​ເຫຼົ້າ​ທີ່​ກໍາ­ນົດ​ໄວ້ 3 ຈຸດ​ຄື: ພາກ​ເໜືອ​ເຂດ​ກາ­ສີ ຫາ ວັງ​ວຽງ, ພາກ​ກາງ​ເຂດ​ບໍ​ລິ​ຄໍາ​ໄຊ ຫາ ຄໍາມ່ວນ, ແລະ ພາກ​ໃຕ້​ເຂດ​ສາ­ລະ​ວັນ ຫາ ຈໍາ­ປາ​ສັກ.

ພ້ອມ​ດຽວ​ກັນ​ນີ້ ຍັງ​ລົງ​ກວດ­ກາ​ຍານ­ພາ­ຫະ­ນະ, ຜູ້​ຂັບ​ຂີ່ ແລະ ເອ­ກະ­ສານ​ການ​ນໍາໃຊ້​ພາ­ຫະ­ນະ, ການ​ບັນ­ທຸກ​ຂົນ­ສົ່ງ​ສິນ­ຄ້າ, ການ​ຂົນ­ສົ່ງ​ໂດຍ­ສານ​ເກີນ, ກວດ​ຄວາມ​ໄວ, ກວດ​ທາດ​ເຫຼົ້າ, ບໍ່​ໃສ່​ໝວກ​ກັນ​ກະ­ທົບ, ຮັດ​ສາຍ­ແອວ​ນິ­ລະ​ໄພ, ແລະ ອື່ນໆ.

ໂອ­ກາດ​ດຽວ​ກັນ​ນີ້ ທ່ານ​ຍັງ​ໄດ້​ຮຽກ­ຮ້ອງ​ເຖິງ​ປະ­ຊາ­ຊົນ, ຜູ້​ປົກ­ຄອງ, ອໍາ­ນາດ​ການ​ປົກ­ຄອງ​ໃຫ້​ຍົກ​ສູງ​ຄວາມ​ຮັບ­ຜິດ­ຊອບ ເປັນ​ເຈົ້າ​ການ​ໃນ​ການ​ປະ­ຕິ­ບັດ​ກົດ­ໝາຍ, ແນະ­ນໍາ​ລູກ​ຫຼານ ແລະ ພະ­ນັກ­ງານ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ໃຫ້​ເປັນ​ເຈົ້າ​ການ, ປ້ອງ​ກັນ​ຕົນ​ເອງ ເພື່ອ​ໃຫ້​ຫຼຸດ​ອອກ​ຈາກ​ອຸ­ບັດ­ເຫດ.

ພິ­ທີ​ປ່ອຍ​ຂະ​ບວນ​ກໍາ­ລັງ​ຕໍາ­ຫຼວດ​ຈະ­ລາ­ຈອນ ເພື່ອ​ປ້ອງ​ກັນ​ສະ­ກັດ​ກັ້ນ​ອຸ­ບັດ­ເຫດ​ຈະ­ລາ­ຈອນ ໃນ​ໄລ­ຍະ​ການ​ສະ­ເຫຼີມ­ສະ­ຫຼອງ​ບຸນ­ປີ­ໃໝ່​ລາວ ພສ 2562 ຈັດ​ຂຶ້ນ​ວັນ​ທີ 6 ເມ­ສາ 2019 ທີ່​ກົມ​ຕໍາຫຼວດ​ຈະ­ລາ­ຈອນ ກະ­ຊວງ​ປ້ອງ​ກັນ​ຄວາມ​ສະ­ຫງົບ.

LEAVE A REPLY

Please enter your comment!
Please enter your name here