ການຄ້າ ກໍານົດຂາຍຊີ້ນໝູສູງສຸດບໍ່ເກີນ 36 ພັນກີບ

0
334

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ( ອຄ.ນວ ) ແຈ້ງກໍານົດລາຄາຂາຍຊີ້ນໝູສູງສຸດບໍ່ເກີນ 36 ພັນກີບຕໍ່ກິໂລ, ພ້ອມໃຫ້ເຈົ້າໜ້າທີ່ການຄ້າສົມທົບກັບຈັດສັນຕະຫຼາດເອົາໃຈໃສ່ຊຸກຍູ້ໃຫ້ແມ່ຄ້າມາຂາຍ ເພື່ອຫຼີກລຽງສິນຄ້າຂາດຕະຫຼາດ.

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ອອກແຈ້ງການເລກທີ 0704 /ອຄ.ນວ.ຄພນ ລົງວັນທີ 5 ເມສາ 2019 ເລື່ອງຫ້າມສວຍໂອກາດຂຶ້ນລາຄາສິນຄ້າຕາມລໍາພັງໃຈໃນໄລຍະບຸນປີໃໝ່ລາວ ພ.ສ 2562.ເພື່ອເຮັດໃຫ້ການຄຸ້ມຄອງລາຄາສິນຄ້າ ແລະ ຄ່າບໍລິການເຂົ້າສູ່ລະບຽບກົດໝາຍ ບົນພື້ນຖານກົນໄກເສດຖະກິດຕະຫຼາດທີ່ມີການຄຸ້ມຄອງ ແລະ ດັດສົມຂອງລັດ ພ້ອມທັງບໍ່ໃຫ້ເອົາລັດເອົາປຽບຜູ້ຊົມໃຊ້ ເຊິ່ງຈະສ້າງຜົນກະທົບຕໍ່ເສດຖະກິດ ໂດຍສະເພາະແມ່ນວັນບຸນປະເພນີ ແລະ ວັນສໍາຄັນຂອງຊາດ.


ຫົວໜ້າພະແນກ ອຄ.ນວ ຈຶ່ງອອກແຈ້ງການ ດັ່ງນີ້:

ໃຫ້ຜູ້ປະກອບການທຸລະກິດ, ຊາວຄ້າຂາຍນໍາສິນຄ້າຕົນອອກມາຈໍາໜ່າຍໃນລາຄາທີ່ລັດກໍານົດ ໂດຍສະເພາະແມ່ນສິນຄ້າປະເພດຄວບຄຸມລາຄາເປັນຕົ້ນ: ເຂົ້າກິນ, ຊີ້ນ, ປາ, ສ່ວນສິນຄ້າປະເພດອື່ນໆແມ່ນຂາຍໃນລາຄາປົກກະຕິທີ່ເຄີຍຂາຍໃນໄລຍະຜ່ານມາ, ການຂຶ້ນລາຄາກໍໃຫ້ສົມເຫດສົມຜົນ, ຫ້າມກັກຕຸນສິນຄ້າ ຫຼື ສວຍໂອກາດຂຶ້ນລາຄາຕາມລໍາພັງໃຈ ຖ້າມີການພັກຫຼິ້ນບຸນປີໃໝ່ໃຫ້ຄະນະຈັດສັນຕະຫຼາດຊຸກຍູ້ລະດົມໃຫ້ຊາວຄ້າຂາຍມາຂາຍເປັນປົກກະຕິ ແລະ ຂໍຄວາມຮ່ວມມືນໍາຊາວຄ້າຂາຍພ້ອມກັນຈັດຕັ້ງປະຕິບັດ ເພື່ອເຮັດໃຫ້ການສະໜອງສິນຄ້າມີພຽງພໍ, ລາຄາມີຄວາມສະຫງົບ ປະກອບສ່ວນເຮັດໃຫ້ການສະເຫຼີມສະຫຼອງປີໃໝ່ລາວມີຄວາມເບີກບານມ່ວນຊື່ນ.

ກໍານົດລາຄາຂາຍຍ່ອຍປະເພດຊີ້ນປາດັ່ງນີ້:
ລາຄາຊີ້ນໝູ ປະເພດ 1 ( ຊີ້ນກ້ອນ ແລະ ດູກຂ້າງ ) ສູງສຸດບໍ່ເກີນ 36 ພັນກີີບຕໍ່ກິໂລ.
ລາຄາຊີ້ນໝູ ປະເພດ 2 ( ສາມຊັ້ນ, ຊີ້ນຕິດມັນ ) ສູງສຸດບໍ່ເກີນ 34 ພັນກີບຕໍ່ກິໂລ.ລາຄາຊີ້ນງົວ – ຄວາຍ ປະເພດ 1 ສູງສຸດບໍ່ເກີນ 75 ພັນກີບຕໍ່ກິໂລ, ລາຄາຊີ້ນງົວ – ຄວາຍ ປະເພດ 2 ສູງສຸດບໍ່ເກີນ 65 ພັນກີບຕໍ່ກິໂລ.ປານິນກະຊັງ ສູງສຸດບໍ່ເກີນ 20 ພັນກີບຕໍ່ກິໂລ.

ເວລາພະນັກງານລົງກວດກາຕົວຈິງຫາກພົບເຫັນຫົວໜ່ວຍທຸລະກິດ, ຊາວຄ້າຂາຍທີ່ລະເມີດລະບຽບການ ແລະ ແຈ້ງການສະບັບນີ້ ຈະໃຊ້ມາດຕະການສຶກສາອົບຮົມ, ປັບໃໝ ຫຼື ຢຶດສິນຄ້າກໍລະນີໜັກ – ເບົາ.ມອບໃຫ້ຂະແໜງການຄ້າພາຍໃນ, ຫ້ອງການອຸດສາຫະກຳ ແລະ ການຄ້າ 9 ເມືອງ, ຄະນະຈັດສັນຕະຫຼາດທຸກຕະຫຼາດເອົາໃຈໃສ່ຕິດຕາມກວດກາລາຄາສິນຄ້າທີ່ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນ ໂດຍສະເພາະແມ່ນສິນຄ້າທີ່ລັດຖະບານຄວບຄຸມ ແລະ ຄຸ້ມຄອງບໍ່ໃຫ້ມີປາກົດການສິນຄ້າຂາດຕະຫຼາດ, ການສວຍໂອກາດກັກຕຸນສິນຄ້າ ເພື່ອປັ່ນປ່ວນລາຄາໃນໄລຍະປີໃໝ່ລາວຢ່າງເດັດຂາດ.

ທຸກພາກສ່ວນຈົ່ງຮັບຮູ້ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.
[ ຂ່າວ: ພຸດຕີ້ ]

LEAVE A REPLY

Please enter your comment!
Please enter your name here