22 C
Vientiane
ວັນອັງຄານ, ເດືອນມັງກອນ 25, 2022

ຣີວິວ ມື້ດຽວກະທ່ຽວໄດ້ ນະຄອນຫລວງວຽງຈັນ – ຫລວງພະບາງ ກັບງົບປະມານ 500.000 ກ່ວາກີບ

ມື້ດຽວກະທ່ຽວໄດ້ ” ນະຄອນຫລວງວຽງຈັນ – ຫລວງພະບາງ ” ກັບງົບປະມານທີ່ໃຊ້ ” ຫ້າແສນກ່ວາກີບ”.

ນີ້ເປັນທິບແລກໃນຊີວິດທີ່ໄດ້ລອງໃຊ້ບໍລິການລົດໄຟຟ້າ ລາວ-ຈີນ ແລະ ເປັນການມາຫລວງພະບາງຄັ້ງແລກໃນຊີວິດເຊັ່ນກັນ, ເຊິ່ງທິບນີ້ຂ້ອຍໄດ້ຕັດສິນໃຈລ່ວງໜ້າພຽງ 1

ຄືນ ກ່ອນອອກໄປຕໍ່ຄິວຊື້ປີ້ລົດໄຟ ແລະ ກໍໄດ້ປີ້ຖ້ຽວເຊົ້າຂອງມື້ຕໍ່ມາ ,ການເດີນທາງຄັ້ງນີ້ຂ້ອຍໄດ້ເລືອກເດີນທາງຄົນດຽວ ທ່ຽວຄົນດຽວ ( ຍ້ານໝູ່ໃຈບໍ່ເອົານໍາ 55 ) ເປົ້້າໝາຍແມ່ນໄປກັບເພາະຂ້ອຍບໍ່ຄ່ອຍມີເວລາຫຼາຍມື້ທີ່ຈະທ່ຽວ ສວ່ນແຜນໄປໃສແນ່ຮອດບໍ່ໄດ້ຄິດ ຖ້າຄິດເອົາຕອນທີ່ຮອດ 555 ແລະ ນີ້ຈຶ່ງເປັນທີ່ມາຂອງທິບນີ້.

ການຊື້ປີ້ລົດໄຟ: ຂ້ອຍເລືອກຊື້ປີ້ ຂາໄປ-ຂາກັບ ໄວ້ເລີຍເພື່ອຄວາມສະດວກຕອນຂາກັບ.ຂ້ອຍເລືອກປີ້ປະເພດລົດ EMU ຊັ້ນສອງເພື່ອຄວາມປະຍັດ ເພາະຈັ່ງໃດ ຊັ້ນໜຶ່ງຫຼື ຊັ້ນສອງ ກໍຮອດພ້ອມກັນ ຕ່າງກັນແຕ່ເບາະນັ່ງຊື່ໆ.

ຂ້ອຍເລືອກຊື້ປີ້ຖ້ຽວເຊົ້າເວລາ 08:00 ໂມງເຊົ້າ ຈາກນະຄອນຫລວງວຽງຈັນ ໄປລົງທີ່ສະຖານນີ ຫລວງພະບາງ ຮອດເວລາ 09:56 ເຊັ້ານາທີ .ສວ່ນຂາກັບຂ້ອຍເລືອກຊື້ຖ້ຽວ 18:16 ໂມງແລງ ຈາກຫລວງພະບາງ ໄປລົງທີ່ສະຖານນີ ນະຄອນຫລວງວຽງຈັນ ຮອດເວລາ 20:10 ເຊັ້ານາທີ.

( ເຊິ່ງທັງສອງຖ້ຽວແມ່ນມື້ດຽວກັນ ເພື່ອໄປຕອນເຊົ້າ ແລ້ວຕອນແລງກັບ 😁 )( ແນະນໍາເຂົ້າມາຊື້ລ່ວງໜ້າ ຊ້າສຸດໜຶ່ງມື້ ເພື່ອໃຫ້ໄດ້ຖ່ຽວທີ່ເຮົາຕ້ອງການ )

( ຊື້ປີ້ໄດ້ທີສະຖານນີ້ເລີຍ ຍັງບໍ່ທັນມີລະບົບຈອງເທື່ອ ເວລາເພິ່ນເປີດຂາຍປີ້ແມ່ນ ຊ້ວງເຊົ້າ 07:00-10:00 ; ຊ້ວງບ່າຍ 14:00-16:30 ; ຊ່ວງແລງ 20:00-20:40 ແລະຕ້ອງມີບັດປະຈໍາໂຕ ແລະ ບັດຂຽວສັກວັກຊີນ ຄົບສອງເຂັມນໍາເດິ້ )

ການຂຶ້ນລົດໄຟ:ເຂົ້າແຈ້ງປີ້ລ່ວງໜ້າໜຶ່ງຊົວໂມງ.ເພີ່ນກວດປີ້ລົດ , ບັດປະຈໍາໂຕ ແລະ ບັດຂຽວສັກວັກຊີນ ຄົບສອງເຂັມ.ເພິ່ນຈໍາກັດນໍ້າໜັກເຄື່ອງ 20 ກິໂລ. ມີການສະແກນກວດຄົນ ແລະ ເຄື່ອງຢ່າງລະອຽດເພື່ອຄວາມປອດໄພ.

ການເຂົ້ານັ່ງໃນລົດໄຟ ແມ່ນໃຫ້ນັ່ງຕາມປີ້ ວ່າຢູ່ຕູ້ໃດ ແຖວໃດ ຕັ່ງໃດ.ເພີ່ນບໍ່ມີບໍລິການຂາຍນໍ້າ ແລະ ອາຫານໃນລົດໄຟ ແນະນໍາຖືຕິດກະເປົາໄປນໍາແນ່ດີສຸດ.

ການເລາະທ່ຽວ:ຫລັງຈາກລົງສະຖານນີ້ ຈະມີຄິວລົດຕູ້ ລົດສອງແຖວໄວ້ບໍລິການ ຖ້າແມ່ນຂອງຄິວທີ່ເຂົ້າລະບົບຈະມີລາຄາມາດຕະຖານທີ່ຄົນລະ ຊາວຫ້າ ພັນກີບ ເພື່ອໄປສົ່ງເຂົ້າໃນຕົວເມືອງຫລວງພະບາງ.ໃນການເລາະທ່ຽວ ຂ້ອຍຄິດທີ່ຈະເຊົ່າລົດຈັກເພື່ອໃຊ້ເລາະ ແລະ ເພື່ອຄວາມໄວໃນການໄປຫລາຍສະຖານທີ່.

ຄ່າໃຊ້ຈ່າຍ:ຄ່າປີ້ລົດໄຟຂາໄປແມ່ນ 198,000 ກີບ ແລະ ຂາກັບແມ່ນ 198,000 ກີບ ລວມໆປະມານສີ່ແສນ ທອນສອງພັນ.ຄ່າລົດຕູ້ມາຈາກສະຖານນີຫລວງພະບາງ ມາສົ່ງໃນເມືອງ 25,000 ກີບ.

ຄ່າເຊົ່າລົດຈັກປະມານ 50,000 – 70,000 ( ດີທີ່ມີໝູ່ຢູ່ຫັ້ນໃຫ້ຍືມລົດຈັກ ເລີຍເສຍແຕ່ຄ່ານໍ້າມັນ 28,000 ກີບ 😅 )ຄ່ານໍ້າ ຄ່າເຂົ້າໜົມ ຄ່າເຂົ້າຊອຍຕອນສວຍ ລວມໆປະມານ 50,000 ກີບ.ຄ່າເຂົ້ານໍ້າຕົກຕາດກວາງຊີ 10,000 ກີບ + ຄ່າຟາກລົດຈັກ 2000 ກີບ.ລວມຄ່າໃຊ້ຈ່າຍທັງໝົດປະມານ ຫ້າແສນປາຍນິດໆ ຖືວ່າບໍ່ໜັກ 555

ສິ່ງທີໄດ້:ໄດ້ລອງທ່ຽວຄົນດຽວ ຢາກແວ່ໃສກະບໍ່ມີຄົນຂັດ.ໄດ້ຂີ່ລົດໄຟງາມໆ ສະອາດ.ວິວສອງຂ້າງທາງທີ່ງາມໆ ( ຄວາມລົດແລ່ນໄວຖ່າຍຮູບນໍາບໍ່ທັນ 555 ) ຍົກເວັ້ນຕອນຄໍ່າຂາກັບ . . . ມືດ.ໄດ້ຮັບປະສົບການ ຄວາມເໝື່ອຍ, ໄດ້ມິດຕະພາບ , ໄດ້ຮັບນໍ້າໃຈດີໆລະຫວ່າງທາງ.

ສະຫລຸບ: ເຈົ້າຕ້ອງລອງເອງຈັກຄັ້ງ ແລ້ວຈະຮູ້ຄໍາຕອບ ດ້ວຍຕົວເຈົ້າເອງ 😁 ປລ. ມີວີດີໂອທິບນີ້ນໍາກໍາລັງຮຽບຮຽງແລ້ວຕັດຕໍ່ຢູ່ , ຖ່າຍເອງຕັດເອງຄົນດຽວກະຈະດົນແນ່ ຖ້າເບີ່ງຖ້າຊົມນໍາກັນເດິ້ ແຮ່ໆ.ລາວທ່ຽວລາວ ລົດໄຟລາວຈີນ ທ່ຽວຄົນດຽວ

ທີ່ມາ:Nou A’Big Boss

Latest news

- Advertisement -spot_img

ປ ະກ າ ດຈັ ບ

Related news

- Advertisement -spot_img

LEAVE A REPLY

Please enter your comment!
Please enter your name here