17.3 C
Vientiane
ວັນພຸດ, ເດືອນທັນວາ 1, 2021

ສາທາລະນະສຸກເມືອງທຸລະຄົມ ເລັ່ງສັກ ວັກຊິນ ແບບຕະລຸມບອນ ໃຫ້ກຸ່ມເປົ້າໝາຍ

ຂປລ. ຕາມການລາຍງານຂອງ ທ່ານ ດິ້ງ ເລືອງໄຊ ຫົວໜ້າຫ້ອງການສາທາລະ ນະສຸກ, ຄະນະສະເພາະກິດເມືອງທຸລະຄົມ ໃຫ້ຮູ້ວ່າ ມາເຖິງວັນທີ 17 ພະຈິກ 2021 ທົ່ວເມືອງທຸລະຄົມ ມີຜູ້ໄດ້ຮັບການສັກວັກຊິນແລ້ວ 29.980 ຄົນ ໃນຈໍານວນພົນລະເມືອງທັງໝົດ 58.390 ຄົນ, ສະເລ່ຍເຂັມທີ 1 ໄດ້ 51%, ເຂັມທີ 2 ໄດ້ 42% ແລະ ຍັງສືບຕໍ່ເລັງສັກວັກຊິນ ແບບຕະລຸມບອນ ໃຫ້ແກ່ກົ່ມເປົ້າໝາຍ ເພື່ອໃຫ້ບັນລຸຕາມຄາດໝາຍທີ່ຄະນະສະເພາະກິດແຕ່ລະຂັ້ນ ແລະ ຂະແໜງສາທາລະນະສຸກວາງອອກ ໂດຍສະເພາະຄໍາສັ່ງຂອງທ່ານນາຍົກລັດຖະມົນຕີ ເລກທີ 24/ນຍ ລົງວັນທີ 10 ພະຈິກ 2021 ວາງອອກນັ້ນ ຕ້ອງເລັ່ງສັກວັກຊິນ ໃຫ້ກວມເຄິ່ງໜຶ່ງຂອງພົນລະເມືອງ ແນໃສ່ຮັກສາສຸຂະພາບໃຫ້ປະຊາຊົນບັນດາເຜົ່າທຸກຊັ້ນຄົນ ມີພູມຄຸ້ມກັນຮ່າງກາຍທີ່ແຂງແຮງ, ຫລຸດຜ່ອນຄວາມສ່ຽງໃນການຕິດເຊື້ອພະຍາດໂຄວິດ-19 ຫລື ຖ້າຫາກຕິດເຊື້ອ ກໍຈະບໍ່ມີອັນຕະລາຍຮ້າຍແຮງ ແລະ ປິ່ນປົວຫາຍດີໄວ.

ການສັກວັກຊິນ ຢູ່ເມືອງທຸລະຄົມ ໃນໄລຍະຜ່ານມາ ກໍຄື ກັບເມືອງອື່ນໆ ໂດຍຖືເປັນຫລັກການສໍາຄັນຕົ້ນຕໍ ໃນການຕ້ານການລະບາດຂອງພະຍາດໂຄວິດ-19 ທີ່ຂະແໜງ ສາທາລະນະສຸກວາງອອກ, ພາຍຫລັງໄດ້ຮັບການຈັດແບ່ງວັກຊິນໃນແຕ່ລະຊຸດຈາກຂັ້ນແຂວງ ກໍສ້າງແຜນຈັດແບ່ງບໍລິການລົງສັກໃຫ້ພໍ່ແມ່ປະຊາຊົນ ໃນແຕ່ລະຈຸດ ເພື່ອເຮັດໃຫ້ວຽກງານມີຄວາມວ່ອງໄວ ແລະ ທັນກັບສະພາບການ ໂດຍການປະສານສົມທົບ ແລະ ອໍານວຍຄວາມສະດວກຂອງຄະນະກຸ່ມບ້ານ, ອົງການປົກຄອງບ້ານ ແລະ ພາກສ່ວນກ່ຽວຂ້ອງ ຈຶ່ງເຮັດໃຫ້ຂະບວນການສັກວັກຊິນຢູ່ພາຍໃນເມືອງດໍາເນີນໄປຕາມຈຸດປະສົງ ແລະ ມີຜົນສໍາເລັດໃນລະດັບທີ່ດີ.

ຜ່ານການເຄື່ອນໄຫວວຽກງານດັ່ງກ່າວ ເຫັນວ່າຍັງມີຂໍ້ຫຍຸ້ງຍາກຈໍານວນໜຶ່ງທີ່ເປັນອຸປະສັກ ເຮັດໃຫ້ບາງວັນບໍ່ສາມາດສັກໄດ້ຕາມແຜນການ ໂດຍສະເພາະເວລາລົງໄປສັກໃຫ້ປະຊາຊົນເຂດບ້ານຫ່າງໄກສອກຫລີກ ບາງຄົນບໍ່ເຂົ້າໃຈຢ່າງລະອຽດ ເພາະຄິດວ່າຖ້າສັກວັກຊິນແລ້ວອາດມີຜົນກະທົບບໍ່ດີຕໍ່ສຸຂະພາບ, ບາງຄົນກໍຄາໄປເຮັດການຜະລິດຫາລ້ຽງຊີບ ແລະ ອື່ນໆ. ແຕ່ເຖິງຢ່າງໃດກໍຕາມ ຄະນະນໍາຂອງຫ້ອງການສາທາລະນະສຸກເມືອງຮ່ວມກັບພະນັກງານແພດໝໍ ຈະສືບຕໍ່ຈັດຕັ້ງປະຕິບັດແຜນການສັກວັກຊິນ ປ້ອງກັນເຊື້ອພະຍາດໂຄວິດ-19 ໃຫ້ສໍາເລັດຕາມແຜນການ ແລະ ຄາດໝາຍທີ່ວາງໄວ້.
ຂ່າວ: ຫ້ອງການ ຖວທ ເມືອງ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here