26 C
Vientiane
ວັນອາທິດ, ເດືອນພະຈິກ 28, 2021

ຄຳມ່ວນ ສືບຕໍ່ປິດການເດີນທາງເຂົ້າ-ອອກແຂວງອີກ 14 ວັນ

ຄຳມ່ວນ ສືບຕໍ່ປິດການເດີນທາງເຂົ້າ-ອອກແຂວງອີກ 14 ວັນ ຮອດ 8 ພະຈິກໃນວັນທີ 25 ຕຸລາ 2021 ເຈົ້າແຂວງຄຳມ່ວນ ໄດ້ອອກຄຳສັ່ງ ວ່າດ້ວຍການສືບຕໍ່ເພີ່ມທະວີຄວາມເຂັ້ມງວດ ໃນການຈັດຕັ້ງປະຕິບັດມາດຕະການຄວບຄຸມໂຄວິດ-19 ພາຍໃນແຂວງຂອງຕົນ ໂດຍໄດ້ອອກ 16 ມາດຕະການເພີ່ມທະວີສືບຕໍ່ປະຕິບັດຄື:1. ສືບຕໍ່ປິດການເດີນທາງເຂົ້າ-ອອກ ແຂວງຄຳມ່ວນ ເປັນເວລາ 14 ວັນ ນັບແຕ່ວັນທີ 26 ຕຸລາ ຫາ ວັນທີ 8 ພະຈິກ 2021. ຫ້າມບຸກຄົນ, ນິຕິບຸກຄົນ ຈາກແຂວງອື່ນທີ່ມີການຕິດເຊື້ອຢູ່ຂຸມຊົນ ເດີນທາງເຂົ້າມາແຂວງຄໍາມ່ວນໂດຍເດັດຂາດ; ຖ້າມີຄວາມຈໍາເປັນຕ້ອງໄດ້ຮັບອະນຸຍາດຈາກຄະນະສະເພາະກິດແຂວງຄຳມ່ວນ, ມີໃບຢັ້ງຢືນການສັກວັກຊິນຄົບໂດສ໌, ໃບຢັ້ງຢືນກວດຫາເຊື້ອພະຍາດໂຄວິດ-19 ທີ່ມີກໍານົດບໍ່ເກີນ 72 ຊົ່ວໂມງ ແລະ ໜັງສືຢັ້ງຢືນຈາກຄະນະສະເພາະກິດຕົ້ນທາງ.

2. ຫ້າມບຸກຄົນ, ນິຕິບຸກຄົນ ພາຍໃນແຂວງຄໍາມ່ວນເດີນທາງໄປຕ່າງແຂວງ ຍົກເວັ້ນຜູ້ທີ່ໄດ້ຮັບການເເຕ່ງຕັ້ງມອບໝາຍໄປເຮັດວຽກທາງລັດຖະການ ຫຼື ຜູ້ທີ່ໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ.3. ຫ້າມລົດຂົນສົ່ງສິນຄ້າ, ລົດໂດຍສານ, ລົດສ່ວນບຸກຄົນ ທີ່ເດີນທາງຜ່ານແຂວງຄໍາມ່ວນ ໄປແຂວງອື່ນຈອດເອົາຄົນ ແລະ ສິນຄ້າຂຶ້ນ-ລົງ ໂດຍເດັດຂາດ. ຖ້າມີການລະເມີດໃຫ້ເຈົ້າໜ້າທີ່ ທີ່ກ່ຽວຂ້ອງປະຕິບັດມາດຕະການທາງກົດໝາຍຢ່າງເຂັ້ມງວດ ໂດຍບໍ່ມີກໍລະນີຍົກເວັ້ນໃດໆ.

4. ຫ້າມບຸກຄົນໃນຄອບຄົວ, ຍາດພີ່ນ້ອງ, ໝູ່ເພື່ອນ ທີ່ໄດ້ສໍາພັດໃກ້ຊິດກັບຜູ້ຕິດເຊື້ອໂຄວິດ-19 (C1) ອອກຈາກເຮືອນຂອງຕົນເອງຢ່າງເດັດຂາດ, ມອບໃຫ້ອໍານາດການປົກຄອງບ້ານ, ເຈົ້າໜ້າທີ່ກ່ຽວຂ້ອງພາຍໃນບ້ານແຈ້ງໃຫ້ຄະນະສະເພາະກິດຂັ້ນເມືອງ ນໍາເອົາບຸກຄົນດັ່ງກ່າວ ເຂົ້າມາກັກກັນຕົວຢູ່ສູນຂອງແຂວງໂດຍໄວ ເພື່ອປ້ອງກັນຄວາມສ່ຽງ ແລະ ຈໍາກັດວົງຈອນການແຜ່ເຊື້ອພະຍາດດັ່ງກ່າວບໍ່ໃຫ້ຂະຫຍາຍອອກເປັນວົງກວ້າງ. ສໍາລັບຜູ້ສຳພັດໃກ້ຊິດກັບ C1 ແມ່ນໃຫ້ກັກກັນຕົນເອງຢູ່ເຮືອນເພື່ອຕິດຕາມອາການ, ມອບໃຫ້ອໍານາດການປົກຄອງບ້ານຊ່ວຍຈັດຊື້ເຄື່ອງອຸປະໂພກ-ບໍລິໂພກ ໃຫ້ແກ່ເຂົາເຈົ້າ.ຜູ້ຕິດເຊື້ອພາຍຫຼັງທີ່ໄດ້ຮັບການປິ່ນປົວຫາຍດີແລ້ວ ແມ່ນໃຫ້ສືບຕໍ່ກັກກັນຕົນເອງຢູ່ເຮືອນເພີ່ມອີກໃຫ້ຄົບ 14 ວັນ.ຜູ້ທີ່ໄດ້ກັກກັນຢູ່ສູນຂອງແຂວງຄົບ 28 ວັນແລ້ວ, ຜ່ານການກວດ ບໍ່ມີການຕິດເຊື້ອພະຍາດຈະໄດ້ສົ່ງໄປກັກກັນຢູ່ສູນຂອງເມືອງຕື່ມອີກ 07 ວັນ, ຖ້າບໍ່ມີອາການຜິດປົກກະຕິຈຶ່ງອະນຸຍາດໃຫ້ໃຊ້ຊີວິດອອກສູ່ສັງຄົມ.

5. ສຳລັບໜ່ວຍ ຫຼື ຄຸ້ມບ້ານ ທີ່ມີຜູ້ຕິດເຊື້ອ ແລະ ຄອບຄົວທີ່ໃກ້ຄຽງກັບຄອບຄົວຜູ້ຕິດເຊື້ອ ໃຫ້ປິດທຸກກິດຈະການ ແລະ ຫ້າງຮ້ານຕ່າງໆພາຍໃນໜ່ວຍ ຫຼື ຄຸ້ມບ້ານ ຍົກເວັ້ນ: ຫ້ອງການບ້ານ, ປກສກຸ່ມບ້ານ, ສຸກສາລາ, ຮ້ານຂາຍຢາ, ຫ້າມບຸກຄົນອອກຈາກຂອບເຂດໜ່ວຍ ຫຼື ຄຸ້ມບ້ານດັ່ງກ່າວ.6. ຫ້າມຈັດໂຮມຊຸມນຸມ, ກິດຈະກໍາທາງສາສະໜາ, ງານບຸນປະເພນີ, ງານດອງ, ງານລ້ຽງ ສ້າງສັນ ແລະ ຊຸມແຊວຕ່າງໆ ຢ່າງເດັດຂາດ; ກໍລະນີຈໍາເປັນ ເຊັ່ນ: ການຄົບງັນ ງານສົບ, ສົ່ງສະການ ທີ່ບໍ່ແມ່ນຜູ້ທີ່ເສຍຊີວິດຈາກພະຍາດໂຄວິດ-19 ແມ່ນໃຫ້ເຮັດແບບກະທັດຮັດ.

7. ໃຫ້ສືບຕໍ່ປີດໂຮງແຮມ, ບ້ານພັກ, ຕະຫຼາດກາງຄືນ, ຮ້ານກິນດື່ມ, ຮ້ານປີ້ງແກ້ມ, ຮ້ານບັນເທິງ, ສວນນໍ້າ, ຮ້ານຄະຣາໂອເກະ, ຮ້ານອິນເຕີເນັດ, ຮ້ານບໍລິການອົບນວດ, ຮ້ານສະນຸກເກີ້, ສັງວຽນຕີໄກ່, ຫ້ອງກວດພະຍາດເອກະຊົນ, ຄິວລົດໂດຍສານພາຍໃນແຂວງ-ຕ່າງແຂວງ ແລະ ສະຖານທີ່ແຫຼ່ງທ່ອງທ່ຽວຕ່າງໆ.8. ໃຫ້ບັນດາບໍລິສັດ, ວິສາຫະກິດ, ໂຮງຈັກ, ໂຮງງານ ສືບຕໍ່ເພີ່ມທະວີການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ໃນສະຖານທີ່ຂອງຕົນ.9. ສືບຕໍ່ປີດໂຮງຮຽນລ້ຽງເດັກ, ໂຮງຮຽນອະນຸບານໃນທົ່ວແຂວງ, ສະເພາະເມືອງທ່າແຂກໃຫ້ສືບຕໍ່ປິດການຮຽນ-ການສອນ ທຸກຊັ້ນ, ທຸກສາຍ ແລະ ສາຂາວິຊາຊີບຕ່າງໆແບບເຊິ່ງໜ້າ (ໃນຫ້ອງຮຽນ). ແຕ່ໃຫ້ຈັດຕັ້ງການຮຽນ-ການສອນຢູ່ເຮືອນ ໂດຍຜ່ານລະບົບອິນເຕີເນັດ.

10. ຫ້າມຜູ້ປະກອບການ, ພໍ່ຄ້າ, ແມ່ຄ້າ ຂາຍເຄື່ອງດື່ມປະເພດມືນເມົາ ແລະ ຫ້າມສວຍໂອກາດກັກຕຸນ, ຂຶ້ນລາຄາສິນຄ້າ ທຸກປະເພດ ເກີນລາຄາປົກກະຕິ.
11. ຫ້າມບຸກຄົນ, ນິຕິບຸກຄົນໂຄສະນາ, ເຜີຍແຜ່ ແລະ ສົ່ງຕໍ່ຂໍ້ມູນຂ່າວສານ ທີ່ບໍ່ມີມູນຄວາມຈິງ ກ່ຽວກັບການແຜ່ລະບາດຂອງພະຍາດໂຄວິດ-19 ໃນທຸກຮູບແບບ.
12. ໃຫ້ພະແນກສາທາລະນະສຸກແຂວງ ຮີບຮ້ອນສືບຕໍ່ຕິດຕາມເອົາຜູ້ສໍາພັດໃກ້ຊິດກັບຜູ້ຕິດເຊື້ອ ມາເກັບຕົວຢ່າງເພື່ອກວດຫາເຊື້ອພະຍາດ ແລະ ຈໍາກັດບໍລິເວນໂດຍໄວ, ພ້ອມດຽວກັນນັ້ນ ກໍ່ໃຫ້ມີການຖະແຫຼງຂ່າວປະຈໍາວັນຜ່ານສື່ຕ່າງໆ ເພື່ອແຈ້ງຂໍ້ມູນຂ່າວສານທີ່ຖືກຕ້ອງໃຫ້ປະຊາຊົນໄດ້ຮັບຊາບ.13. ໃຫ້ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ສືບຕໍ່ເພີ່ມທະວີການໂຄສະນາ, ປະຊາສໍາພັນ ບັນດາມາດຕະການຕ່າງໆໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ເພື່ອໃຫ້ປະຊາຊົນໄດ້ຮັບຮູ້, ເຂົ້າໃຈ ແລະ ເປັນເຈົ້າການໃນການຈັດຕັ້ງປະຕິບັດມາດຕະການຕ່າງໆຢ່າງຖືກຕ້ອງ.

14. ໃຫ້ປິດການສັນຈອນໄປ-ມາ ພາຍໃນເທດສະບານເມືອງທ່າແຂກ ແລະ ເທດສະບານເມືອງອື່ນໆນັບແຕ່ເວລາ 22:00 ໂມງ ຂອງແຕ່ລະວັນ ຈົນເຖິງເວລາ 05:00 ໂມງຂອງວັນຖັດໄປ. 15. ໃຫ້ກອງບັນຊາການ ປກສ ແຂວງ ສົມທົບກັບ ກອງບັນຊາການ ປກຊ ແຂວງ ແລະ ເມືອງຕັ້ງຈຸດກວດກາເຂົ້າ-ອອກແຂວງ ແລະ ສືບຕໍ່ຈັດຕັ້ງໜ່ວຍກວດກາລາດຕະເວນເຄື່ອນທີ່ຕະຫຼອດ 24ຊົ່ວໂມງ.16. ໃຫ້ຫົວໜ້າດ່ານສາກົນຂົວມິດຕະພາບ 3 ແລະ ດ່ານສາກົນຈາເວົ້າ ເພີ່ມທະວີຊີ້ນໍາໜ່ວຍງານກ່ຽວຂ້ອງ ຕິດຕາມ, ການກວດ ໂຊເຟີລົດຂົນສົ່ງສິນຄ້າ ແລະ ຜູ້ຕິດຕາມ ໃຫ້ປະຕິບັດຕາມແຈ້ງການຂອງຄະນະສະເພາະກິດຢ່າງເຂັ້ມງວດ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here