26 C
Vientiane
ວັນອາທິດ, ເດືອນພະຈິກ 28, 2021

ຮອງປະທານປະເທດ ແຫ່ງ ສປປ ລາວ ເຂົ້າຮ່ວມກອງປະຊຸມ ເວທີປຶກສາຫາລື “ແມ່ຍິງ ເອີຣົບ-ອາຊີ” ຄັ້ງທີ 3

ໃນຕອນຄໍ່າຂອງວັນທີ 14 ຕຸລາ 2021 ທີ່ ສໍານັກງານປະທານປະເທດ, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນເຂົ້າຮ່ວມ ແລະ ກ່າວບົດປາໄສໃນຮູບແບບທາງໄກ ໃນກອງປະຊຸມເວທີປຶກສາຫາລື “ແມ່ຍິງ ເອີຣົບ-ອາຊີ”ຄັ້ງທີ 3 ພາຍໃຕ້ຫົວຂໍ້: “ແມ່ຍິງ ກັບພາລະກິດໂລກໃນຄວາມເປັນຈິງອັນໃໝ່”, ໂດຍການເປັນປະທານຂອງ ທ່ານ ນາງ ວາເລນຕີນາ ມັດວຽນໂກ ປະທານສະພາສູງ ແຫ່ງ ສະຫະພັນ ຣັດເຊຍ, ເຊິ່ງຈັດຂຶ້ນ ໃນວັນທີ 13-15 ຕຸລາ 2021 ທີ່ ນະຄອນຫລວງ ຊັງປີເຕີສະເບີກ ສ.ຣັດເຊຍ.

ໃນໂອກາດດັ່ງກ່າວ, ທ່ານຮອງປະທານປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການກະກຽມ ແລະ ດຳເນີນກອງປະຊຸມທີ່ມີຄວາມໝາຍສຳຄັນໃນຄັ້ງນີ້, ໃນທ່າມກາງປະຊາຊາດໃນໂລກ ທີ່ພວມປະເຊີນໜ້າກັບການແຜ່ລະບາດຂອງພະຍາດໂຄວິດ-19 ເຊິ່ງສົ່ງຜົນສະທ້ອນໂດຍກົງຕໍ່ການພັດທະນາເສດຖະກິດ-ສັງຄົມ ຂອງບັນດາປະເທດໃນໂລກ. ພ້ອມນັ້ນ, ທ່ານກໍຍັງໄດ້ຍົກໃຫ້ເຫັນ ກ່ຽວກັບ “ການປ່ຽນແປງທາງສັງຄົມ 2030 ແລະ ພາລະກິດຂອງແມ່ຍິງ ເພື່ອບັນລຸການພັດທະນາແບບຍືນຍົງກວມລວມ”, ເຊິ່ງສະພາບການດັ່ງກ່າວ ລັດຖະບານລາວ ໄດ້ໃຫ້ຄວາມສໍາຄັນຕໍ່ການພັດ ທະນາແບບຍືນຍົງ, ກວມລວມ ແລະ ຖືນະໂຍບາຍດັ່ງກ່າວເປັນເປົ້າໝາຍ ເພື່ອນໍາເອົາປະເທດຊາດຫລຸດພົ້ນອອກຈາກສະພາວະດ້ອຍພັດທະນາ. ຜ່ານການຈັດຕັ້ງປະຕິບັດບັນດາແຜນຍຸດທະສາດດັ່ງ ກ່າວ, ລັດຖະບານໄດ້ເອົາໃຈໃສ່ໃນການປະກາດໃຊ້ຫລາຍນິຕິກໍາ ທີ່ເປັນເຄື່ອງມືຄຸ້ມຄອງລັດ, ຮັບ ປະກັນການສົ່ງເສີມ, ປົກປ້ອງສິດ ແລະ ຜົນປະໂຫຍດຂອງແມ່ຍິງ ແລະ ເດັກນ້ອຍ. ຄຽງຄູ່ກັນນັ້ນ, ລັດຖະບານ ກໍ່ໄດ້ເອົາໃຈໃສ່ຈັດຕັ້ງປະຕິບັດບັນດາເປົ້າໝາຍການພັດທະນາແບບຍືນຍົງ (SDG) ທີ່ອົງການສະຫະປະຊາຊາດວາງອອກ ແລະ ຜ່ານການປະເມີນຜົນຄັ້ງທີ 2 ໃນຕົ້ນປີ 2021 ຂອງອົງການ

ສະຫະປະຊາຊາດ ກ່ຽວກັບການຈັດຕັ້ງປະຕິບັດ 3 ເງື່ອນໄຂ ເພື່ອຫລຸດພົ້ນອອກຈາກ ສະຖາ ນະພາບປະເທດດ້ອຍພັດທະນາ (LDC), ສປປ ລາວ ເປັນໜຶ່ງໃນເປົ້າໝາຍທີ່ສາມາດປະຕິບັດໄດ້ທັງ 3 ຂອງເງື່ອນໄຂ ຄື: ດັດສະນີລາຍໄດ້ສະເລ່ຍແຫ່ງຊາດ (GNI), ດັດສະນີຊັບສິນມະນຸດ (HAI) ແລະ ດັດສະນີຄວາມບອບບາງທາງດ້ານເສດຖະກິດ (EVI), ແຕ່ຍ້ອນຜົນກະທົບຂອງການແຜ່ລະ ບາດຂອງພະຍາດໂຄວິດ-19 ອາດຈະໃຊ້ເວລາອີກໄລຍະໜຶ່ງ ເພື່ອໃຫ້ ສປປ ລາວ ສາມາດບັນລຸເປົ້າໝາຍດັ່ງກ່າວ ຢ່າງມີຜົນສໍາເລັດ, ຊຶ່ງ 3 ເງື່ອນໄຂດັ່ງກ່າວ ລ້ວນແຕ່ໄດ້ເຊື່ອມສານເຂົ້າໃນນະໂຍບາຍຄວາມສະເໝີພາບຍິງ-ຊາຍ ຂອງລັດຖະບານ ແລະ ລັດຖະບານ ກໍ່ໄດ້ເອົາໃຈໃສ່ຊີ້ນໍາ-ນໍາພາ ຈັດຕັ້ງປະຕິບັດມີຜົນສໍາເລັດເປັນກ້າວໆມາ ເຮັດໃຫ້ແມ່ຍິງສາມາດປະກອບສ່ວນເຫື່ອແຮງ, ສະຕິປັນຍາ, ຄວາມຮຸ້, ຄວາມສາມາດ ເຂົ້າໃນການພັດທະນາເສດຖະກິດ-ສັງຄົມ ໃນຫລາຍຂົງເຂດວຽກງານ ນັບມື້ນັບເພີ່ມຂຶ້ນ, ເຊິ່ງສະແດງອອກໃນຕົວເລກໃນອັດຕາສ່ວນແມ່ຍິງ ເຂົ້າຮ່ວມໃນອົງການນິຕິບັນຍັດ, ອົງ ການລັດຖະບານ ແລະ ອຳນາດການປົກຄອງຂັ້ນທ້ອງຖິ່ນ. ພິເສດ, ໃນປີ 2021 ສປປ ລາວ ໄດ້ຖືກຈັດຢູ່ໃນອັນດັບທີ 37 ຂອງໂລກ ແລະ ອັນດັບທີ 2 ຂອງອາຊຽນ ໃນດ້ານບົດບາດຂອງແມ່ຍິງໃນເວທີການເມືອງ.

ໃນການເຊື່ອມໂຍງສາກົນແມ່ຍິງ ຍັງມີສິ່ງທ້າທາຍ ເຊິ່ງຈະຕ້ອງໄດ້ຮ່ວມກັນເພື່ອແກ້ໄຂບັນຫາດັ່ງກ່າວເຊັ່ນ: ການໃຊ້ຄວາມຮູນແຮງໃນຄອບຄົວ, ສຸຂະພາບ, ການເຂົ້າເຖິງແຫລ່ງຂໍ້ມູນຂ່າວສານ, ການເຂົ້າເຖິງແຫລ່ງທຶນ, ການສົ່ງເສີມ MSME, ການຄ້າມະນຸດ ແລະ ອື່ນໆ ລວມທັງການແກ້ໄຂຜົນກະທົບຂອງລະເບີດຍັງບໍ່ທັນແຕກທີ່ສົງຄາມປະຖິ້ມໄວ້ ໃນຫລາຍທົດສະວັດ. ພ້ອມນັ້ນ, ທ່ານຮອງປະທານປະເທດ ຍັງໄດ້ສະແດງຄວາຂອບໃຈຕໍ່ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໃຫ້ການສະໜັບສະໜູນ ສປປ ລາວ ຕະຫລອດໄລຍະຜ່ານມາ. ພິເສດ ແມ່ນການຊ່ວຍເຫລືອທາງດ້ານວັດຖຸອຸປະກອນ ແລະ ວັກຊິນ ເພື່ອແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ແກ່ປະຊາຊົນລາວ, ພ້ອມທັງຊຸກຍູ້ໃຫ້ປະຊາຄົມໂລກ ສືບຕໍ່ໃຫ້ການຮ່ວມມືຊ່ວຍເຫລືອຊຶ່ງກັນ ແລະ ກັນ ເພື່ອເຮັດໃຫ້ໂລກມີສັນຕິພາບ, ສະຖຽນລະພາບ, ການຮ່ວມມືແບບຍືນຍົງຕາມທິດສີຂຽວ ເພື່ອຄວາມຈະເລີນຮຸ່ງເຮືອງ ແລະ ຢູ່ດີກິນດີຂອງປະຊາຊົນ.ກອງປະຊຸມເວທີປຶກສາຫາລືແມ່ຍິງ ເອີຣົບ-ອາຊີ ໃນຄັ້ງນີ້, ຖືເປັນໂອກາດອັນດີໃຫ້ແກ່ບັນດາຜູ້ນຳຍິງໃນພາກພື້ນ ໄດ້ແລກປ່ຽນຄຳຄິດຄຳເຫັນ ເພື່ອຊອກຫາຊ່ອງທາງໃນການຊຸກຍູ້, ເສີມຂະຫຍາຍການພົວພັນຮ່ວມມືເພື່ອການພັດທະນາ, ດ້ວຍຄວາມຮ່ວມແຮງຮ່ວມໃຈກັນ ເພື່ອໃຫ້ສາມາດບັນລຸເປົ້າໝາຍການພັດທະນາແບບຍືນຍົງຕາມວາລະ 2030 ໄປພ້ອມກັນ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here