28.8 C
Vientiane
ວັນພຸດ, ເດືອນຕຸລາ 20, 2021

ກ່ອນກັບພູມລຳເນົາ ໃຫ້ຟັງຄຳແນະນຳຈາກທິມງານໂຄສະນາປ້ອງກັນ ໂ ຄ ວ ິ ດ

ວັນທີ 12 ສິງຫາ 2021, ທິມງານໂຄສະນາປ້ອງກັນ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ 19 ຂອງແຂວງສະຫວັນນະເຂດທີ່ປະກອບມີ ອົງການແນວລາວສ້າງຊາດແຂວງ, ສາມອົງການຈັດຕັ້ງມະຫາຊົນ ,ຄະນະໂຄສະນາອົບຮົມແຂວງ ,ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວແຂວງ, ໄດ້ສືບຕໍ່ເຄື່ອນໄຫວໂຄສະນາເຜີຍແຜ່ວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ກໍ່ບັນດາແຮງງານທີ່ເຂົ້າສູນກັກກັນ ກ່ອນສົ່ງກັບພູມລຳເນົາ.


ທັງນີ້ກໍ່ເພື່ອໃຫ້ແຮງງານລາວທີ່ກັບມາຈາກປະເທດໃກ້ຄຽງ ທີ່ເຂົ້າສູນຈໍາກັດບໍລິເວນ ກ່ອນກັບພູມລໍາເນົາ, ທີ່ສູນ ມໍຕົ້ນ ຫົວເມືອງເໜືອ ແລະ ສູນມໍປາຍໂພນສະຫວັນ ໄດ້ເຂົ້າໃຈເຖິງການປະຕິບັດຕົນໃນການປ້ອງກັນຕົນເອງໃຫ້ຫ່າງຈາກໂຄວິດ-19 ທັງຫຼຸດຜ່ອນຄວາມສ່ຽງໃນການກະຈາຍເຊື້ອຫາກເຮົາເປັນຜູ້ຕິດເຊື້ອເອງ.


ການລົງໂຄສະນາຄັ້ງນີ້ນໍາພາຂະບວນໂດຍ ທ່ານ ນາງ ພາວັນ ບົວຫຼວງລາດ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ເຊິ່ງຄະນະໄດ້ຮຽກຮ້ອງໃຫ້ຊາວຜູ້ອອກແຮງງານທີ່ກັບມາຈາກປະເທດໃກ້ຄຽງ ໃຫ້ພ້ອມກັນປະຕິບັດມາດຕະການປ້ອງກັນພະຍາດໂຄວິດ ຢ່າງເຂັ້ມງວດ, ຖ້າບໍ່ມີການຕິດເຊື້ອພະຍາດ ໂຄວິດ-19 ເມື່ອຄົບກຳນົດ ກໍຖືກຈັດສົ່ງໄປຫາຄອບຄົວ, ຍາດພີ່ນ້ອງ ແລະ ສັງຄົມ, ເຊິ່ງທັງໝົດນັ້ນສະແດງເຖິງການປະຕິບັດນະໂຍບາຍຢ່າງຖືກຕ້ອງເປັນທຳຂອງພັກ-ລັດຖະບານ ແລະ ອົງການປົກຄອງທຸກຂັ້ນ ຕໍ່ພົນລະເມືອງລາວບັນດາເຜົ່າ.


ທ່ານຍັງໄດ້ຍົກໃຫ້ເຫັນອີກວ່າ: ຍາມໃດພັກ-ລັດຖະບານ ແມ່ນມີຄວາມເປັນຫວ່ງເປັນໄຍ ຕໍ່ກັບຊາວໜຸ່ມ-ໄວໜຸ່ມ ແລະ ຜູ້ອອກແຮງງານລາວບັນດາເຜົ່າ ທີ່ໄດ້ໄປເຄື່ອນໄຫວເຮັດວຽກຢູ່ຕ່າງປະເທດ, ເຖິງວ່າສິ່ງອໍານວຍຄວາມສະດວກໃນການຮອງຮັບດ້ານທີ່ພັກ, ການສະໜອງເຄື່ອງອຸປະໂພກ-ບໍລິໂພກ, ອາດຈະບໍ່ຫຼວງຫຼາຍ, ເນື່ອງຈາກງົບປະມານຂອງພວກເຮົາມີໜ້ອຍ, ກໍຢາກໃຫ້ເຫັນໃຈ, ພ້ອມກັນສູ້ຊົນໄປນໍາກັນ.

ພ້ອມຮຽກຮ້ອງໃຫ້ແຮງງານລາວໝົດທຸກຄົນ ຈົ່ງເຊີດຊູຈິດໃຈຮັກຊາດ, ຮັກບ້ານເກີດເມືອງນອນ ໂດຍໃຫ້ຖືເອົາໂອກາດນີ້ສະແດງຄວາມກະຕັນຍູຮູ້ບຸນຄຸນຕໍ່ບ້ານເກີດ, ດ້ວຍການຕັ້ງໜ້າພັດທະນາຕົນເອງໃຫ້ກາຍເປັນພົນລະເມືອງດີຂອງສັງຄົມ, ນໍາເອົາບົດຮຽນ-ອາຊີບ ທີ່ໄປອອກແຮງງານນັ້ນ ມາສືບຕໍ່ຜັນຂະຫຍາຍຢູ່ພູມລໍາເນົາຂອງຕົນ.


ພ້ອມໃຫ້ຂໍ້ມູນວ່າແຂວງສະຫວັນນະເຂດ ໄດ້ມີຄວາມຕ້ອງການສີມືແຮງງານ ຢູ່ຕາມໂຄງການລົງທຶນ, ຫົວໜ່ວຍແຮງງານຕ່າງໆ ເປັນຈໍານວນຫຼວງຫຼາຍ ຖ້າເຫັນວ່າຕົນເອງເໝາະສົມກັບເງື່ອນໄຂ, ກໍສາມາດໄປຂຶ້ນທະບຽນເຮັດວຽກນຳຫ້ອງການແຮງງານ ແລະ ສະຫວັດດີການສັງຄົມ ເພື່ອຈະໄດ້ມີການຈັດສັນ.


ສໍາລັບ ຕົວເລກແຮງງານທີ່ສູນ ມໍຕົ້ນ ຫົວເມືອງເໜືອ ມີຈໍານວນ 162 ຄົນ ເຊິ່ງເປີດສູນມາໃນວັນທີ 7 ສິງຫາ 2021 , ສ່ວນສູນມໍປາຍໂພນສະຫວັນມີ 323 ຄົນ ຍິງ 159 ຄົນ ເປີດສູນແຕ່ວັນທີ 19 ກໍລະກົດ 2021.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here