26 C
Vientiane
ວັນພະຫັດ, ເດືອນກັນຍາ 23, 2021

ຈຳປາສັກ ຄະນະສະເພາະກິດເຕືອນຕອນນີ້ສ່ຽງຕິດເຊື້ອໃນຊຸມຊົນ

ຈຳປາສັກຍັງພົບຜູ້ຕິດເຊື້ອຫຼາຍຂຶ້ນຕໍ່ເນື່ອງທັງນຳແຮງງານ ແລະຊຸມຊົນ ແຕ່ປະຊາຊົນຈຳນວນໜຶ່ງກໍ່ຍັງຂ້າມໄປມາຕາມຈຸດທີ່ສ່ຽວ ມື້ນີ້ຄະນະສະເພາະກິດເຕືອນນະຄອນປາກເຊສ່ຽວຕໍ່ການຕິດເຊື້ອ ເນື່ອງຈາກມີຄົນຈຳນວນໜຶ່ງໄປແລ່ນຊີບປິ່ງເຂົ້າ-ອອກຂົວຢູ່ຂົວມິດຕະພາບ ເຊິ່ງເປັນສັນຍານເຕືອນວ່າຈະມີການລະບາດໃນຊຸມຊົນ.


ຕາມການຖະແຫຼງຂອງທ່ານ ດຣ ວຽງສີ ສຸພັກດີ ຫົວໜ້າພະແນກສາທາລະນະສຸກ, ຄະນະກຳມະການ ປ້ອງກັນຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ແຂວງຈໍາປາສັກໃນວັນທີ 22 ກໍລະກົດນີ້ໃຫ້ຮູ້ວ່າ: ການແຜ່ລະບາດຂອງເຊື້ອພະຍາດໂຄວິດ-19 ຍັງບໍ່ມີທ່າທີວ່າຈະຫຼຸດຫນ້ອຍຖອຍລົງ ໂດຍສະເພາະປະເທດໃກ້ຄຽງທີ່ມີການລາຍງານນັບມື້ນັບເພີ່ມຂຶ້ນ ແລະ ໃນປັດຈຸບັນເຫັນໄດ້ວ່າມີແຮງງານລາວ ກັບຄືນບ້ານເກີດເມືອງນອນແຕ່ລະມື້ຈຳນວນຫຼາຍສົມຄວນ ເຊິ່ງມີຄວາມສ່ຽງໃນການຕິດເຊື້ອນັບມື້ນັບສູງຂຶ້ນ.


ສະເພາະແຂວງຈຳປາສັກ ມື້ນີ້ແມ່ນພົບຜູ້ຕິດເຊື້ອໃໝ່ຈຳນວນ 85 ຄົນ ເຊິ່ງໃນຈຳນວນດັ່ງກ່າວແມ່ນຕິດຈາກຊຸມຄົນມີຈຳນວນ 2 ຄົນ ເຮັດໃຫ້ມາຮອດປັດຈຸບັນແຂວງຈຳປາສັກມີຜູ້ຕິດເຊື້ອທັງໝົດ 1.247 ຄົນ ປິ່ນປົວຫາຍດີ 501 ຄົນ ແລະ ກຳລັງປິ່ນປົວແມ່ນ 747 ຄົນ ຖືວ່າເປັນຕົວເລກທີ່ສູງສົມຄວນ.


ອີກເຫດການໜຶ່ງທີ່ຢາກຝາກເຕືອນພໍ່ແມ່ນປະຊາຊົນ ໃຫ້ມີສະຕິເນື່ອງຈາກປັດຈຸບັນຢູ່ນະຄອນປາກເຊ ໄດ້ມີກຸ່ມຊິບປີ້ງ ( ກຸ່ມແລ່ນເອກະສານ) ທີ່ມີການເຂົ້າ-ອອກດ່ານ ເຊິ່ງເປັນສັນຍານເຕືອນວ່າຈະມີການແຜ່ລະບາດຂອງຊື້ພະຍາດໂຄວິດ-19 ໃນຊຸມຊົນຂໍໃຫ້ທຸກຄົນມີສະຕິປ້ອງກັນຕົນເອງ.


ທ່ານ ຫົວໜ້າພະແນກ ສາທາລະນະສຸກ ຍັງກ່າວອີກວ່າ ບັນຫາໜຶ່ງໜ້າເປັນຫ່ວງນັ້ນກໍ່ຄື ໂຮງຫມໍສະໜາມທີ່ພວກເຮົາໄດ້ກຳນົດທີ່ວິທະຍາໄລການເງິນ ທີ່ຈະນຳຜູ້ຕິດເຊື້ອເຂົ້າໃນມື້ນີ້ 85 ຄົນຖືວ່າເຕັມອັດຕາ ແລະ ອາດຈະນຳເອົາອາຄານຕ່າງໆພາຍໃນແຂວງເສີມ ຕອນນີ້ຕ້ອງຮີບຮ້ອນ ທີ່ຈັດຫາຕຽງເຂົ້າຮອງຮັບຜູ້ຕິດເຊື້ອ ເຊິ່ງອາດຕ້ອງໄດ້ໃຊ້ເວລາ 3-4 ວັນຈຶ່ງຈະສຳເລັດ ເພາະຕ້ອງໄດ້ຄຳນຶງເຖິງສິ່ງອຳນວຍຄວາມສະດວກຕ່າງໆເຊັ່ນ: ຫ້ອງນ້ຳ, ລະບົບນ້ຳ, ໄຟຟ້າ ແລະ ບ່ອນອາໄສຂອງແພດ ແລະ ສະຖານທີ່ຈຳກັດບໍລິເວນ ແມ່ນຈະມີການຂະຫຍາຍໄປແຕ່ລະມື້ ອີງໃສ່ສະຖານທີ່ໂຮງຮຽນໃດທີ່ມີຄວາມເໝາະສົມ.


ສຳລັບການກັບມາຂອງແຮງງານຢູ່ຕ່າງປະເທດສູ່ແຂວງຈຳປາສັກແມ່ນຍັງບໍ່ໝົດ ເທື່ອຕາມການລາຍງານ ຂອງທ່ານຫົວໜ້າພະແນກໃນເວລາ 10 ໂມງຂອງວັນທີ 22 ກໍລະກົດນີ້ແມ່ນມີແຮງງານທີ່ທະຍອຍກັນມາລໍຖ້າຢູ່ດ່ານແລ້ວ 100 ກວ່າຄົນ ເຊິ່ງບໍ່ຮູ້ວ່າໝົດມື້ນີ້ຈະມາອີກເທົ່າໃດ ນັ້ນສະແດງວ່າຈຳປາສັກຕອນນີ້ແມ່ນຕ້ອງການຄວາມຊ່ວຍເຫຼືອຫຼາຍຈາກທຸກພາກສ່ວນ ຂໍໃຫ້ພົ້ນວິກິດນີ້ໄປໂດຍດີ.

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here