ສປປ ລາວ ຍັງບໍ່ພົບຜູ້ຕິດເຊື້ອໂຄວິດ-19 ເພີ່ມ

0
137

ໃນວັນທີ 7 ພຶດສະພາ 2020 ທີ່ກະຊວງສາທາລະນະສຸກ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໄດ້ຈັດພິທີຖະແຫລງຂ່າວ ລາຍງານສະພາບ ການລະບາດຂອງພະຍາດ ໂຄວິດ-19 ໃນ ສປປ ລາວ ໂດຍທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ຜູ້ປະຈໍາການຄະນະສະເພາະກິດ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າໂຄສະນາເຜີຍແຜ່ຂໍ້ມູນຂ່າວສານ ແລະ ມີສື່ມວນຊົນຈາກຫລາຍ ພາກສ່ວນເຂົ້າຮ່ວມ.

ທ່ານ ດຣ ພູທອນ ເມືອງປາກ ແຈ້ງໃຫ້ຮູ້ວ່າ: ນັບແຕ່ເດືອນມັງກອນ ຮອດປັດຈຸບັນ ໄດ້ເກັບຕົວຢ່າງມາກວດທັງໝົດ ມີ 2.604 ຕົວຢ່າງມາກວດ, ກວດພົບເຊື້ອທັງໝົດ 19 ຄົນ ( 25 ມື້ແລ້ວທີ່ບໍ່ມີ ຜູ້ຕິດເຊື້ອເພີ່ມ). ປັດຈຸບັນມີຜູ້ນອນຕິດຕາມ ຢູ່ໂຮງໝໍມິດຕະພາບ 10 ຄົນ ລວມທັງເບີ 14 ທີ່ເອົາກັບຄືນມານອນ ຕິດຕາມອາການຢູ່ໂຮງໝໍ, ທັງໝົດເຫັນວ່າມີ ອາການເບົາບາງ ແລະ ມື້ອື່ນກໍ່ຈະເກັບຕົວຢ່າງ ມາກວດວິເຄາະເພື່ອຢັ້ງຢືນ, ຖ້າບໍ່ພົບເຊື້ອ 2 ຄັ້ງຕິດຕໍ່ກັນ 24 ຊົ່ວໂມງ ຈະພິຈາລະນາໃຫ້ອອກໂຮງໝໍ ໄປຈໍາກັດບໍລິເວນຢູ່ເຮືອນອີກ 14 ວັນ.

ທ່ານ ດຣ.ພູທອນ ເມືອງປາກ ກ່າວຕື່ມວ່າ: ແນວໃດກໍ່ຕາມເພື່ອສືບ ຕໍ່ໃຫ້ສະພາບການລະບາດ ຂອງພະຍາດໂຄວິດ-19 ຜ່ອນຄາຍລົງໄປເລື້ອຍໆ ເຮັດໃຫ້ພວກເຮົາສາມາດ ກັບມາດໍາລົງຊີວິດ ໄດ້ຕາມປົກກະຕິ ຈຶ່ງຮຽກຮ້ອງໃຫ້ພໍ່ແມ່ ປະຊາຊົນບັນດາເຜົ່າ, ອົງການຈັດຕັ້ງທຸກພາກສ່ວນ ຈົ່ງສືບຕໍ່ເອົາໃຈໃສ່ ເປັນເຈົ້າການ ຈັດຕັ້ງປະຕິບັດຄຳສັ່ງເລກທີ 06/ນຍ ແລະ ບັນດາຂໍ້ແນະນຳຕ່າງໆ ຢ່າງເຂັ້ມງວດ. ໂດຍສະເພາະ ແມ່ນການຈໍາກັດຕົນເອງຢູ່ເຮືອນ, ການປະຕິບັດໄລຍະຫ່າງ, ຫລີກເວັ້ນການຊຸມແຊວ, ໝັ່ນລ້າງມືເວລາຈັບບາຍສິ່ງຂອງ ແລະ ໃສ່ຜ້າອັດປາກ-ດັງ ເວລາຈຳເປັນທີ່ຕ້ອງ ອອກໄປຂ້າງນອກ.

ຂ່າວ: ສຸກສະຫວັດ

ເນື້ອໃນ: ຂປລ

LEAVE A REPLY

Please enter your comment!
Please enter your name here