ເຈົ້າຫນ້າທີ່ ແຂວງວຽງຈັນ ຈັບພໍ່ຄ້າໄດ້ 3 ຄົນ ພ້ອມຂອງກາງຢາບ້າ 78 ພັນເມັດ

0
746


ເຮືອນພັກເປັນອີກທາງເລືອກຂອງ ພວກຄົນບໍ່ດີທີ່ລັກລອບນັດຊື້-ຂາຍສິ່ງຜິດກົດໝາຍ ໂດຍສະເພາະແມ່ນຢາ ເສບຕິດປະເພດຢາບ້າ ເພື່ອຫຼົບຫຼີກການຕິດຕາມຈັບຕົວຂອງເຈົ້າໜ້າທີ່ຕໍາຫຼວດ. ເຊິ່ງໄລຍະຜ່ານມາ ເຈົ້າໜ້າທີ່ຕໍາຫຼວດມ້າງແຜນການຊື້-ຂາຍຂອງການພວກເຂົາຢູ່ເຮືອນພັກໄດ້ຫຼາຍລາຍ ຢຶດຢາບ້າໄດ້ຈໍານວນຫຼາຍ ແຕ່ກໍຍັງມີຫຼາຍກຸ່ມແກ້ງນຳໃຊ້ສະຖານທີ່ດັ່ງກ່າວເປັນບ່ອນຄ້າຂາຍດັ່ງໃນຄະດີ ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບ ຕິດ ປກສ ແຂວງວຽງຈັນ ໄດ້ສົມທົບກັບ ປກສ ເມືອງແມດ ນໍາກໍາລັງເຂົ້າປິດລ້ອມເຮືອນພັກແຫ່ງໜຶ່ງຢູ່ຂອບເຂດບ້ານເມືອງຄີ່ ເມືອງແມດ ແຂວງວຽງຈັນ ໃນວັນທີ 26 ກຸມພາ 2019 ເພື່ອຈັບເປົ້າໝາຍຄ້າຂາຍຢາບ້າ. ຜ່ານການກວດຄົ້ນຫ້ອງພັກພົບຢາບ້າ 39 ມັດ ເທົ່າກັບ 78.000 ເມັດ ພ້ອມຈັບຕົວຜູ້ຖືກຫາ ໄດ້ 3 ຄົນ.

ຜູ້ຖືກຫາຊື່ ທ້າວ ລ້ອງຊົ່ງ ອາຍຸ 21 ປີ, ທ້າວ ຄົວຊົ່ງ ອາຍຸ 35 ປີ ທັງ 2 ຢູ່ບ້ານນາກາງ ເມືອງຊະນະຄາມ ແຂວງວຽງຈັນ ແລະ ທ້າວ ລີເຮີ ອາຍຸ 27 ປີ ຢູ່ບ້ານສາມັກຄິໄຊ ເມືອງແມດ ແຂວງວຽງຈັນ.


ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໃຫ້ຮູ້ວ່າ: ພວກກ່ຽວແມ່ນຮ່ວມກັນລັກລອບຄ້າຂາຍຢາເສບຕິດ ແລະ ເປັນເປົ້າໝາຍຕິດຕາມຕົວຂອງ ເຈົ້າໜ້າທີ່ຢ່າງຈິງຈັງ. ຜ່ານການຕິດຕາມຮອດວັນທີ 26 ກຸມພາ ຈຶ່ງສືບຮູ້ວ່າພວກກ່ຽວກໍາລັງນັດຊື້-ຂາຍຢາບ້າຢູ່ເຮືອນພັກຢູ່ບ້ານເມືອງຄີ ເມືອງແມດ ຈຶ່ງສົມທົບກັບກໍາລັງວິຊາສະເພາະ ປກສ ເມືອງ ເຂົ້າຈັບກຸມ ພ້ອມຂອງກາງຢາບ້າຈໍານວນດັ່ງກ່າວໄປສອບສວນ.
ຜ່ານການສອບສວນພວກກ່ຽວໄດ້ໃຫ້ການວ່າ: ໃນວັນທີ 22 ກຸມພາ 2019, ທ້າວ ລີເຮີ ໄດ້ໂທລະສັບສັ່ງຊື້ຢາບ້ານໍາ ທ້າວ ລ້ອງຊົ່ງ ຈໍານວນ 39 ມັດ ເທົ່າກັບ 78.000 ເມັດ, ຈາກນັ້ນ ທ້າວ ລ້ອງຊົ່ງ ໄດ້ໂທລະສັບສັ່ງຊື້ຢາບ້າຈໍານວນດັ່ງກ່າວນໍາຄົນຮູ້ຈັກຢູ່ແຂວງຜົ້ງສາລີ, ແລ້ວໃຫ້ຝາກໄປນໍາລົດເມໂດຍສານ ພາຍຫຼັງຕົກລົງກັນແລ້ວ, ທ້າວ ລ້ອງຊົ່ງ ໄປລໍຮັບເອົາຢາບ້າທີ່ຝາກນໍາລົດເມໂດຍສານໄປລົງຢູ່ເຂດບ້ານ ໂນນສະຫວັນ ເມືອງຊະນະຄາມ ແຂວງວຽງຈັນ, ເມື່ອໄດ້ຢາບ້າມາແລ້ວກໍໄດ້ໄປ ຊຸກເຊືອງໄວ້ຢູ່ເຮືອນຂອງ ທ້າວ ຄົວຊົ່ງ.

ມາຮອດວັນທີ 26 ກຸມພາ 2019 ທ້າວ ລ້ອງຊົ່ງ ແລະ ທ້າວ ຄົວຊົ່ງ ໄດ້ ເອົາຢາບ້າຈໍານວນດັ່ງກ່າວ ໄປສົ່ງໃຫ້ ທ້າວ ລີເຮີ ທີ່ນັດກັນຢູ່ເຮືອນພັກແຫ່ງ ໜຶ່ງໃນຂອບເຂດບ້ານເມືອງຄີ່ ເມືອງ ແມດ ແຂວງວຽງຈັນ, ໃນຂະນະທີກໍາ ລັງຊື້-ຂາຍກັນຢູ່ນັ້ນ ກໍຖືກເຈົ້າໜ້າທີ່ເຂົ້າ ປິດລ້ອມ ແລະ ຈັບຕົວພວກກ່ຽວທັງ 3 ຄົນ ພ້ອມຂອງກາງຢາບ້າ 39 ມັດ ເທົ່າກັບ 78.000 ເມັດ ທີ່ຊຸກເຊື່ອງໄວ້ໃນກະເປົາເປ້.

ການສະກັດກັ້ນ ແລະ ຕ້ານພວກລັກລອບຄ້າຂາຍຢາເສບຕິດ ມັນແມ່ນໜ້າທີ່ຂອງໝົດທຸກຄົນ ຊ່ວຍກັນເປັນຫູເປັນຕາ ກໍລະນີພົບເຫັນຕ້ອງຈິງໃຈລາຍງານຕໍ່ເຈົ້າໜ້າທີ່ ເພື່ອເຂົ້າແກ້ໄຂໄດ້ທັນເວລາ. ຖ້າອີງໃສ່ແຕ່ເຈົ້າໜ້າທີ່ແກ້ໄຂພຽງຝ່າຍດຽວຄົງເປັນໄປໄດ້ຍາກ. ສະນັ້ນ, ທຸກຄົນພາກັນກໍາຈັດປັດເປົາ ພວກນີ້ ໃຫ້ໝົດໄປໃນສັງຄົມເພື່ອເຮັດ ສັງຄົມມີຄວາມສະຫງົບ ແລະ ຄວາມ ເປັນລະບຽບຮຽບຮ້ອຍ. ຂອບໃຈຂໍ້ມູນ: ນສພ ຄວາມສະຫງົບ



LEAVE A REPLY

Please enter your comment!
Please enter your name here