ນະຄອນຫລວງວຽງຈັນ ຄາດວ່າຈະອອກໃບຕາດິນ ໃຫ້ໄດ້ 10.400 ຕອນ ໃນເດືອນທັນວານີ້

0
181


ຂປລ. ພະ​ແນ​ກຊັບພະຍາກອນ ​ແລະ ສິ່ງ​​ແວດ​ລ້ອມ ນະຄອນຫລວງ​ວຽງ​ຈັນ, ​ຈະສູ້​ຊົນ​ດຳ​ເນີນ​ການ​ສຳ​ຫລວດ​ພິສູດ​ຫລັກ​ຖານ ອອກ​ໃບ​ຕາດິນ​​​ໃນ 9 ຕົວ​ເມືອງ ທົ່ວ​ນະຄອນ​ຫລວງ​ວຽງ​ຈັນ ​ໃຫ້​ໄດ້ 10.400 ​ຕອນ ຈາກ​ທີ່​ທາງ​ນະຄອນຫລວງ​ວຽງ​ຈັນ​ ມອບ​ໝາຍ​ໃຫ້​ພຽງ 10 ພັນ​ຕອນ, ​ແຕ່​ປັດຈຸ​ບັນ​​ແມ່ນ​ໄດ້ 12 ພັນ​ຕອນ​ແລ້ວ. ພ້ອມ​​ນີ້, ຈະ​ເກັບ​ກຳ​ສຳມະ​ໂນ​ທີ່​ດິນ 9 ຕົວ​ເມືອງ ​ເຂົ້າ​ໃນ​ລະບົບ​ຖານ​ຂໍ້​ມູນ​ໃຫ້​ໄດ້​ຕາມ​ແຜນ​ ທີ່​ສະ​ພາ​ປະຊາຊົນ​ນະຄອນຫລວງ​ວຽງ​ຈັນ ​ຮັບຮອງ 80 ພັນ​ຕອນ ​ຄາດ​ວ່າ​ຈະ​ໃຫ້ສຳ​ເລັດ​ໃນ​ເດືອນທັນວາ​ນີ້. ຂະນະ​ທີ່ການຈັດ​ເກັບ​ລາຍ​ຮັບ​ ກໍແມ່ນ​ລື່ນ​ຄາດໝາ​ຍທີ່​ຕັ້ງ​ໄວ້, ທ່ານ ບຸນ​ທາມ ພຸດ​ທະ​ວົງສາ ຫົວໜ້າ​ພະ​ແນ​ກຊັບພະຍາກອນ ​ແລະ ສິ່ງ​ແວດ​ລ້ອມ​ນະຄອນຫລວງ​ວຽງຈັນ ​ໄດ້​ໃຫ້​ສຳພາດ​​ຕໍ່ສື່ມວນຊົນ​ໃນ​ວັນ​ທີ 9 ທັນ​ວາ 2019 ນີ້.

ທ່ານ ບຸນ​ທາມ ພຸດ​ທະ​ວົງສາ ຍັງ​ໃຫ້​ຮູ້​ຕື່ມ​ວ່າ: ​ໃນ​ໄລຍະ 11 ​ເດືອນ​ຜ່ານ​ມາ ພະ​ແນ​ກຊັບພະຍາກອນ ​ແລະ ສິ່ງ​​ແວດ​ລ້ອມ ນະຄອນຫລວງ​ວຽງ​ຈັນ, ​ໄດ້​ມີ​ການ​ປັບປຸງ​ລະບົບ​ການຈັດ​ຕັ້ງ​ຂັ້ນ​ສູນ​ກາງ, ນະຄອນຫລວງ ​ແລະ ຂັ້ນ​ເມືອງ ສຳ​ເລັດ 100%. ປັດຈຸ​ບັນ ​ພວກ​ເຮົາ​ກຳລັງ​ດຳ​ເນີນ​ການ​ປະ​ເມີນ​ອາສາ​ສະ​ໝັກ ​ເພື່ອ​ແກ້​ໄຂ ​ແລະ ປັບປຸງ​ຂອດ​ອາສາ​ສະໝັກດັ່ງກ່າວ, ເຊິ່ງຈະ​ມີ​ການຈັດປະ​ເພດ​ອາສາ​ສະໝັກ ​ແລະ ຈະ​ປະກາດ​ການ​ປົດ​ປ່ອຍ​ອາສາ​ສະໝັກ​ດັ່ງກ່າວ ​ຢ່າງ​ເປັນ​ທາງ​ການ​ໃນ​ທ້າຍ​ເດືອນ​ທັນວາ​ນີ້​, ໂດຍອີງ​ໃສ່​ຂໍ້​ຕົກລົງ​ຂອງ​ຄະນະ​ພັກ ຄະນະ​ພະ​ແນ​​ກຊັບພະຍາກອນ ​ແລະ ສິ່ງ​​ແວດ​ລ້ອມ. ປັດຈຸ​ບັນ ມີ​ອາສາ​ສະໝັກທີ່​ເຮັດ​ວຽກ ຢູ່ບັນດາພະ​ແນ​ກຊັບພະຍາກອນ ​ແລະ ສິ່ງ​​ແວດ​ລ້ອມ ທົ່ວນະຄອນຫລວງ​ວຽງ​ຈັນທັງ​ໝົດ 130 ກວ່າ​ຄົນ.

ທ່ານ ບຸນ​ທາມ ພຸດ​ທະ​ວົງສາ ​ກ່າວ​ຕື່ມ​ວ່າ: ສຳລັບ​ວຽກ​ງານ​ໂຄງການ ​ທີ່​ທາງ​ພະ​ແນ​ກ​ໄດ້​ມີ​ສ່ວນ​ຮ່ວມ​ ແມ່ນ​ໂຄງການ​ທາງ​ດ່ວນ​ວຽງ​ຈັນ​ ໝາຍ​​ເລກ 1 ມາ​ຮອດ​ປັດຈຸ​ບັນ​ ​ເຫັນ​ວ່າການ​ສຳ​ຫລວດ​ຂໍ້​ມູນ​ພື້ນຖານ ​ໃຫ້​ແກ່​ການ​ຊົດ​ເຊີຍທີ່​ດິນ ຫລື ຜູ້​ທີ່​ຖືກ​ຜົນ​ກະທົບ​ຂອງ​ໂຄງການ ​ແມ່ນ​ໄດ້​ມອບ​ຮັບ​ຄ່າ​ຊົດ​ເຊີຍ​ໄດ້ 2 ຄັ້ງ ​ໂດຍ​ຄັ້ງ​ທີ 1 ມີ​ຈຳນວນ​ຜູ້​ເຂົ້າ​ຮັບ​ການ​ຊົດ​ເຊີຍ​ 19 ຄົນ (19 ຕອນ​ດິນ) ມີຄ່າ​ການ​ຊົດ​ເຊີຍ​ຄັ້ງ​ນີ້ 4 ຕື້​ກວ່າ​ກີບ ​ແລະ ຄັ້ງ​ຫລ້າ​ສຸດ​ ມີ​ທັງ​ໝົດ 90 ກວ່າ​ຕອນ​ດິນ​ ມູນ​ຄ່າ​ການ​ຊົດ​ເຊີຍ 40 ຕື້​ກວ່າ​ກີບ ​ແລະ ຍັງ​ຈະ​ໄດ້​ສືບ​ຕໍ່​ສຳ​ຫລວດ​ທີ່​ດິນ​ ທີ່​ໄດ້​ຮັບ​ຜົນ​ກະທົບ​ຈາກ​ໂຄງການ​ດັ່ງກ່າວ ​ເພື່ອສືບ​ຕໍ່​ໃຫ້ການ​ຊົດ​ເຊີຍ​ດິນ​ດັ່ງກ່າວ, ​ເຊິ່ງຄາດ​ວ່າ​ຈະ​ໃຫ້​ສຳ​ເລັດ​ພາຍ​ໃນ​ເດືອນທັນ​ວາ​ນີ້. ໂຄງການ​ທາງ​ດ່ວນ​ວຽງ​ຈັນ​ໝາຍ​​ເລກ 1 ຖ້າຫາກ​ສຳ​ເລັດ ຄາດ​ວ່າຜົນ​ໄດ້​ຮັບ​ທີ່​ຈະ​ເກີດ​ຂຶ້ນ​ສູງ​ຫລາຍ, ​ເຊິ່ງ​ຈະ​ສາມາດ​​ແກ້​ໄຂຄວາມ​​ແອ​ອັດ​ ໃນ​ການ​ຈາລະ​ຈອນ​ຢູ່​ນະຄອນຫລວງ​ວຽງ​ຈັນ, ຊ່ວຍ​ຍົກ​ລະດັບ​ການ​ສ້າງ​ລາຍ​ຮັບ​ໃຫ້​ແກ່​ປະຊາຊົນ​ໃນການ​ເດີນທາງ​ໄປມາ, ການຄົມມະນາຄົມຂົນ​ສົ່ງ​ສິນຄ້າ ​ແລະ ການ​ເຄື່ອນ​ໄຫວ​ທຸລະ​ກິດ​ອະ​ສັງຫາລິມະ​ຊັບ ​ເພາະວ່າ​ຖ້າ​ພື້ນຖານ​ໂຄງ​ລ່າງ​​ດີ ​ເຮັດ​ໃຫ້​ມູນ​ຄ່າ​ຊັບພະຍາກອນ ​ດ້ານ​ອະ​ສັງຫາ​ຈະ​ສູງ​ຂຶ້ນ ແລະ ​ຈະ​ເປັນ​ການ​ດຶງ​ດູດ​ ໃຫ້​ນັກ​ລົງທຶນ​ຕ່າງປະ​ເທດ ​ມີ​ຄວາມ​ສົນ​ໃຈ​ມາ​ລົງທຶນ​ຢູ່​ນະຄອນ ຫລວງ​ວຽງ​ຈັນ ຫລາຍຕື່ມ​ຂຶ້ນ.

ຂ່າວ: ມະນີ​ທອນ,

ເນື້ອໃນ: ຂປລ



LEAVE A REPLY

Please enter your comment!
Please enter your name here