ເຈົ້າຫນ້າທີ່ຈະເລັ່ງຮື້ຖອນ ເທີບເງີບ ຕູບ ເຕັ້ນ ໂຕະຕັ່ງ ຮົ້ວ ປ້າຍໂຄສະນາ ແລະ ສິ່ງປຸກສ້າງທີ່ກວມເອົາເຂດສະຫງວນຂອງເສັ້ນທາງ

0
160

ໂດຍປະຕິບັດຕາມກົດໝາຍວ່າດ້ວຍການຜັງເມືອງ (ສະບັບປັບປຸງ) ກົດໝາຍວ່າດ້ວຍທາງຫຼວງ (ສະບັບປັບປຸງ) ຄຳສັ່ງຂອງທ່ານລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ວ່າດ້ວຍການຄຸ້ມຄອງເຂດສະຫງວນຂອງເສັ້ນທາງຢູ່ນະຄອນຫຼວງວຽງຈັນ (ນວ) ຂໍ້ຕົກລົງຂອງທ່ານເຈົ້າຄອງ ນວ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ແລະ ແຈ້ງການໃຫ້ມ້າງ ຮື້ຖອນ ເທີບເງີບ ຕູບ ເຕັ້ນ ໂຕະຕັ່ງ ຮົ້ວ ປ້າຍໂຄສະນາ ແລະ ສິ່ງປຸກສ້າງທີ່ກວມເອົາເຂດສະຫງວນຂອງເສັ້ນທາງ ພະແນກ ຍທຂ ນວ ໄດ້ສົມທົບກັບເມືອງໄຊທານີ ລົງກວດກາ-ເຮັດບົດບັນທຶກກັບຫ້າງຮ້ານຢູ່ລຽບຕາມຂອບເຂດ 2 ຟາກທາງແຕ່ 4 ແຍກໄຟແດງ 450 ປີ – 4 ແຍກໄຟແດງຕານມີໄຊ ວັນທີ 27 ກຸມພາ 2019 ນຳໂດຍທ່ານ ບຸນຈັນ ແກ້ວສີທຳມະ ຮອງຫົວໜ້າພະແນກ ຍທຂ ນວ ຜູ້ຊີ້ນຳວຽກຄຸ້ມຄອງເຄຫາ-ຜັງເມືອງ ວຽກງານຄວາມບໍ່ເປັນລະບຽບຮຽບຮ້ອຍໃນຕົວເມືອງ.

ທ່ານ ບຸນຈັນ ແກ້ວສີທຳມະ ໃຫ້ສຳພາດວ່າ: ເພື່ອຜັນຂະຫຍາຍຂໍ້ຕົກລົງຂອງທ່ານເຈົ້າຄອງ ນວ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ເພື່ອເນັ້ນໃສ່ຕົວເມືອງ ໃນຍຸກ AEC ໃຫ້ມີຄວາມສະອາດ ຈົບງາມ ມີສີຂຽວ ແລະ ມີຄວາມສະດວກສະບາຍດ້ານສາທາລະນຸປະໂພກ ໃຫ້ສົມກັບເປັນເມືອງຫຼວງຂອງປະເທດ ຄະນະຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ນວ ຈຶ່ງໄດ້ສົມທົບກັບອຳນາດການປົກຄອງເມືອງ ຈັດຕັ້ງປະຕິບັດຢູ່ເມືອງສີໂຄດຕະບອງ ເມືອງໄຊເຊດຖາ ເມືອງຈັນທະບູລີ ເມືອງສີສັດຕະນາກ.

ເຊິ່ງໄດ້ມີຜົນສຳເລັດ ໄດ້ບົດຮຽນ ແລະ ໃຫ້ທັນກັບຕ່າງປະເທດ ປັດຈຸບັນໄດ້ເລີ່ມສືບຕໍ່ຂະຫຍາຍສູ່ແຕ່ລະເສັ້ນທາງສາຍເອກຂອງແຕ່ລະເມືອງທີ່ຍັງບໍ່ທັນໄດ້ຈັດຕັ້ງປະຕິບັດ ເຊິ່ງມື້ນີ້ໄດ້ມາຈັດຕັ້ງປະຕິບັດຢູ່ເສັ້ນທາງດົງໂດກ-ສີເກີດ ໂດຍສົມທົບກັບເມືອງ ບ້ານ ແລະ ປະຊາຊົນ ວັດແທກກຳນົດເຂດສະຫງວນຄືນ ເຮັດບົດບັນທຶກ ໃຫ້ຮື້ຖອນ ເທີບເງີບ ຕູບ ເຕັ້ນ ໂຕະຕັ່ງ ຮົ້ວ ປ້າຍໂຄສະນາ ແລະ ສິ່ງປຸກສ້າງອື່ນໆທີ່ກວມເອົາເຂດສະຫງວນຂອງເສັ້ນທາງ ໂດຍແທກແຕ່ຄູກາງທາງອອກໄປເບື້ອງລະ 20 ແມັດ ໃນນີ້ແຕ່ 4 ແຍກໄຟແດງ 450 ປີ-3 ແຍກສີເກີດ ຈະໃຫ້ສຳເລັດພາຍໃນ 30 ວັນ ສ່ວນເສັ້ນທາງສາຍເອກທົ່ວ ນວ ຈະໃຫ້ສຳເລັດໃນປີ 2019. ຂອບໃຈຂໍ້ມູນຈາກ: ນສພ ວຽງຈັນໃຫ່ມ

LEAVE A REPLY

Please enter your comment!
Please enter your name here