ຈີນຮ່ວມກັນແກ້ໄຂບັນຫາເຈາະອຸໂມງມິດຕະພາບຖືກບໍ່ເກືອໄຫຼລົງສາຍນໍ້າສົ່ງຜົນກະທົບຕໍ່ການດໍາລົງຊິວິດ

0
212


ພາຍຫຼັງທີ່ໂຄງການກໍ່ສ້າງລົດໄຟລາວ-ຈີນ ໄດ້ຈັດຕັ້ງປະຕິບັດການກໍ່ສ້າງບັນດາໜ້າວຽກຕ່າງໆ ໄດ້ຢ່າງຄືບໜ້າ ໂດຍສະເພາະແມ່ນການເຈາະອຸໂມງມິດຕະພາບຢູ່ເຂດບໍ່ເຕ່ນ ແຂວງຫຼວງນໍ້າທາ ເບື້ອງລາວມີຄວາມຍາວ 2400 ກ່ວາແມັດ, ຫຼັງຈາກເຈາະມາໄດ້ 1.000 ກວ່າແມັດ ໄດ້ຄຸດພົບໃສ່ສາຍນໍ້າເກືອ ແລ້ວໄດ້ໄຫຼລົງໃສ່ແມ່ນໍ້າ ຮ່ອງຫ້ວຍ ປ່ອງໃສ່ນໍ້າໃຫ່ຍສາຍນໍ້າທຸງ

ເຮັດໃຫ້ສົ່ງຜົນກະທົບຕໍ່ກັບການດໍາລົງຊີວິດຂອງປະຊາຊົນບ້ານຕ່າງໆທີ່ຢູ່ເຂດລຸ່ມ ລຽບຕາມແຄມແມ່ນໍ້າລົງມາຮອດເຂດທົ່ງພຽງເມືອງຫຼວງນໍ້າທາ ໄດ້ຮັບຜົນກະທົບເປັນຕົ້ນແມ່ນລະບົບນໍ້າປະປາທີ່ປະຊາຊົນບໍລິໂພກ, ຊົມໃຊ້ ຈາກນໍ້າຈືດເມື່ອກ່ອນ ກາຍມາເປັນນໍ້າເຄັມ ຍ້ອນມີປະລິມານນໍ້າເກືອເຈືອປົນຢູ່ໃນນໍ້າເກີນຄ່າມາດຕະຖານ ແລະ ສົ່ງຜົນກະທົບເຖິງການຜະລິດປູກຝັງ, ລະບົບນິເວດສິ່ງແວດລ້ອມ.

ຕໍ່ສະພາບການດັ່ງກ່າວ ມາໃນວັນທີ 9 ພະຈິກ 2019 ທ່ານ ຄໍາໄຫຼ ສີປະເສີດ ກໍາມະການປະຈໍາພັກແຂວງ ຮອງເຈົ້າແຂວງໆຫຼວງນໍ້າທາ ແລະ ທ່ານ ສາຍສະໝອນ ວົງສໍາພັນ ຜູ້ອໍານວຍການລັດວິສາຫະກິດນໍ້າປະປາແຂວງຫຼວງນໍ້າທາ ພ້ອມດ້ວຍທ່ານ ທອງແດງ ສິດທິສົນ ສະມາຊິກສະພາປະຊາຊົນແຂວງ ຫົວໜ້າຄະນະກໍາມະການແກ້ໄຂຜົນກະ ທົບເສັ້ນທາງລົດໄຟລາວ-ຈີນ ຊ່ວງຜ່ານຫຼວງນໍ້າທາ ແລະ ພະນັກງານວິຊາການທີ່ກ່ຽວຂ້ອງ ໄດ້ລົງກວດກາຕົວຈິງ

ເຊິ່ງໄດ້ທໍາການວັດແທກປະລິມານນໍ້າເກືອທີ່ເຈືອປົນຢູ່ໃນນໍ້າ ຕັ້ງແຕ່ຫົວງານນໍ້າປະປາເມືອງຫຼວງນໍ້າທາ ວັດແທກນໍ້າມີປະລິ ມານນໍ້າເກືອເຈືອປົນ 0,54, ນໍ້າທຸງ 0,41 ໂຮງງານນໍ້າປະປານາເຕີຍ 3, 87 ຜົນການກວດແຫ່ງຕ່າງໆປະກົດວ່າມີປະລິມານນໍ້າເກືອເຈືອປົນຢູ່ໃນນໍ້າເກີນຄ່າມາດຕະຖານຄື 0,5 ມີລີກຼາມ ຕໍ່ລິດ ລົງມາ.

ທ່ານ ຮອງເຈົ້າແຂວງໆຫຼວງນ້ຳທາຍັງໄດ້ຊີ້ແຈງບັນຫາດັງກ່າວວ່າອິງໃສຄຳສະເໜີຂອງພໍ່ແມ່ປະຊາຊົນໃນກາງເດືອນ ຕຸລາ ຜ່ານມາທີ່ທ່ານໄດ້ລົງມາເຮັດວຽກນຳປະຊາຊົນບ້ານນາເຕີຍ ແລະ ໄດ້ຮັບຄຳສະເໜີຂອງປະຊົນບ້ານນາເຕີຍວ່າດຽວນີ້ນ້ຳເຄັມ, ຈາກນັ້ນທາງຄະນະຊີ້ນຳໂຄງການລົດໄຟຂັ້ນແຂວງ ກັບບໍລິສັດທາງລົດໄຟເລກ 2 ໄດ້ມາສົມທົບກັບນ້ຳປະປາປະຈຳຢູ່ນາເຕີຍໄດ້ກວດກາເບິ່ງຄວາມເຂັ້ມຂຸ້ນຂອງນ້ຳເກືອທີ່ເຈືອປົນຢູ່ໃນນ້ຳຕາມສາຍນ້ຳທຸງ, ຜົນການວິເຄາະ ນໍ້າມີຄວາມເຄັມເຂັ້ມຂຸນແທ້ ແລະ ເກີນມາດຕະຖານຂອງອົງການອານາໄມໂລກກຳນົດ ຄື 0,5 % ຂອງຫົວໜ່ວຍວັດແທກລົງມາຈິ່ງສາມາດນຳໃຊ້ ແລະ ບໍລິໂພກໄດ້

ດັ່ງນັ້ນທາງຄະນະ ໄດ້ລົງສົມທົບກັບບໍລິສັດທາງລົດໄຟເລກ 2 ເປັນບໍລິສັດຮັບເໝົາເຈາະອຸມົງເພື່ອຫາວິທີແກ້ໄຂເຊິ່ງທາງບໍລິສັດໄດ້ສ້າງອ່າງເພື່ອໃຫ້ນ້ຳເກືອຕົກຕະກອນເຊິ່ງຈະສາມາດລົດປະລິມານຄວາມເຄັມຂອງນ້ຳເກືອລົງກ່ອນຈະໄຫຼລົງສູແຫຼ່ງນ້ຳ ໃນໄລຍະເບື້ອງຕົ້ນ ສ່ວນໃນໄລຍະຍາວທາງບໍລິສັດແມ່ນໄດ້ເຊີນເອົາວິຊາການຂອງຈີນທີ່ມີປະສົບການດ້ານນີ້

ເພື່ອມາແກ້ໄຂ, ສ່ວນຝ່າຍລາວ ແມ່ນຈະໄດ້ຊອກຫາແຫຼ່ງນ້ຳແຫ່ງໃໝ່ເພື່ອມາຜະລິດເປັນນ້ຳປະປາໃຫ້ກັບປະຊາຊົນທີ່ຖືກຜົນກະທົບ ໄດ້ລົງກວດກາບ່ອນຜະລິດນໍ້າປະປາແຫ່ງໃໝ່ ເພື່ອແກ້ໄຂໃຫ້ປະຊາຊົນໄດ້ຊົມໃຊ້ນໍ້າປະປາທີ່ສະອາດ ໄດ້ມາດຕະຖານ, ໂດຍໄດ້ກວດເຂດແມ່ນໍ້າທຸງ ເຂດບ້ານຕີນສານ ທີ່ຢູ່ຈຸດເທິງຈາກຫ້ວຍນໍ້າທາງໂຄງການລົດໄຟຈະໄດ້ຕໍ່ທໍ່ລົງໃສ່ຫົວງານຈຸດເກົ່າ ມີຄວາມຍາວ 3 ກິໂລແມັດ ຄາດວ່າການປັບປຸງໃຫ້ສໍາເລັດພາຍໃນ 1 ເດືອນ.

ຂ່າວ: ມຸນຕີ



LEAVE A REPLY

Please enter your comment!
Please enter your name here