ລັດຖະບານຫວຽດນາມ ປະດັບຫລຽນໄຊ ໃຫ້ກອງທັບປະຊາຊົນລາວ

0
123


ໃນວັນທີ 4 ພະຈິກ 2019 ຢູ່ກະຊວງປ້ອງກັນປະເທດ ນະຄອນຫລວງວຽງຈັນ, ໄດ້ມີພິທີປະດັບຫລຽນໄຊ ໃຫ້ແກ່ກອງທັບປະຊາຊົນລາວ; ປະດັບຫລຽນໄຊເອກະລາດຊັ້ນ I, ຊັ້ນ II ຊັ້ນ III ໃຫ້ແກ່ກົມກອງລວມໝູ່ ແລະ ປະດັບຫລຽນໄຊ ມິດຕະພາບໃຫ້ບຸກຄົນ ຈຳນວນໜຶ່ງ ໃນກອງທັບ ປະຊາຊົນລາວ ທີ່ມີຜົນງານດີເດັ່ນ ໃນການປະກອບສ່ວນ ສ້າງສາຍພົວພັນມິດຕະພາບ ຄວາມສາມັກຄີລະ ຫວ່າງ ສອງຊາດ, ສອງກອງທັບ ຫວຽດນາມ-ລາວ, ລາວ-ຫວຽດນາມໃນໄລຍະຜ່ານມາ. ໃຫ້ກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງ ປ້ອງກັນປະເທດ, ທ່ານ ພົນເອກ ໂງ ຊວນ ລິກ ກໍາມະການກົມການເມືອງສູນກາງພັກຄອມມູນິດ​ ຫວຽດນາມ ລັດຖະມົນຕີກະຊວງປ້ອງກັນປະເທດ ຫວຽດນາມ, ແລະ ມີທ່ານ ເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ, ມີບັນດາ ນາຍ ແລະ ພົນທະຫານ ເຂົ້າຮ່ວມຢ່າງພ້ອມ ພຽງ.

ການປະດັບຫລຽນໃນຄັ້ງນີ້ ໂດຍແມ່ນທ່ານ ພົນເອກ ໂງ ຊວນ ລິກ ໄດ້ຕາງໜ້າລັດຖະບານ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະດັບຫລຽນໄຊ ດາວຄໍາ ແຫ່ງ ສສ ຫວຽດນາມ ໃຫ້ແກ່ກອງທັບປະຊາຊົນລາວ, ປະດັບຫລຽນໄຊເອກະລາດຊັ້ນ I ໃຫ້ແກ່ກົມໃຫຍ່ເສນາທິການກອງ ທັບ, ກົມໃຫຍ່ການເມືອງກອງທັບ, ກົມໃຫຍ່ພະລາທິການກອງທັບ, ກົມໃຫຍ່ເຕັກນິກກອງທັບ, ຫ້ອງວ່າການກະຊວງປ້ອງກັນປະເທດ, ຫ້ອງ ການ ປກຊ-ປກສ ແລະ ກົມ 213; ປະດັບຫລຽນໄຊເອກະ ລາດຊັ້ນ II ໃຫ້ວິທະຍາຄານປ້ອງກັນຊາດໄກສອນພົມວິຫານ, ກົມວິທະຍາ ສາດ-ປະຫວັດສາດການທະຫານ, ວິທະຍາຄານກົມມະດຳ, ກົມພົວພັນຕ່າງປະເທດ, ວິທະຍາຄານພະ ລາທິການ, ກອງພົນທີ 1, 2, 3, 4, 5 ແລະ ບຸກຄົນ 4 ສະຫາຍ; ປະດັບຫລຽນໄຊເອກະລາດຊັ້ນ III ໃຫ້ກົມໂຄສະນາອົບຮົມ, ກົມສູ້ຮົບ, ກົມທະຫານຊາຍແດນ, ກົມນະໂຍບາຍ, ວິທະຍາຄານເຕັກນິກການທະຫານ, ກົມແຜນທີ່, ກົມເຄມີສາດ, ກົມ 49, ກົມປ້ອງກັນອາກາດ, ກົມກົດລັບ, ວິທະຍາຄານການແພດ, ໂຮງ ຮຽນກໍ່ສ້າງນາຍສິບເລກ 2 ວຽງໄຊ, ກອງໜັງສືພິມກອງທັບ, ກອງສິລະປະກອນກອງທັບ, ຫໍພິພິທະພັນປະຫວັດສາດກອງທັບ, ຫ້ອງການກົມໃຫຍ່ການເມືອງກອງທັບ, ກົມຄຸ້ມຄອງອາວຸດ-ກະສູນ, ກອງບັນຊາການທະຫານ 17 ແຂວງ ແລະ ນະຄອນຫລວງວຽງຈັນ ແລະ ປະດັບຫລຽນໄຊມິດຕະພາບໃຫ້ບຸກຄົນ 15 ທ່ານ.

ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວວ່າ: ໄດ້ຕີລາຄາສູງຕໍ່ການຍ້ອງຍໍຂອງ ພັກ-ລັດຖະບານ​ ສສ​ ຫວຽດນາມ ແກ່ກອງທັບປະຊາຊົນລາວໃນຄັ້ງນີ້​ ເຊິ່ງເປັນຄວາມພາກພູມໃຈຂອງພະນັກງານ-ນັກຮົບ,​ ທັງສະແດງໃຫ້ເຫັນວ່າຕະຫລອດໄລຍະ​ 70 ປີຜ່ານມາຜົນງານທີ່ກອງທັບປະຊາຊົນລາວຍາດມາໄດ້ນັ້ນ ແມ່ນຕິດພັນກັບຜົນງານລວມຂອງສອງປະເທດເຮົາ,​ ແມ່ນຜົນງານແຫ່ງການຮ່ວມສໍາພັນສູ້ຮົບລາວ-ຫວຽດນາມຕະຫລອດໄລຍະແຫ່ງການຕໍ່ສູ້ກູ້ຊາດ ຕ້ານສັດຕູໂຕດຽວກັນ ເພື່ອຄວາມເປັນເອກະລາດ ແຫ່ງຊາດຂອງລາວເຮົາ ກໍຄື​ໄລຍະແຫ່ງການປົກປັກຮັກສາ ແລະ​ ພັດທະ ນາປະເທດຊາດເທົ່າທຸກວັນນີ້.​ ທ່ານ ພົນເອກ ຈັນສະໝອນ ຈັນຍາລາດ ຍັງໄດ້ສະແດງຄວາມຂອບ ໃຈຢ່າງເລິກເຊິ່ງ ຕໍ່ພັກ, ​ລັດຖະບານ,​ ກອງທັບ​ ແລະ ​ປະຊາຊົນຫວຽດນາມອ້າຍນ້ອງ ທີ່ຍາມໃດກໍໄດ້ໃຫ້ການຊ່ວຍເຫລືອສະຫນັບສະຫນູນ​ ​ສປປ ລາວ​ ໂດຍສະເພາະແມ່ນຊ່ວຍເຫລືອກອງທັບປະຊາຊົນລາວ ບໍ່ວ່າທາງດ້ານວັດຖຸກໍຄືປັດໄຈຕ່າງໆ,​ ການກໍ່ສ້າງຊັບພະຍາກອນມະນຸດ ແລະ​ ອື່ນໆຢ່າງໃຫຍ່ຫລວງ,​ ທັນການ ແລະ ​ມີປະສິດທິຜົນ​ ຢ່າງສະເຫມີຕົ້ນສະເຫມີປາຍໂດຍຕະຫລອດມາ ເປັນການປະກອບສ່ວນອັນສໍາຄັນເຂົ້າໃນການເສີມສ້າງ ແລະ ​ຮັດແຫນ້ນສາຍພົວພັນມິດຕະພາບ, ​ຄວາມສາມັກຄີພິເສດ ແລະ​ ການຮ່ວມມືຮອບດ້ານລະຫວ່າງສອງຊາດ,​ ສອງກອງທັບລາວ-ຫວຽດ ນາມ ໃຫ້ນັບມື້ແຕກດອກອອກຜົນຢ່າງບໍ່ຢຸດຢັ້ງ.

ໂອກາດນີ້,​ ສະຫາຍ ພົນເອກ ໂງ ຊວນ ລິກ ໄດ້ມີຄໍາເຫັນວ່າ: ການປະດັບຫລຽນໄຊ ປະເພດຕ່າງໆ ໃຫ້ແກ່ກົມກອງລວມໝູ່ ແລະ ບຸກຄົນໃນກອງທັບປະຊາຊົນລາວໃນຄັ້ງນີ້ ແມ່ນເປັນການຈາລຶກ ຜົນງານການປະກອບສ່ວນ ອັນສຳຄັນ ຂອງກອງທັບປະຊາຊົນລາວ ໃນການກໍ່ສ້າງ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ-ລາວ ປະກອບສ່ວນເຮັດໃຫ້ສາຍພົວພັນອັນສະໜິດສະໜົມ, ບໍລິສຸດຜຸດຜ່ອງ, ຄວາມສາມັກຄີສະໜິດແໜ້ນຂອງສອງພັກ, ລັດ, ປະຊາຊົນ ແລະ ກອງທັບສອງຊາດລາວ-ຫວຽດນາມພວກເຮົາເລິກເຊິ່ງຂຶ້ນກ່ວາເກົ່າ, ພ້ອມທັງເຊື່ອໝັ້ນວ່າ: ເຖິງວ່າຈະຢູ່ໃນສະຖານະການແນວໃດ, ເງື່ອນໄຂແນວໃດສອງຊາດພວກເຮົາ ຈະຍັງສືບຕໍ່ພ້ອມກັນຮັກສາ ແລະ ເສີມຂະຫຍາຍ ນ້ຳໃຈມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ-ລາວ ໃຫ້ໝັ້ນຄົງທະນົງແກ່ນຊົ່ວກາລະນານ.

ໂອກາດດັ່ງກ່າວ,​ ກະຊວງປ້ອງກັນປະເທດ ສສ​ ຫວຽດນາມ​ ຍັງໄດ້ມອບເງິນຈໍານວນ 50.​000​ ໂດລາສະຫະລັດ ເພື່ອຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ພາກກາງ ​ແລະ​ພາກໃຕ້ຂອງລາວອີກດ້ວຍ.​

ຂ່າວ:ສຸກສະຫວັດ-ພາບ:ອ່າຍຄຳ

ທີ່ມາ ຂປລ



LEAVE A REPLY

Please enter your comment!
Please enter your name here