ລັດ​ຖະ​ບານ​ລາວ​ແຕ່ງ​ຕັ້ງ​ຄະ​ນະ​ສະ​ເພາະ​ກິດ ສົ່ງ​ເສີມ​ການ​ຜະ​ລິດ ແລະ ຊົມ​ໃຊ້​ຜະ​ລິດ​ຕະ​ພັນ​ພາຍ​ໃນ

0
153


ເມື່ອ​ທ້າຍ​ເດືອນ​ສິງ​ຫາ 2019 ລັດ​ຖະ​ບານ ແຫ່ງ ສ​ປ​ປ ລາວ ໄດ້​ຕົກ​ລົງ​ແຕ່ງ​ຕັ້ງ​ຄະ​ນະ​ສະ​ເພາະ​ກິດ ສົ່ງ​ເສີມ​ການ​ຜະ​ລິດ ແລະ ຊົມ​ໃຊ້​ຜະ​ລິດ​ຕະ​ພັນ ທີ່​ຜະ​ລິດ​ໄດ້​ຢູ່​ພາຍ​ໃນ ແລະ ການ​ຄຸ້ມ​ຄອງ​ນຳ​ເຂົ້າ​ສິນ​ຄ້າ​ອຸ​ປະ​ໂພກ-ບໍ​ລິ​ໂພກ ເພື່ອ​ຢາກ​ສົ່ງ​ເສີມ​ການ​ຜະ​ລິດ​ພາຍ​ໃນ ໃຫ້​ປະ​ຊາ​ຊົນ​ໄດ້​ມີ​ວຽກ​ເຮັດ​ງານ​ທຳ, ມີ​ລາຍ​ໄດ້, ເປັນ​ການ​ກະ​ຕຸ້ນ​ເສດ​ຖະ​ກິດ ແລະ ຫລຸດ​ຜ່ອນ​ການ​ນຳ​ເຂົ້າ​ຈາກ​ປະ​ເທດ​ເພື່ອນ​ບ້ານ.

​ໃນ​ວັນ​ທີ 1 ພະ​ຈິກ 2019, ທີ່​ນະ​ຄອນ​ຫລວງວຽງ​ຈັນ ທ່ານ ສົມ​ຈິດ ອິນ​ທະ​ມິດ ຮອງ​ລັດ​ຖະ​ມົນ​ຕີ​ ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ ທັງ​ເປັນ​ຮອງ​ຫົວ​ໜ້າ​ຄະ​ນະ​ສະ​ເພາະ​ກິດສົ່ງ​ເສີມ​ການ​ຜະ​ລິດ ແລະ ຊົມ​ໃຊ້​ຜະ​ລິດ​ຕະ​ພັນ ທີ່​ຜະ​ລິດ​ໄດ້​ຢູ່​ພາຍ​ໃນ ແລະ ການ​ຄຸ້ມ​ຄອງ​ນຳ​ເຂົ້າ​ສິນ​ຄ້າ​ອຸ​ປະ​ໂພກ-ບໍ​ລິ​ໂພກ ໄດ້​ໃຫ້​ສຳ​ພາດ​ຕໍ່​ສື່​ມວນ​ຊົນ ​ວ່າ​: ໃນ​ໄລ​ຍະ​ຜ່ານ​ມາ ​ເຫັນ​ໄດ້​ວ່າ​ສະ​ພາບ​ເສດ​ຖະ​ກິດ ໂດຍ​ສະ​ເພາະ​ໃນ​ໄລ​ຍະ​ເວ​ລາ​ເດືອນ​ມິ​ຖຸ​ນາ ຫາ ເດືອນ​ສິງ​ຫາ ຜ່ານ​ມາ ອັດ​ຕາ​ແລກ​ປ່ຽນ​ມີ​ການ​ເໜັງ​ຕີງ​ຫລາຍ ຫລື ເງິນ​ກີບ​ອ່ອນ​ຄ່າ​ຫລາຍ ຫາກ​ທຽບ​ໃສ່​ສະ​ກຸນ​ເງິນ​ບາດ ແລະ ເງິນ​ໂດ​ລາ​, ເມື່ອ​ມາ​ກວດ​ຄືນ​ແລ້ວ ຍ້ອນ​ພວກ​ເຮົາ​ມີ​ຄວາມ​ຕ້ອງ​ການ​ເງິນ​ຕາ​ຕ່າງ​ປະ​ເທດຫລາຍ​ໂພດ ເມື່ອ​ເປັນ​ດັ່ງ​ນັ້ນ​ແລ້ວ ມາ​ເບິ່ງ​ຄືນ​ສະ​ພາບ​ຢູ່​ບ້ານ​ເຮົາ​ເຫັນ​ວ່າ ການ​ຜະ​ລິດ​ສະ​ຫງັກ, ບໍ່​ຕໍ່​ເນື່ອງ, ຢຸດ​ເຊົາ ແລະ ມີ​ການ​ນຳ​ເຂົ້າ​ສິນ​ຄ້າ ເປັນ​ຈຳ​ນວນ​ຫລວງ​ຫລາຍ, ສະ​ນັ້​ນ​ລັດ​ຖະ​ບານ ​ຈຶ່ງ​ໃຫ້​ບັນ​ດາ​ກະ​ຊວງ, ຂະ​ແໜງ​ການ​ຕົ້ນ​ຕໍ​ຫລັກ ເປັນ​ຕົ້ນ​ແມ່ນ ​ກະ​ຊວງ​ການ​ເງິນ, ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ ແລະ ກະ​ຊວງ​ກະ​ສິ​ກຳ ຮ່ວມ​ກັບ​​ກາ​ນ​ນຳນະ​ຄອນ​ຫລວງວຽງ​ຈັນ ເພື່ອ​ຊຸກ​ຍູ້​ການ​ຜະ​ລິດ​ເປັນ​ຕົ້ນ​ແມ່ນ​ ຢູ່​ນະ​ຄອນ​ຫລວງວຽງ​ຈັນ.

 

​ຜ່ານ​ມາ​​ປະ​ເທດ​ເຮົາໄດ້​ນຳ​​ເຂົ້າ​ປະ​ເພດຜັ​ກ, ສະ​ບຽງ​ອາ​ຫານ, ສິນ​ຄ້າ​ຕ່າງໆ ຈາກ​ປະ​ເທດ​ເພື່ອນ​ບ້ານ​ ມາ​ເປັນ​ຈຳ​ນວນ​ຫລວງ​ຫລາຍ, ເຊິ່ງ​ບາງ​ປະເພດ​ເຮົາ​ກໍ​ສາ​ມາດ​ປູກ​ໄດ້ ແຕ່​ປະ​ຊາ​ຊົນ​ກໍ່​ອ່ອນ​ແອ ຍ້ອນ​ວ່າ​ຊື້ ຫລື ນຳ​ເຂົ້າ​ມາ​ອາດ​ຈະ​ຖືກກວ່າ ແລະ ສຸດ​ທ້າຍ​ເຮົາ​ເຫັນ​ວ່າ​ຄວາມ​ຕ້ອງ​ການ ການ​ອຸ​ປະ​ໂພກ​ບໍ​ລິ​ໂພກ ການ​ໃຊ້​ສິ່ງ​ຂອງ​ຕ່າງໆ​ ກໍ່​ແມ່ນ​ຈາກ​ການ​ນຳ​ເຂົ້າ ເພື່ອ​ເປັນ​ການ​ກະ​ຕຸ້ນ​ການ​ຜະ​ລິດ, ເຮັດ​ໃຫ້​ພວກ​ເຮົາ​ມີ​ວຽກ​ເຮັດ​ງານ​ທຳ, ມີ​ຕະ​ຫລາດ​ພາຍ​ໃນ​ຂອງ​ພວກ​ເຮົາ ເຊິ່ງ​ຄະ​ນະ​ຮັບ​ຜິດ​ຊອບ​ດັ່ງ​ກ່າວ ແມ່ນ​ຈະ​ເບິ່ງ​ເລື່ອງ​ກ່ຽວ​ກັບ​ການ​ຄວບ​ຄຸມ​ອັດ​ຕາ​ແລກ​ປ່ຽນ, ຄວາມ​ຕ້ອງ​ການ​ເງິນ​ຕາ​ຕ່າງ​ປະ​ເທດ​ຕ່າງໆ ເຊິ່ງ​ພວກ​ເຮົາ​ໄດ້​ຕິດ​ຕາມ​ເບິ່ງ​ແລ້ວ​ສະ​ເລ່ຍ ໃນ​ແຕ່​ລະ​ມື້​ກ່ອນ​ບໍ່​ທັນ​ໄດ້​ມີ​ຄະ​ນະ​ສະ​ເພາະ​ກິດ ຈະ​ມີ​ການ​ນຳ​ເຂົ້າ​ສິນ​ຄ້າ​ມາ​ຈາກ​ປະ​ເທດ​ເພື່ອນ​ບ້ານໃນ​ຕອນ​ເຊົ້າ​ ຈະ​ມີ​ປະ​ມານ 5-6 ຄັນ ທີ່​ເປັນ​ລົດ​ກະ​ບະ 2 ໂຕນ,  ລົດ​ຮຸ່ນ​ໃດ​ຍາວ ຫລື ເປັນ​ລົດ​ກະ​ບະ​ຕໍ່​ເຕີມ ທີ່​ມີ​ຜ້າ​ບັດ​ປົກ; ໃນ​ຕອນ​ບ່າຍ ຫລື ຕອນ​ແລງ ກໍ່​ຈະ​ມີ​ປະ​ມານ 14-15 ຄັນ ຖື​ວ່າ​ຜັກ​ຕ່າງໆ​ແມ່ນ​ນຳ​ເຂົ້າ​ມາ​ຈາກ​ປະ​ເທດ​ເພື່ອນ​ບ້ານ, ເຊິ່ງ​ໄລ​ຍະ​ນີ້​ແມ່ນ​ລະ​ດູ​ການ​ຜະ​ລິດ ແລະ ລະ​ດູ​ການ​ເກັບ​ກ່ຽວ ສະ​ນັ້ນ​ລັດ​ຖະ​ບານ ​ຈຶ່ງ​ໄດ້​ຕັດ​ສິນ​ໃຈ​ສ້າງ​ຕັ້ງ​ຄະ​ນະ​ສະ​ເພາະ​ກິດ​ນີ້​ຂຶ້ນ​ມາ ເພື່ອ​ດຳ​ເນີນ​ການ​ແກ້​ໄຂວ່າ ຈະ​ເຮັດ​ແນວ​ໃດ​ໃຫ້​ມີ​ການ​ກະ​ຕຸ້ນ​ໃຫ້​ມີ​ການ​ຜະ​ລິດ​ພາຍ​ໃນ.

ສະ​ນັ້ນຄະ​ນະ​ສະ​ເພາະ​ກິດ​ດັ່ງ​ກ່າວ​, ຈຶ່ງ​ມີ​ໜ້າ​ທີ່​ປຶກ​ສາ​ຫາ​ລື ຮ່ວມ​ກັບ​ນະ​ຄອນ​ຫລ​ວງວຽງ​ຈັນ ເພື່ອ​ຈັດ​ຕັ້ງ​ປະ​ຕິ​ບັດ​ນະ​ໂຍ​ບາຍ​ ຊຸກ​ຍູ້​ສົ່ງ​ເສີມການຜະ​ລິດ​ພາຍ​ໃນ, ອັນ​ໃດ​ຜະ​ລິດ​ໄດ້​​ກໍ່​ຄວນ​ໃຫ້​ໂອ​ກາດ​ໃຫ້​ສິນ​ຄ້າ​ພາຍ​ໃນ ສາ​ມາດ​ຈໍ​ລະ​ຈອນ​ຈຳ​ໜ່າຍ​ໄດ້ ແລະ ອັນ​ໃດ​ທີ່​ເຮົາ​ຜະ​ລິດ​ບໍ່​ໄດ້ ຫລື ບໍ່​ມີ ເຮົາ​ກໍ່​ຈຳ​ເປັນ​ຕ້ອງ​ໄດ້​ນຳ​ເຂົ້າ​ມາ. ພ້​ອມ​ນີ້, ຄະ​ນະ​ສະ​ເພາະ​ກິດ​ດັ່ງ​ກ່າວ ໄດ້​ມີ​ການ​ແບ່ງ​ຄວາມ​ຮັບ​ຜິດ​ຊອບ​ເປັນ​ຈຸ ເປັນ​ຕົ້ນ​ມີ​ຈຸ​ຮັບ​ຜິດ​ຊອບ​ຊຸກ​ຍູ້​ການ​ຜະ​ລິດ, ຈຸ​ຮັບ​ຜິດ​ຊອບ​ເຕືອນສະ​ກັດ​ກັ້ນ​ບໍ່​ໃຫ້​ມີ​ການ​ນຳ​ເຂົ້າ ເພື່ອ​ໃຫ້​ພາຍ​ໃນ​ເຮົາ​ໄດ້​ມີ​ໂອ​ກາດ​ຜະ​ລິດ, ພ້ອມ​ນີ້ ກໍ່​ໄດ້​ດຶງ​ກຸ່ມເອົາ​ພໍ່​ຄ້າ ແລະ ​ຜູ້​ຜະ​ລິດ​ໄດ້​ມາ​ພົບ​ກັນ ເພື່ອ​ໃຫ້​ຫລີກ​ລ້ຽງ​ການ​ປູກ ຫລື ຜະ​ລິດ​ອອກ​ມາ​ແລ້ວ​ບໍ່​ມີ​ບ່ອນ​ຂາຍ.

​ຂ່າວ ສົມ​ຫວັງ ພາບ ຂັນ​ໄຊ

ທີ່ມາ ຂປລ



LEAVE A REPLY

Please enter your comment!
Please enter your name here