7 ເດືອນຜ່ານມາ ລາວ ຍັງອາໄສ ນໍາເຂົ້າຊີມັງຈາກຕ່າງປະເທດ ສະໜອງພາຍໃນ

0
230


ສູນ​ຂໍ້​ມູນ-​ຂ່າວສານ​ທາງ​ດ້ານ​ການ​ຄ້າ, ກະຊວງອຸດສາຫະກໍາ ​ແລະ ການ​ຄ້າ ​ໄດ້​ລະບຸ​ວ່າ: ​ໃນປີ 2018 ຜ່ານມາ ມູນຄ່າການນໍາເຂົ້າຊີມັງລວມທັງໝົດຫລາຍກວ່າ 100 ລ້ານໂດລາສະ ຫະລັດ; ໃນຂະນະທີ່ ໃນ 7 ເດືອນຕົ້ນປີ 2019 ມູນຄ່າການນໍາເຂົ້າກວ່າ 42 ລ້ານໂດລາສະຫະລັດ ເຊິ່ງສະແດງໃຫ້ເຫັນວ່າ ສປປ ລາວ ຍັງອາໄສການນໍາເຂົ້າຊີມັງຈາກຕ່າງປະເທດ ເພື່ອສະໜອງຄວາມຕ້ອງການພາຍໃນ ເນື່ອງຈາກການຜະລິດຊີມັງພາຍໃນ ຍັງບໍ່ພຽງພໍ ທັງບໍ່ສາມາດຕອບສະໜອງໄດ້ ທັງດ້ານປະລິມານ ແລະ ຄຸນນະພາບ.

ອີງຕາມສະຖິຕິປີ 2018(ຂໍ້ມູນຈາກກຸ່ມຜູ້ຜະລິດຊີມັງ), ສປປ ລາວ ມີໂຮງງານຊີມັງ 13 ແຫ່ງໃນຂອບເຂດທົ່ວປະເທດ, ແຕ່ມີ 9 ໂຮງງານ ທີ່ມີການເຄື່ອນໄຫວການຜະລິດ ແລະ ຈໍາໜ່າຍ ນັບແຕ່ປີ 2013-2015 ເຊັ່ນ: ປະກອບມີ ໂຮງງານຊີມັງ ຫລວງພະບາງ, ໂຮງງານຊີມັງວັງວຽງຫລັງ 1, 2 ແລະ 3,​ ໂຮງບົດຊີມັງວຽງຈັນ, ໂຮງບົດຊີມັງ BMC ວຽງຈັນ, ໂຮງງງານຊີມັງທ່າແຂກ, ​ໂຮງງານຊີມັງ ສະຫວັນນະເຂດ ແລະ ໂຮງງານຊີມັງສາລະວັນ. ຮອດປີ 2016 ໄດ້ມີການພັດທະນາເພີ່ມຂຶ້ນອີກ 3 ໂຮງງານ ປະກອບມີ ໂຮງງານຊີມັງໄຊຍະບູລີ,​ ໂຮງງານຊີມັງຊຽງຂວາງ ແລະ ໂຮງງານຊີມັງ ​ເມືອງຄູນຄໍາ ແຂວງຄໍາມ່ວນ. ປີ 2017 ​ໄດ້ເພີ່ມຂຶ້ນອີກ 1 ໂຮງງານ ຄື: ໂຮງງານຊີມັງຄໍາມ່ວນ (ກາຊ້າງໄທ) ບໍລິສັດ SCG. ລວມກໍາລັງການຜະລິດ ທັງໝົດຂອງ 13 ໂຮງງານ ແມ່ນ 8.300 ໂຕນ/ປີ. ນອກນັ້ນ ລັດຖະບານ ຍັງໄດ້ອະນຸມັດໃຫ້ສ້າງຕັ້ງໂຮງງານຂຶ້ນອີກ 4 ໂຮງງານ ຢູ່ແຂວງອຸດົມໄຊ, ຫລວງພະບາງ,​ ຄໍາມ່ວນ ແລະ ສະຫວັນນະເຂດ ລວມກໍາລັງການຜະລິດທັງໝົດ 3.700 ໂຕນ/ປີ. ຖ້າທຸກໂຮງງານ ໄດ້ດໍາເນີນການຜະລິດ ລວມຜົນຜະລິດຊີມັງທັງໝົດ ຈະມີປະມານ 12.000 ໂຕນ/ປີ.

ສຳລັບປະລິມານການຜະລິດຊີມັງ ໃນທົ່ວປະເທດ​ ປີ 2013 ແມ່ນ 1.500 ໂຕນ, ປີ 2014 ແມ່ນ 1.800 ໂຕນ, ປີ 2015 ແມ່ນ 2.000 ກວ່າໂຕນ, ປີ 2016 ແມ່ນ 1.800 ກວ່າໂຕນ, ປີ 2017 ແມ່ນ 3.300 ກວ່າໂຕນ. ເຊິ່ງໄດ້ຊີ້ໃຫ້ເຫັນໃນບັນດາ 13 ໂຮງງານ ທີ່ລວມກໍາລັງການຜະລິດທັງໝົດ 8.300 ໂຕນ/ປີ ແຕ່ການຜະລິດຕົວຈິງ ໄດ້ພຽງ 3.300 ໂຕນ/ປີ ແລະ ປະຕິບັດບໍ່ໄດ້ 5 ລ້ານໂຕນ ເຊິ່ງສະແດງໃຫ້ເຫັນວ່າ ການຜະລິດຂອງແຕ່ລະໂຮງງານ ຍັງບໍ່ສາມາດເຮັດໄດ້ເຕັມກໍາລັງ ຫລື ຍ້ອນປັດໄຈອື່ນ. ການນໍາເຂົ້າຊີມັງ ໃນມູນຄ່າກວ່າ 100 ລ້ານໂດລາສະຫະລັດ ໃນປີ 2018 ທີ່ຜ່ານມາ ເຊິ່ງເປັນມູນຄ່າທີ່ມະຫາສານ ໃນການນໍາເຂົ້າສິນຄ້າປະເພດນີ້ ຕະຫລອດ 7 ປີຜ່ານມາ.

ຢ່າງໃດກໍຕາມ ກະຊວງອຸດສາຫະກໍາ ​ແລະ ການ​ຄ້າ ຊີ້ໃຫ້ເຫັນຕື່ມວ່າ: ປີ 2019 ການນໍາເຂົ້າຊີມັງຍັງມີແນວໂນ້ມເພີ່ມຂຶ້ນເລື້ອຍໆ ສະເພາະເດືອນມັງກອນ 4,8 ລ້ານໂດລາສະຫະລັດ, ມາຮອດ ເດືອນ ກໍລະກົດ ເພີ່ມຂຶ້ນເປັນ 11 ລ້ານກວ່າໂດລາສະຫະລັດ ເຊິ່ງການນໍາເຂົ້າຊີມັງບໍ່ມີທ່າທີຈະຫລຸດລົງ. ປະຈຸບັນ ລັດຖະບານລາວ ໄດ້ຍົກເລີກການອອກໃບອະນຸຍາດນໍາເຂົ້າຊີມັງ ໝາຍຄວາມວ່າ ຜູ້ນໍາເຂົ້າສາມາດແຈ້ງນໍາເຂົ້າຢູ່ດ່ານສາກົນເລີຍ ໂດຍບໍ່ຈໍາເປັນຕ້ອງມາຂໍອະນຸຍາດນໍາເຂົ້າ ກັບຂະ ແໜງການກ່ຽວຂ້ອງ. ການຍົກເລີກການອອກໃບອະນຸຍາດນໍາເຂົ້າຊີມັງ ແມ່ນເປັນມາດຕະການໜຶ່ງຂອງວຽກງານອໍານວຍ ຄວາມສະດວກທາງດ້ານການຄ້າ ເພື່ອຫລຸດຂັ້ນຕອນການນໍາເຂົ້າ ສາມາດປະ ຢັດເວລາ ແລະ ຄ່າໃຊ້ຈ່າຍທີ່ບໍ່ຈໍາເປັນ. ແຕ່ອາດຈະເປັນການສົ່ງເສີມການນຳເຂົ້າ-ບໍລິໂພກ ສິນຄ້າ ຈາກຕ່າງປະເທດ ຫລື ບໍ່?.

ທີ່ມາ ຂປລ



LEAVE A REPLY

Please enter your comment!
Please enter your name here