ເຢຍ​ລະ​ມັນ ຊ່ວຍເຫຼືອລາວ ​ມູນ​ຄ່າ ປະມານ 487 ຕື້​ກີບ ຫຼື 50 ລ້ານ​ເອີ​ໂຣ

0
357

ລາວ ແລະ ສ ເຢຍ​ລະ​ມັນ ໄດ້​ມີ​ມູນເຊື້ອ​ສາຍ​ພົວພັນ​ອັນ​ດີງາມ ແໜ້ນ​ແຟ້ນ ສະເໝີ​ຕົ້ນ​ສະເໝີ​ປາຍ​ນັບ​ແຕ່​ປີ 1963 ເປັນຕົ້ນ​ມາ ເຊິ່ງ​ສອງ​ຝ່າຍ​ໄດ້​ເປັນ​ເອກະ​ພາບ​ກ່ຽວ​ກັບ​ແນວທາງ​ຍຸດ​ທະ​ສາດ​ການ​ຮ່ວມ​ມື​ໃນ​ຂອບ​ສອງ​ຝ່າຍ ແລະ ຫຼາຍ​ຝ່າຍ ເພື່ອ​ສຸມ​ໃສ່​ຫຼຸດຜ່ອນ​ຄວາມທຸກ​ຍາກ ການ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ແລະ ການ​ຫຼຸດ​ພົ້ນ​ອອກ​ຈາກ​ສະພາບ​ປະເທດ​ດ້ອຍ​ພັດທະນາ ຂອງ ​ສປປ ລາວ.

ເພື່ອ​ສືບຕໍ່​ການ​ຮ່ວມ​ມື​ທີ່​ດີ ແລະ ສະແດງ​ໃຫ້​ເຫັນ​ການ​ຮ່ວມ​ມື​ລາວ-ເຢຍ​ລະ​ມັນ ທີ່​ນັບ​ມື້​ເພີ່ມ​ຂຶ້ນ ວັນ​ທີ 28 ກຸມພາ 2019 ຢູ່​ກະຊວງ​ແຜນການ ແລະ ການ​ລົງທຶນ (​ຜທ) ທ່ານ ສຸພັນ ແກ້ວ​ມີ​ໄຊ ລັດຖະມົນຕີ ກະຊວງ ​ຜທ ໄດ້​ຕ້ອນຮັບ​ທ່ານ Norbert Barthle ເລຂາທິການ​ລັດ​ຖະ​ສະພາ​ເຢຍ​ລະ​ມັນ ພ້ອມ​ຄະນະ ພ້ອມ​ທັງ​ຮ່ວມ​ກັນ​ເປັນ​ສັກຂີ​ພິຍານ​ການ​ລົງ​ນາມ​ສັນຍາ​ວ່າ​ດ້ວຍ​ການ​ຮ່ວມ​ມື​ດ້ານ​ການ​ເງິນ ແລະ ສັນຍາ​ວ່າ​ດ້ວຍ​ການ​ຮ່ວມ​ມື​ດ້ານ​ວິຊາ​ການ ເຊິ່ງ​ລົງ​ນາມ​ໂດຍ​ທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະມົນຕີ ກະຊວງ ​ຜທ ແລະ ທ່ານ Jens Lutkenherm ເອກ​ອັກ​ຄະ​ລັດ​ຖະ​ທູດ​ເຢຍ​ລະ​ມັນ ປະຈຳ​ລາວ.

ການ​ສະໜັບສະໜູນ​ດ້ານ​ການ​ເງິນ ແລະ ດ້ານ​ວິຊາ​ການ​ຂອງ​ລັດຖະບານ​ເຢຍ​ລະ​ມັນ​ຄັ້ງ​ນີ້ ມີ​ມູນ​ຄ່າ ປະມານ 487 ຕື້​ກີບ ຫຼື 50 ລ້ານ​ເອີ​ໂຣ ໄລຍະ​ຈັດ​ຕັ້ງ​ປະຕິບັດ​ແຕ່​ປີ 2018-2020 ໂດຍ​ໄດ້​ເຊື່ອມ​ສານ​ເຂົ້າ​ໃນ​ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ 8 (2015-2020) ຂອງ​ລາວ ໃນ​ນີ້​ໄດ້​ສຸມ​ໃສ່ 2 ຂົງເຂດ​ບຸລິມະສິດ​ຄື: ການ​ພັດທະນາ​ເສດຖະກິດ​ແບບ​ຍືນ​ຍົງ ແລະ ການ​ພັດທະນາ​ເຂດ​ຊົນນະບົດ ພິເສດ​ສຳລັບ​ປີ 2018-2020 ລັດຖະບານ​ເຢຍ​ລະ​ມັນ ຍັງ​ໄດ້​ຊ່ວຍເຫຼືອ​ຟື້ນ​ຟູ​ພື້ນຖານ​ໂຄງ​ລ່າງ​ຢູ່​ພາກ​ໃຕ້​ຂອງ ລາວ ມູນ​ຄ່າ​ປະມານ 97 ຕື້​ກີບ ຫຼື 10 ລ້ານ​ເອີ​ໂຣ. ຂອບໃຈຂໍ້ມູນຈາກ: ນສພ ວຽງຈັນໃຫ່ມ

LEAVE A REPLY

Please enter your comment!
Please enter your name here