28 C
Vientiane
ວັນອັງຄານ, ເດືອນມີນາ 15, 2021

ມີພວກເພິ່ນວັນນັ້ນຈຶ່ງມີພວກເຮົາໃນວັນນີ້..!! ຊົມເຊີຍວັນຜູ້ນຳປະຕິວັດລາວແຫກຄຸກ ຄົບຮອບ 61ປີ ຢ່າງສຸດໃຈ

Array

ພາຍຫຼັງທີ່ກອງພັນທີ 2 ຂອງຝ່າຍປະເທດລາວຜ່າວົງປິດລ້ອມອອກຈາກທົ່ງໄຫຫີນຊຽງຂວາງກັບຄືນສູ່ເຂດທີ່ໝັ້ນ, ຝ່າຍກົງກັນຂ້າມໄດ້ຖືເອົາກໍລະນີດັ່ງກ່າວສວຍໂອກາດສັ່ງການໃຫ້ຕໍາຫຼວດຂອງພວກເຂົາປິດລ້ອມເຮືອນຂອງບັນດາຜູ້ນໍາຢ່າງເຄັ່ງຄັດ. ພາຍຫຼັງທີ່ຜຸຍ ຊະນະນິກອນ ຂໍສິດເຮັດວຽກພິເສດຈາກສະພາຜູ້ແທນລາດຊະດອນກໍານົດ 1 ປີ, ໂດຍອີງໃສ່ເງື່ອນໄຂດັ່ງກ່າວ ຜຸຍຊະນະນິກອນໄດ້ອອກຄໍາສັ່ງໃຫ້ ພັນເອກ ລໍາເງິນ ຜູ້ບັນຊາການສາລະວັດທະຫານຈັບບັນດາຜູ້ນໍາຂອງແນວລາວຮັກຊາດໄປກັກຂັງຢູ່ຄຸກໂພນເຄັງ. ເພື່ອກຽມກັກຂັງຜູ້ນໍາຂອງພັກ ແລະ ແນວລາວຮັກຊາດ, ພວກເຂົາໄດ້ດັດແປງຄອກມ້າຝຣັ່ງທີ່ຕັ້ງຢູ່ໃຈກາງຄ້າຍໂພນເຄັງ ໃຫ້ກາຍເປັນຄຸກຄຸມຂັງເຊິ່ງແຕ່ລະຫ້ອງມີລວງຍາວ 3 ແມັດ, ກວ້າງ 2 ແມັດ ແລະ ແຫນ້ນໜາທີ່ສຸດ, ແຕ່ລະຫ້ອງຄຸມຂັງໃສ່ກະແຈເຂົາຄວາຍຢ່າງດີ, ມີຮົ້ວ 2 ຊັ້ນ, ນອກນັ້ນຍັງມີຕໍາຫຼວດ ທະຫານ, ກອງຮ້ອຍລົດອາແອມ 1 ກອງຮ້ອຍ ແລະ ສາລະວັດທະຫານ 1 ກອງຮ້ອຍ ເຮັດໜ້າທີ່ເວນຍາມຕະຫຼອດ 24 ຊົ່ວໂມງ, ອ້ອມຮອບຄຸກມີໂຄມໄຟສະປອດໄລ້ໃຫຍ່ທັງ 4 ດ້ານເຮັດໃຫ້ຍາມກາງຄືນແຈ້ງປານກາງເວັນ ແລະ ມີລົດຫຸ້ມເກາະເວນຍາມຢ່າງເຄັ່ງຄັດ.

ຈາກສະພາບການດັ່ງກ່າວສູນກາງພັກຈຶ່ງຫັນການຊີ້ນໍາເພື່ອປົກປັກຮັກສາບັນດາຜູ້ນໍາດັ່ງກ່າວໂດຍການຕໍ່ສູ້ທາງການເມືອງເປັນຕົ້ນຕໍດ້ວຍການຍຶດໝັ້ນເອົາສັນຍາຕ່າງໆ ແລະ ປຸກລະດົມຂະບວນການຂອງມະຫາຊົນກໍ່ຫາງສຽງວິພາກວິຈານກ່າວປະນາມລັດຖະບານວຽງຈັນ ແລະ ເຮັດໃບປິວ ອາໄສພື້ນຖານການປະຕິວັດເຮົາທີ່ອອກໄປຢູ່ບ້ານຊ່ອງ ແລະ ຍາດພີ່ນ້ອງເປັນຜູ້ເຄື່ອນໄຫວສົມທົບໃສ່ກັບການຊອກຫາທະນາຍຄວາມທັງພາຍໃນ ແລະ ຕ່າງປະເທດທີ່ຍຶດໝັ້ນໃນຄວາມເປັນທໍາຊ່ວຍຕໍ່ສູ້ປົກປ້ອງ ແລະ ສ້າງເງື່ອນໄຂໃຫ້ບັນດາຜູ້ນໍາແຫກຄຸກເປັນຕົ້ນຕໍ. ໃນໄລຍະດຽວກັນນັນສູນກາງພັກໄດ້ຊີ້ນໍາໃຫ້ເຮັດວຽກງານການເມືອງຂົນຂວາຍເອົາສາລະວັດທະຫານທີ່ປ້ອງກັນເວນຍາມຄຸກ ແລະ ກະກຽມເສັ້ນທາງແຕ່ເຂດທີ່ໝັ້ນພື້ນຖານການປະຕິວັດພູພະນັງ, ດ່ານສູງຢ່າງປິດລັບຈົນເຖິງຄຸກໂພນເຄັງ. ຮອດທ້າຍປີ 1959 ໄດ້ມີກອງປະຊຸມປິດລັບລະຫວ່າງພະນັກງານເຄື່ອນໄຫວແນວຫຼັງສັດຕູໂດຍການເປັນປະທານຂອງທ່ານ ສາລີ ວົງຄໍາຊາວ. ໃນກອງປະຊຸມນອກຈາກລາຍງານສະພາບການເຄື່ອນໄຫວຂອງແຕ່ລະຄົນແລ້ວ ຍັງໄດ້ສ້າງຄວາມຕັດສິນໃຈເດັດດ່ຽວຕ້ອງເອົາຜູ້ນໍາຢູ່ຄຸກໂພນເຄັງອອກໃຫ້ໄດ້.

ແຕ່ຍັງເສັ້ນທາງທີ່ຈະນໍາເອົາຜູ້ນໍາອອກສູ່ເຂດທີ່ໝັ້ນຍັງບໍ່ທັນຮັບປະກັນເທື່ອ, ສະນັ້ນ ໃນກອງປະຊຸມຈຶ່ງໄດ້ມອບຫມາຍວຽກລະອຽດຄື ທ່ານ ສາລີ ວົງຄໍາຊາວ ຮັບຜິດຊອບຊີ້ນໍາບັນຊາ ແລະ ຕິດຕໍ່ກັບສູນກາງຢ່າງເປັນປົກກະຕິ, ທ່ານ ຊຽງສົມ ກຸນລະວົງຊີ້ນໍາການຖອນຕົວອອກຈາກນະຄອນຫຼວງວຽງຈັນເພື່ອສ້າງເສັ້ນທາງຈະເອົາຜູ້ນໍາອອກ, ທ່ານ ຊຽງພຽນ ສືບຕໍ່ປຸກລະດົມຂະບວນການຕໍ່ສູ້ຂອງມວນຊົນ, ຮັບປະກັນການຕິດຕໍ່ລະຫວ່າງຄະນະປະຈໍາການຊີ້ນໍາກັບຜູ້ນໍາໃນຄຸກ, ກໍາແໜ້ນສະພາບການຂອງສັດຕູ ແລະຈິດໃຈຂອງສາລະວັດທີ່ຍາມຄຸກ, ການກະກຽມດັ່ງກ່າວໄດ້ເລີ່ມຕົ້ນແຕ່ເດືອນມັງກອນ ແລະ ສໍາເລັດໃນເດືອນມີນາ 1960 ຖືວ່າແຜນການກະກຽມໄດ້ 95% ແລ້ວຍັງແຕ່ແຜນຫຼອກສັດຕູເພື່ອເອົາຜູ້ນໍາອອກເທົ່ານັ້ນ. ເພື່ອຮັບປະກັນສູນກາງພັກຈຶ່ງໄດ້ຈັດຕັ້ງເອົາ 2 ກອງຮ້ອຍຂອງກອງພັນທີ 2 ຜ່າວັງປິດລ້ອມໃນເມື່ອກ່ອນເປັນກໍາລັງເພີ່ມທະວີກຽມພ້ອມສູ້ຮົບປົກປ້ອງຜູ້ນໍາໃນເວລາອອກຄຸກຖ້າມີຄວາມຈໍາເປັນ. ພ້ອມກັນນັ້ນ ກໍປ່າວຂ່າວຫຼອກສັດຕູວ່າ ທ່ານເຈົ້າສຸກ ວົງສັກ ໄດ້ນໍາເອົາທະຫານຫວຽດນາມ 2 ກອງພັນມາຮອດພູຫວດ, ພູແຊແລ້ວເພື່ອປົດປ່ອຍຕົວເມືອງວຽງຈັນ ແລະ ຍາດເອົາຜູ້ນໍາຂອງແນວລາວຮັກຊາດ. ເພື່ອເຮັດໃຫ້ສັດຕູເຊື່ອວ່າແມ່ນຄວາມຈິງ ພວກເຮົາໄດ້ແຕ່ງເອົາ 1 ໝວດໄປຫຼອນຕີຄ້າຍທະຫານສັດຕູຢູ່ພູເຂົາຄວາຍອັນເຮັດໃຫ້ສັດຕູກະວົນກະວາຍກຽມແຜນການເພື່ອຮັກສານະຄອນຫຼວງວຽງຈັນຢ່າງເຄັ່ງຄັກໂດຍສະເພາະແມ່ນສຸມໃສ່ເບື້ອງພູເຂົາຄວາຍ. ສວຍໂອກາດດັ່ງກ່າວສູນກາງພັກໄດ້ສັ່ງເດັດຂາດຕ້ອງເອົາຜູ້ນໍາອອກຄຸກບໍ່ໃຫ້ກາຍເດືອນພຶດສະພາ 1960 .

ເມື່ອໄດ້ຮັບຄໍາສັ່ງດັ່ງກ່າວແລ້ວຈຶ່ງໄດ້ແບ່ງວຽກລະອຽດໃຫ້ແຕ່ລະຄົນ, ເຖິງຕອນທ່ຽງຂອງວັນທີ 24 ພຶດສະພາ 1960 ຈ່າເອກ ອຸດອນໄດ້ເອົາຈົດໝາຍນ້ອຍຂອງທ່ານ ໜູຮັກ ພູມສະຫວັນ ນັດກັນຊຶ່ງໄດ້ກໍານົດເອົາຄໍ່າຄືນຂອງມື້ນັ້ນຕ້ອງອອກຄຸກ, ທຸກສິ່ງທຸກຢ່າງຕ້ອງກວດກາລະອຽດ ແລະ ໃຫ້ມີຄວາມປອດໄພ 100%, ໃຫ້ປຶກສາຫາລືກັບ ຈ່າເອກ ອຸດອນ ກ່ຽວກັບດອກໄຟຕາເສືອ 2 ດອກ ໄຕ້ຢູ່ທາງເຂົ້າຄຸກ ຖ້າມັນເຄີຍມອດເລື້ອຍໆກໍຄວນມອດກ່ອນເວລາອອກ, ຖ້າບໍ່ເຄີຍມອດແມ່ນປະໄວ້ຄືເກົ່າ. ສ່ວນລົດຫຸ້ມເກາະ 2 ຄັນຢູ່ປາກປະຕູແມ່ນໃຫ້ອ້າຍນ້ອງສາລະວັດລະດົມນັກຂັບລົດມອດໄຟຕາ ແລະ ເຖິງເວລາ 20 ໂມງຂອງຄືນນັ້ນ, ຂ້າພະເຈົ້າໄດ້ເປັນຜູ້ເຂົ້ານໍາເອົາບັນດາຜູ້ນໍາອອກ ແລະ ຈ່າເອກ ອຸດອນ ເປັນຜູ້ຕ້ອນເອົາຢູ່ຮ້ານກາເຟໃກ້ກັບປະຕູຄ້າຍໂພນເຄັງ ແລະ ການແຫກຄຸກຂອງຜູ້ນໍາໄດ້ເລີ່ມແຕ່ເວລານັ້ນເປັນຕົ້ນໄປ. ການແຫກຄຸກໂພນເຄັງຂອງບັນດາຜູ້ນໍາແນວລາວຮັກຊາດເປັນເຫດການປະຫວັດສາດທີ່ມີຄວາມ ໝາຍ, ຄວາມສໍາຄັນ, ແມ່ນໝາກຜົນແຫ່ງການຊີ້ນໍາ-ນໍາພາຢ່າງໃກ້ຊິດຂອງສູນກາງພັກ ແລະ ຍ້ອນຄວາມຕັດສິນໃຈອັນສູງສົ່ງ, ຄວາມມີໄຫວພິກສະຫຼາດສະຫຼຽວຂອງບັນດາສະຫາຍພະນັກງານທີ່ໄດ້ຮັບການມອບຫມາຍໃຫ້ປະຕິບັດໜ້າທີ່ໃນການເອົາຜູ້ນໍາອອກຈາກຄຸກ. ພ້ອມກັນນັ້ນກໍແມ່ນໝາກຜົນແຫ່ງຄວາມມານະພະຍາຍາມຂອງບັນດາຜູ້ນໍາຢູ່ໃນຄຸກທີ່ໄດ້ຕັ້ງໜ້າສຶກສາອົບຮົມຂົນຂວາຍເອົາບັນດາສາລະວັດທະຫານໃຫ້ມີຄວາມຕື່ນຕົວມາເປັນໃຈເຮົາ.

ທີ່ມາ: ຂ່າວ ກອງທັບ

Latest news

- Advertisement -spot_img

Related news

- Advertisement -spot_img

LEAVE A REPLY

Please enter your comment!
Please enter your name here