ນັກທ່ອງທ່ຽວຈີນທີ່ປະສົບອຸບັດຕິເຫດລົດໂດຍສານຕົກເຫວໄດ້ກັບຈີນໝົດແລ້ວ

0
122



ຕາມຂ່າວ CRI: ຕອນບ່າຍວັນທີ 24 ສິງຫານີ້, ຜູ້ບາດເຈັບຊາວຈີນໃນອຸບັດຕິເຫດລົດໂດຍສານນັກທ່ອງທ່ຽວຈີນຕົກເຫວຈຳນວນ 5 ຄົນສຸດທ້າຍພ້ອມຄອບຄົວ ໄດ້ຂີ່ຍົນຈາກນະຄອນຫຼວງພະບາງມຸ່ງໜ້າສູ່ນະຄອນ ນານກິງ ແຂວງຈ່ຽງຊູ ສປ ຈີນ ແລະເດີນທາງຮອດສະໜາມບິນ ນານກິງ ໃນຕອນຄ່ຳຂອງວັນດັ່ງກ່າວດ້ວຍຄວາມສະຫວັດດີພາບ.

ກ່ອນໜ້ານີ້ບໍ່ດົນ, ຜູ້ບາດເຈັບຊາວຈີນສ່ວນຫຼາຍໄດ້ຂີ່ຍົນພົນລະເຮືອນ ແລະຍົນເຮລີຄອບເຕີກອງທັບປົດປ່ອຍປະຊາຊົນຈີນ ກັບຄືນປະເທດແລ້ວ ຄື: ຕອນບ່າຍວັນທີ 23 ສິງຫາ, ຜູ້ບາດເຈັບ ຈຳນວນ 20 ຄົນໄດ້ຂີ່ຍົນຂອງສາຍການບິນ ອິສເທີນ ແອໄລ ຂອງຈີນ ເດີນທາງຈາກນະຄອນຫຼວງວຽງຈັນ ມຸ່ງໜ້າສູ່ນະຄອນ ນານກິງ,

ແລະໃນຕອນບ່າຍຂອງວັນທີ 22 ສິງຫາ, ຜູ້ບາດເຈັບ ຈຳນວນ 4 ຄົນ ເຊິ່ງເປັນຜູ້ບາດເຈັບສາຫັດ ໄດ້ຂີ່ຍົນຂອງສາຍການບິນ ອິສເທີນ ແອໄລ ແລະຍົນເຮລີຄອບເຕີກອງທັບປົດປ່ອຍປະຊາຊົນຈີນ ເດີນທາງຈາກນະຄອນຫຼວງວຽງຈັນມຸ່ງໜ້າສູ່ນະຄອນ ຄຸນໝິງ ແຂວງ ຢຸນນານ ສປ ຈີນ ເພື່ອດຳເນີນການປິ່ນປົວຕໍ່. ສ່ວນຜູ້ບາດເຈັບເບົາຈຳນວນ 2 ຄົນໄດ້ຂີ່ຍົນກັບຈີນພາຍຫຼັງເກີດອຸບັດຕິເຫດບໍ່ດົນ.

ຂ່າວແຈ້ງວ່າ: ວັນທີ 19 ສິງຫາ 2019ນີ້, ລົດໂດຍສານທີ່ໄດ້ບັນທຸກນັກທ່ອງທ່ຽວຈີນ ຈາກນະຄອນຫຼວງວຽງຈັນມຸ່ງໜ້າສູ່ນະຄອນຫຼວງພະບາງ ໄດ້ເກີດອຸບັດຕິເຫດຢ່າງຮ້າຍແຮງ ທີ່ເສັ້ນທາງກາສີ-ເມືອງນານ ຂະນະທີ່ເດີນທາງຮອດຂົວນໍ້າງາວ, ເຊິ່ງເຮັດໃຫ້ຄົນຈີນ 13 ຄົນເສຍຊີວິດ ແລະ 31 ຄົນໄດ້ຮັບບາດເຈັບ.

ຂ່າວ ແລະ ພາບ:ທ.ຍາວ

LEAVE A REPLY

Please enter your comment!
Please enter your name here