ເມືອງແບງ ໄດ້ຮັບຜົນກະທົບໜັກ ຈາກເຫດນ້ຳຖ້ວມ

0
134


ເລີ່ມແຕ່ເວລາ 5:00 ຫາ 8:00 ເຊົ້າຂອງວັນທີ 17 ສິງຫາ ຢູ່ເມືອງແບງ ແຂວງອຸດົມໄຊ ໄດ້ເກີດຝົນຕົກໜັກ ແລ້ວເກີດມີນ້ຳປ່າໄຫຼຫຼັ່ງ ຖ້ວມເນື້ອທີ່ການຜະລິດ, ເຮືອນຊານບ້ານຊ່ອງ, ລວມເຖິງພື້ນຖານໂຄງລ່າງຈຳນວນໜຶ່ງພາຍໃນເມືອງ ໄດ້ຮັບຜົນເສຍຫາຍໜັກ.

ຜ່ານການລົງກວດກາຂອງການນຳເມືອງຮ່ວມກັບການນຳແຂວງໃນເບື້ອງຕົ້ນເຫັນວ່າ ມີ ບັນດາບ້ານ, ສຳນັກງານອົງການ ທີ່ໄດ້ຮັບຜົນກະທົບໜັກສົມຄວນ ໃນນັ້ນລວມມີ: ໂຮງໝໍເມືອງ ຖຶກນ້ຳຖ້ວມອຸປະກອນການແພດໄດ້ຮັບຄວາມເສຍຫາຍ, ບ້ານ ຫ້ວຍລາ ນ້ຳຖ້ວມເຮືອນ, ນ້ຳເຊາະເຈື່ອນເຮືອນຈຳນວນ 1 ຫຼັງ, ບ້ານ ນາຫ້ວຍ ເຮືອນຖືກນ້ຳເຊາະເຈື່ອນເສຍຫາຍ 4 ຫຼັງ ໃນນີ້: ເຊາະເຈື່ອນຫາຍໄປກັບນ້ຳ 2 ຫຼັງ, ບ້ານ ທ່າກາດ ນ້ຳຖ້ວມເຮືອນປະຊາຊົນ ແລະ ຫຼາຍບ້ານເຂດລຽບທາງຫຼວງແຫ່ງຊາດ, ເນື້ອທີ່ນາ ເຂດລ່ອງນ້ຳແບງ, ນ້ຳຫາວ, ເຂດນາໂຮມ ຫຼາຍບ້ານຖືກນ້ຳຖ້ວມ, ເຊາະເຈື່ອນ, ເສັ້ນທາງ ເຂດນາໂຮມ ຂາດ 3 ຈຸດ, ຂົວນ້ຳຫາວ ທາງເລກ 2 ຖືກເຊາະເຈື່ອນ, ນ້ຳປະປາໃນເທດສະບານເມືອງ ຖືກຕັດຂາດ, ໜອງປາ, ສັດລ້ຽງ ຂອງປະຊາຊົນຈຳນວນໜຶ່ງຖືກເສຍຫາຍ. ສ່ວນປະຊາຊົນແມ່ນປອດໄພບໍ່ມີຜູ້ໄດ້ຮັບບາດເຈັບ ແລະ ເສຍຊີວິດ.

ຈາກເຫດການດັ່ງກ່າວ ທາງເມືອງກໍໄດ້ຈັດສົ່ງກຳລັງທະຫານ, ຕຳຫຼວດ, ພະນັກງານ-ລັດຖະກອນ ລົງຊ່ວຍເຫຼືອປະຊາຊົນທີ່ໄດ້ຮັບຜົນກະທົບ, ສ່ວນລາຍລະອຽດ ຜົນເສຍຫາຍຈະລາຍງານໃຫ້ທ່ານຮັບຊາບຕາມພາຍຫຼັງ.

ຂ່າວ: ໄມພອນ



LEAVE A REPLY

Please enter your comment!
Please enter your name here