ເຈົ້າໜ້າທີ່ ປກສ ບ້ານນາຊອນ ສົມທົບກັບການຈັດຕັ້ງບ້ານໝາກນາວເໜືອ ເມືອງປາກງື່ມ ແລະ ພາກສ່ວນກ່ຽວຂ້ອງ ເຂົ້າກັກຕົວ ທ້າວ ບຸນປອນ ລັກງົວ ພ້ອມຂອງກາງງົວ 2 ໂຕ

0
631


ເຈົ້າໜ້າທີ່ ປກສ ບ້ານນາຊອນ ສົມທົບກັບການຈັດຕັ້ງບ້ານໝາກນາວເໜືອ ເມືອງປາກງື່ມ ແລະ ພາກສ່ວນກ່ຽວຂ້ອງ ເຂົ້າກັກຕົວ ທ້າວ ບຸນປອນ ຫຼື ບຸນຫຼາຍ ອາຍຸ 29 ປີ ປະຊາຊົນຢູ່ບ້ານໝາກນາວເໜືອ ໃນຂະນະທີ່ນັ່ງລໍຖ້າຂາຍງົວ 2 ໂຕ ທີ່ລັກມາໃຫ້ພໍ່ຄ້າທີ່ຈະມາຊື້ໃນວັນທີ 6 ກຸມພາ 2019.
ເຈົ້າໜ້າທີ່ ປກສ ເມືອງປາກງື່ມ ນະຄອນຫຼວງວຽງຈັນ ໄດ້ໃຫ້ຮູ້ວ່າ: ກ່ອນທີ່ຈະກັກຕົວ ທ້າວບຸນປອນ ໃນຂໍ້ຫາລັກຊັບ (ງົວ) ໄດ້ສືບເນື່ອງມາຈາກ ປະຊາຊົນຜູ້ທີ່ເຫັນເຫດການໄດ້ເຂົ້າແຈ້ງຕໍ່ການຈັດຕັ້ງບ້ານໝາກນາວເໜືອວ່າສັງເກດເຫັນ ທ້າວ ບຸນປອນ ລັກຈູງງົວຂອງຄົນອື່ນໄປຂາຍ ເຮັດຄືກັບວ່າເປັນງົວຂອງຕົນເອງ,ດັ່ງນັ້ນ, ການຈັດຕັ້ງບ້ານໝາກນາວເໜືອ ຈຶ່ງໄດ້ສົມທົບກັບ ປກສ ບ້ານ ນາຊອນ ເຂົ້າກັກຕົວຜູ້ກ່ຽວໄດ້ໃນຂະນະທີ່ນັ່ງລໍຖ້າຂາຍງົວທີ່ລັກມາສົ່ງໃຫ້ ປກສ ເມືອງປາກງື່ມ ເພື່ອດໍາເນີນຄະດີຕາມລະບຽບກົດໝາຍ.

ທ້າວ ບຸນປອນ ໄດ້ຍອມຮັບສາລະພາບຕໍ່ເຈົ້າໜ້າທີ່ວ່າ: ໃນວັນທີ 6 ກຸມພາ 2019 ເວລາ 5:00-6:00 ໂມງ ຕົນໄດ້ໄປລັກເອົາງົວ 2 ໂຕ, ສີແດງ ນໍ້າໜັກໂຕລະປະມານ 100 ກິໂລ, ຢູ່ແຖວທົ່ງນາບ້ານໝາກນາວເໜືອແລ້ວໄດ້ຈູງຍ່າງລັດເຂົ້າປ່າ ອອກໄປຕາມແຄມທາງ ບ້ານໂນນສູງລັດເຂົ້າປ່າຊ້າ ບ້ານ ນາຊອນ ແລ້ວຂ້າມເສັ້ນທາງ 13 ໃຕ້ ໄປບ້ານດອນໄຮ່ ອອກໃສ່ບ້ານນາທາມ ຈົນຮອດເວລາປະມານ 11:00 ໂມງ ກໍໄດ້ມັດງົວໄວ້ແຄມທາງ ແລ້ວນັ່ງລໍຖ້າຂາຍງົວໃຫ້ພໍ່ຄ້າ, ຈຶ່ງຖືກ ປກສ ບ້ານ ແລະ ພາກສ່ວນກ່ຽວຂ້ອງເຂົ້າກັກຕົວ.ທ້າວ ບຸນປອນ ຍັງຮັບສາລະພາບອີກວ່າ: ກ່ອນຈະຖືກກັກຕົວແມ່ນໄດ້ເຄື່ອນໄຫວລັກງົວມາແລ້ວ 6 ຄັ້ງ ມີງົວ 6 ໂຕ ໄດ້ເງິນຫຼາຍລ້ານກີບ; ໃນນີ້ລັກງົວຂອງເອື້ອຍຕົນເອງ 3 ຄັ້ງ, ວິທີການລັກແມ່ນຈະເຂົ້າໄປມັດເອົາແລ້ວຈູງຍ່າງໄປຂາຍໃຫ້ພໍ່ຄ້າ ເຮັດຄືວ່າເປັນງົວຂອງຕົນເອງ, ສ່ວນເງິນທີ່ໄດ້ຈາກການຂາຍງົວແມ່ນເອົາໄປໃຊ້ຈ່າຍທ່ຽວຫຼິ້ນຈົນໝົດ.ປັດຈຸບັນ ຄະດີລາຍນີ້ ແມ່ນຢູ່ໃນຂັ້ນຕອນສອບສວນຂະຫຍາຍຜົນ ເພື່ອຊອກຫາກຸ່ມຄົນທີ່ຮັບຊື້ງົວ ມາດໍາເນີນຄະດີຕາມລະບຽບກົດໝາຍ. ຂອບໃຈຂໍ້ມູນຈາກ: ປກສ ນະຄອນຫລວງ



LEAVE A REPLY

Please enter your comment!
Please enter your name here