ພົບພະຍາດອະຫິວາໝູອາຟຣິກາ ລະບາດຢູ່ ແຂວງອັດຕະປື

0
95



ແຂວງອັດຕະປື ກາຍເປັນແຂວງທີ 14 ທີ່ພົບພະຍາດອະຫິວາໝູອາຟຣິກາ ເຊິ່ງພົບເຊື້ອພະຍາດຢູ່ບ້ານແຄມຊັງ ເມືອງສາມັກຄີໄຊ ເຊິ່ງມີໝູຕິດເຊື້ອແລ້ວ 205 ໂຕ .
ອີງຕາມຄໍາສັ່ງຂອງເຈົ້າເມືອງໄຊເສດຖາ ເລກທີ 506/ຈມ.ຊຖ ລົງວັນທີ 11 ສິງຫາ 2019 ເຖິງຫ້ອງການອ້ອມຂ້າງເມືອງ, ນາຍບ້ານ 22 ບ້ານ ເມືອງໄຊເສດຖາ ກ່ຽວກັບການເຝົ້າລະວັງ ແລະ ສະກັດກັ້ນການລະບາດຂອງພະຍາດອະຫິວາໝູອາຟຣິກາ ໃຫ້ຮູ້ວ່າ: ພະຍາດດັ່ງກ່າວໄດ້ແຜ່ລະບາດເຂົ້າສູ່ອັດຕະປື ເປັນຄັ້ງທໍາອິດຢູ່ທີ່ບ້ານແຄມຊັງ ເມືອງສາມັກຄີໄຊ ເຊິ່ງພົບເຊື້ອໃນວັນທີ 9 ສິງຫາ 2019. ດັ່ງນັ້ນ, ເພື່ອເປັນການເຝົ້າລະວັງບໍ່ໃຫ້ພະຍາດດັ່ງກ່າວນີ້ລະບາດແຜ່ລາມເຂົ້າມາສູ່ເມືອງໄຊເສດຖາ ເນື່ອງຈາກວ່າເປັນເມືອງທີ່ມີຊາຍແດນຕິດຈອດກັບເຂດລະບາດທີ່ຈະສົ່ງຜົນກະທົບຕໍ່ການຜະລິດໝູ ແລະ ການດໍາລົງຊີວິດຂອງປະຊາຊົນ ກໍຄືການສ້າງຄວາມເສຍຫາຍຕໍ່ທາງດ້ານເສດຖະກິດ ແລະ ສະບຽງອາຫານ ມີຄວາມຈໍາເປັນຕ້ອງໄດ້ພ້ອມກັນເອົາໃຈໃສ່ ປະຕິບັດບັນດາມາດຕະການລຸ່ມນີ້: ໃຫ້ຫ້ອງການອ້ອມຂ້າງເມືອງ ສົມທົບກັບພະນັກງານກໍ່ສ້າງຮາກຖານການເມືອງລົງໂຄສະນາເຜີຍແຜ່ຜົນຮ້າຍ ແລະ ວິທີການໃນການສະກັດກັ້ນໃຫ້ບັນດາບ້ານ ໂດຍສະເພາະນັກທຸລະກິດ ແລະ ຊາວກະສິກອນຜູ້ລ້ຽງໝູ ໃຫ້ມີສ່ວນຮ່ວມຢ່າງເປັນເຈົ້າການ, ມອບໃຫ້ຫ້ອງການກະສິກໍາ ແລະ ປ່າໄມ້ເມືອງເອົາໃຈໃສ່ຈັດຕັ້ງປະຕິບັດບັນດາມາດຕະການລຸ່ມນີ້ ສົມທົບກັບບັນດາອົງການຈັດຕັ້ງທີ່ກ່ຽວຂ້ອງຂັ້ນເມືອງ ເພື່ອແຕ່ງຕັ້ງຄະນະສະເພາະກິດເຝົ້າລະວັງ ແລະ ສະກັດກັ້ນການລະບາດຂອງພະຍາດດັ່ງກ່າວ ດ້ວຍການຂຶ້ນແຜນວຽກ, ຄົນ ແລະ ງົບປະມານ ເພື່ອລົງເຄື່ອນໄຫວໂຄສະນາເຜີຍແຜ່, ກວດກາ, ຕິດຕາມເຝົ້າລະວັງ ແລະ ສະກັດກັ້ນການແຜ່ລະບາດ ໂດຍສະເພາະແມ່ນບ້ານທີ່ມີຊາຍແດນຕິດຈອດກັບເມືອງສາມັກຄີໄຊ ເສັ້ນທາງ ເຂົ້າ – ອອກເມືອງຕໍ່ເມືອງໃຫ້ເຂັ້ມງວດ.

ຕັ້ງດ່ານກວດກາສັດຕະວະແພດຊົ່ວຄາວເພື່ອສີດພົ່ນຢາຂ້າເຊື້ອ, ຕິດຕາມກວດກາການເຄື່ອນຍ້າຍສັດຈາກເຂດລະບາດເພື່ອບໍ່ໃຫ້ເຊື້ອພະຍາດລະບາດເຂົ້າສູ່ເມືອງຂອງຕົນ. ພ້ອມນັ້ນ, ກໍຕິດຕາມການເຄື່ອນຍ້າຍໝູ ແລະ ຜະລິດຕະພັນໝູ ທີ່ນໍາເຂົ້າມາເມືອງໄຊເສດຖາ ໂດຍສະເພາະແມ່ນໂຮງງານຂ້າສັດ, ຕະຫຼາດ ແລະ ຈຸດອື່ນໆ ຖ້າພົບກໍລະນີສົງໄສໃຫ້ປະຕິບັດຕາມໜ້າທີ່ວິຊາການ ແລະ ລາຍງານຕໍ່ພາກສ່ວນກ່ຽວຂ້ອງຢ່າງຮີບດ່ວນ, ຖ້າພົບກໍລະນີລະບາດໃຫ້ທໍາລາຍຖິ້ມ ພ້ອມສີດຢາຂ້າເຊື້ອ ແລະ ຕ້ອງປະຕິບັດໃຫ້ຖືກຕ້ອງຕາມຫຼັກວິຊາການ ແລະ ຕິດຕາມຢ່າງໃກ້ຊິດເພື່ອຮັບປະກັນໄດ້ການຈໍາກັດການລະບາດຂອງພະຍາດດັ່ງກ່າວ.

ພ້ອມດຽວກັນນັ້ນ, ກໍໃຫ້ປະສານສົມທົບກັບພະແນກກະສິກໍາ ແລະ ປ່າໄມ້ແຂວງ ກໍຄືຂະແໜງລ້ຽງສັດ ແລະ ການປະມົງ ເພື່ອວາງແຜນຈັດຕັ້ງປະຕິບັດມາດຕະການຕ່າງໆ. ໃຫ້ຜູ້ປະກອບການຊື້ – ຂາຍສັດ, ໂຮງງານຂ້າສັດ ແລະ ຊາວກະສິກອນຜູ້ລ້ຽງໝູ ຢຸດການນໍາເຂົ້າຊີ້ນໝູ ແລະ ຜະລິດຕະພັນໝູຊົ່ວຄາວ ຈາກເມືອງສາມັກຄີໄຊ, ຈາກຕ່າງແຂວງ, ຕ່າງປະເທດ ທີ່ມາຈາກເຂດປະກາດເປັນເຂດລະບາດ ຈົນກວ່າຈະມີການປະກາດຄືນວ່າເຂດດັ່ງກ່າວກັບຄືນສູ່ສະພາບປົກກະຕິແລ້ວ. ສ່ວນການຈໍາໜ່າຍຊື້ – ຂາຍ ແລະ ບໍລິໂພກຊີ້ນໝູພາຍໃນເມືອງໄຊເສດຖາ ແມ່ນຍັງສາມາດສືບຕໍ່ໄດ້ ແຕ່ຖ້າພົບກໍລະນີສົງໄສ ຫຼື ພົບເຊື້ອພະຍາດດັ່ງກ່າວໃຫ້ຢຸດການ ຊື້ – ຂາຍ ແລະ ບໍລິໂພກຊົ່ວຄາວ ໂດຍຮຽກຮ້ອງໃຫ້ທຸກພາກສ່ວນມີສ່ວນຮ່ວມໃນວຽກງານເຝົ້າລະວັງ ແລະ ສະກັດກັ້ນພະຍາດດັ່ງກ່າວຢ່າງຮີບດ່ວນ ເພື່ອໃຫ້ທັນກັບສະພາບການ.

ຂະແໜງລ້ຽງສັດ ແລະ ການປະມົງ ພະແນກກະສິກໍາ ແລະ ປ່າໄມ້ ແຂວງອັດຕະປື ໃຫ້ຮູ້ວ່າ: ໃນເບື້ອງຕົ້ນມີທັງໝົດ 150 ຄອບຄົວ ມີໝູທັງໝົດ 205 ໂຕ, ໝູຕາຍແລ້ວ 66 ໂຕ ແລະ ໝູເຈັບ 12 ໂຕ.

LEAVE A REPLY

Please enter your comment!
Please enter your name here