ສັງຫານໂຫດ! ໃຊ້ປືນ AK ຍິງ ໄອຍະການ ແຂວງຄໍາມ່ວນ ດັບຄາທີ່ໃນລົດສ່ວນໂຕ

0
52



ເວລາປະມານ 8:05 ໂມງຂອງວັນທີ 14 ສິງຫານີ້ ໄດ້ມີເຫດຄົນຮ້າຍບໍ່ຮູ້ຈໍານວນ ຂັບຂີ່ລົດຟໍຈູນເນີ ສີຂາວ ລັດສະກັດໃຊ້ອາວຸດປືນ AK ທ້າຍພົບ ຍິງກະໜໍ່າໃສ່ລົດຟໍຈູນເນີ ສີຂາວ ຈໍານວນຫຼາຍ 10 ນັດ ຢູ່ທີ່ສົ້ນຂົວຫ້ວຍບ້ານທ່າງາມ ເມືອງທ່າແຂກ ແຂວງຄໍາມ່ວນ ເຮັດໃຫ້ຜູ້ຂັບຂີ່ລົດຄັນດັ່ງກ່າວ ເສຍຊີວິດຄາທີ່ໃນລົດ ໃນສະພາບຖືກຍິງຕາມຕົນຕົວ ແລະ ບໍລິເວນຫົວຈໍານວນຫຼາຍລູກ.

ຫົວໜ້າພະແນກຕໍາຫຼວດ ສືບສວນ – ສອບສວນ ຫ້ອງຕໍາຫຼວດ ປກສ ແຂວງຄໍາມ່ວນ ໃຫ້ຮູ້ວ່າ:

ພາຍຫຼັງທີ່ເກີິດເຫດ ກໍໄດ້ຮັບລາຍງານວ່າ: ເວລາປະມານ 8:05 ໂມງ ຂອງວັນທີ 14 ສິງຫາ ມີເຫດການຍິງກັນ ຢູ່ສົ້ນຂົວບ້ານທ່າງາມ ເມືອງທ່າແຂກ.

ຈາກນັ້ນ, ຈຶ່ງແຕ່ງ ກໍາລັງຕໍາຫຼວດວິຊາສະເພາະ ສົມທົບກັບ ປກສ ເມືອງທ່າແຂກ ລົງກວດກາສະຖານທີ່ເກີດເຫດຕົວຈິງ ພົບເຫັນ ຜູ້ເສຍຊີວິດຄາລົດຟໍຈູນເນີ ສີຂາວ ບໍ່ຕິດປ້າຍທະບຽນ ຊື່ ທ້າວ ສຸກສະໄຫວ ຫຼື ຕຸ້ຍ ອາຍຸ 44 ປີ ເປັນພະນັກງານ, ໜ້າທີ່ຮັບຜິດຊອບແມ່ນ ຮອງຫົວໜ້າໄອຍະການ ປະຊາຊົນ ເຂດ I ແຂວງຄໍາມ່ວນ, ຢູ່ບ້ານຊຽງຫວາງ ເມືອງໜອງບົກ ແຂວງຄໍາມ່ວນ.

ສະນັ້ນ, ຈຶ່ງໄດ້ກວດກາຊັນນະສູດສົບ ພົບຮອຍບາດແຜ ລູກປືນຍິງເຂົ້າຈໍານວນ 40 ຈຸດ ເຊັ່ນ: ດ້ານໜ້າຈໍານວນ 22 ຈຸດ ແລະ ດ້ານຫຼັງ 18 ຈຸດ; ພ້ອມນັ້ນ, ຢູ່ທີ່ບໍລິເວນໃກ້ຄຽງຈຸດເກີດເຫດ ຍັງພົບກະສອບປືນອາກາ ( AK ) 55 ກະສອບ. ສ່ວນລົດຂອງຜູ້ເສຍຊີວິດ ມີຮູລູກປືນຈໍານວນ 43 ຈຸດ, ເຊິ່ງໃນນີ້ ປະຕູໜ້າເບື້້ອງຊ້າຍ ມີຈໍານວນ 21 ຮູ ແລະ ປະຕູຫຼັງເບື້້ອງຊ້າຍ ມີຈໍານວນ 22 ຮູ; ນອກນີ້, ຍັງພົບຫົວລູກປືນຢູ່ໃນລົດ 3 ຫົວ.

ເຈົ້າໜ້າທີ່ ໃຫ້ຮູ້ຕື່ມອີກວ່າ:

  • ຜ່ານການເກັບກໍາຂໍ້ມູນເບື້້ອງຕົ້ນ ພົບວ່າ: ໃນເວລາ 7:05 ໂມງ ຜູ້ເສຍຊີວິດ ໄດ້ຂັບຂີ່ລົດຟໍຈູນເນີ ສີຂາວ ບໍ່ຕິດປ້າຍທະບຽນ ອອກຈາກເຮືອນຜູ້ກ່ຽວ ເພື່ອຈະໄປການຕາມປົກກະຕິ ໂດຍຂັບຂີ່ລົດມຸ່ງໜ້າໄປ ເມືອງທ່າແຂກ
  • ພໍໄປທາງຮອດຂົວຫ້ວຍ ບ້ານທ່າງາມ ໄດ້ມີຄົນຮ້າຍ ບໍ່ທັນຮູ້ຈໍານວນ ຂັບຂີ່ລົດຟໍຈູນເນີ ສີຂາວ ບໍ່ຕິດປ້າຍທະບຽນ ມາຈອດລົດຢູ່ບໍລິເວນສົ້ນຂົວ ບ້ານທ່າງາມ ໂດຍອ່ວຍຫົວລົດໄປທາງ ເມືອງໜອງບົກ
  • ເມື່ອລົດຂອງຜູ້ເສຍຊີວິດມາຮອດຈຸດດັ່ງກ່າວ ຄົນຮ້າຍກໍໃຊ້ປືນອາກາ ( AK ) ຍິງໃສ່ລົດ ທ້າວ ສຸກສະໄຫວ ຈໍານວນຫຼາຍ 10 ນັດ ເຮັດໃຫ້ຜູ້ກ່ຽວເສຍຊີວິດຄາທີ່.

ສ່ວນຮູບປະພັນຂອງຄົນຮ້າຍ ເປັນຄົນຈ່ອຍສູງປະມານ 165 ຊັງຕີແມັດ, ນຸ່ງໂສ້ງຂາກາງສີເທົາ, ເສື້້ອແຂນສັ້ນສີເທົາ, ມີຜ້າປິດປາກສີເທົາ ແລະ ໃສ່ຊຸດວອມສີເທົາ.

ພາຍຫຼັງຍິງແລ້ວ ຄົນຮ້າຍໄດ້ຂີ່ລົດດັ່ງກ່າວຫຼົບໜີໄປຕາມທາງ ເລກທີ 11 B ມຸ້່ງໄປທາງ ເມືອງໜອງບົກ ແລ້ວລັດອອກໄປທາງ ເລກທີ 13 ໃຕ້ ໄປທາງແຂວງສະຫວັນນະເຂດ; ຫຼັງຈາກນັ້ນ, ເຈົ້າໜ້າທີ່ ຊຸດສືບສວນ – ສອບສວນ ປກສ ແຂວງຄໍາມ່ວນ ໄດ້ປະສານສົມທົບກັບ ປກສ ແຂວງສະຫວັນນະເຂດ ລົງຕິດຕາມລົດເປົ້າໝາຍ, ຈຶ່ງພົບເຫັນ ລົດຟໍຈູນເນີ ທີ່ຄາດວ່າ ເປັນລົດທີ່ຄົນຮ້າຍໃຊ້ກໍ່ເຫດ ຈອດປະໄວ້ຢູ່ເຂດບ້ານຜັກຂະຫຍາ ເມືອງອຸທຸມພອນ ແຂວງສະຫວັນນະເຂດ, ສ່ວນ ຄົນຮ້າຍ ໄດ້ຫຼົບໜີໄປກ່ອນ.

ທັ້ງນີ້, ເຈົ້າໜ້າທີ່ ປກສ ແຂວງຄໍາມ່ວນ ຍັງເປີດເຜີຍໃຫ້ຮູ້ອີກວ່າ:

ຜ່ານມາ, ຜູ້ເສຍຊີວິດ ເຄີຍຖືກຄົນຮ້າຍລອບຍິງມາແລ້ວ 2 ຄັ້ງ, ຄັ້ງທີ 1. ໃນວັນທີ 24 ມິຖຸນາ 2018 ຢູ່ເສັ້ນທາງເລກທີ 11 ເຂດບ້ານຊຽງຫວາງທ່າ ແລະ ຄັ້ງທີ 2. ໃນວັນທີ 14 ສິງຫາ 2018 ຢູ່ເສັ້ນທາງເລກທີ 11 ເຂດບ້ານສອງເໝືອງເໜືອ ໂດຍທັງສອງຄັ້ງ ແມ່ນຢູ່ເມືອງໜອງບົກ ແຂວງຄໍາມ່ວນ.


ທີ່ມາ ນສພ ຄວາມສະຫງົບ

LEAVE A REPLY

Please enter your comment!
Please enter your name here