ຊາວບ້ານວັງວຽງ ຍັງລໍຖ້າ ຄ່າຊົດເຊີຍ ຈາກທາງລົດໄຟ

0
92



ຊາວບ້ານ ພູດິນແດງ ເມືອງວັງວຽງ ແຂວງວຽງຈັນ ທີ່ເສຍດິນໄຮ່ ແລະ ດິນສວນ ເລີ້ມໄດ້ຮັບຄວາມເດືອດຮ້ອນ ຍ້ອນບໍ່ມີທີ່ດິນປູກຝັງ ພາຍຫລັງ ທີ່ຕອນດິນດັ່ງກ່າວຂອງຊາວບ້ານ ໄດ້ມອບໃຫ້ໂຄງການສ້າງທາງລົດໄຟ ລາວ-ຈີນ ໄປແລ້ວ, ໃນຂະນະດຽວກັນ, ຫຼາຍຄອບຄົວຍັງບໍ່ໄດ້ຮັບຄ່າຊົດເຊີຍ, ຊາວບ້ານໄດ້ກ່າວ ໃນວັນທີ 09 ສິງຫາ ວ່າ:

“ໂອ້… ຍັງຫຼາຍ ຍັງບໍ່ໄດ້ ຈັກຄົນນະ ຢູ່ບ້ານພູດິນແດງ ເຮົາເນາະ 30 ປາຍ ຫາ 40 ພຸ້ນລະ ຢາກໄດ້ ຄ່າຊົດເຊີຍ ຜູ້ຖືກຜົນກະທົບ ຫັ້ນແຫຼະ ຖືວ່າຍັງບໍ່ໄດ້ເຮັດຫຍັງ ສ່ວນຫຼາຍ ກາດິນສວນດິນໄຮ່ ນີ້ແຫຼະ.”

ຊາວບ້ານກ່າວຕື່ມວ່າ: ກ່ອນໜ້ານີ້ ພວກເຂົາມີດິນປູກຝັງ ພໍໄດ້ປູກໝາກໄມ້, ປູກຜັກ ສົ່ງຂາຍຕາມທ້ອງຕລາດ ພໍມີລາຍໄດ້ ແຕ່ປັດຈຸບັນ ພວກເຂົາໄດ້ມອບດິນໃຫ້ໂຄງການແລ້ວ ກໍຫວັງໄດ້ຮັບ ຄ່າຊົດເຊີຍ ຈາກທາງການ ເພື່ອເປັນທຶນຕໍ່ໄປ.

ອີງຕາມ ການລາຍງານ ຂອງທ່ານ ລັດຕະນະມະນີ ຄູນນີວົງ, ຮອງລັດຖະມົນຕຣີ ກະຊວງໂຍທາທິການ ແລະ ຂົນສົ່ງ ຫົວໜ້າ ຄະນະຄຸ້ມຄອງໂຄງການກໍ່ສ້າງ ທາງລົດໄຟ ລາວ-ຈີນ, ໄດ້ລາຍງານ ໃນກອງປະຊຸມຄະນະຊີ້ນໍາ ໂຄງການກໍ່ສ້າງ ທາງລົດໄຟ ລາວ-ຈີນ ຄັ້ງທີ 6 ເມື່ອເດືອນທີ່ຜ່ານມາວ່າ: ໂຄງການ ກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າ 72,8%.

ໃນນັ້ນ ຄ່າຊົດເຊີຍ, ລັດຖະມົນຕຣີ ກະຊວງໂຍທາທິການ ແລະ ຂົນສົ່ງ ໄດ້ອອກຂໍ້ຕົກລົງ ເມື່ອວັນ 10 ມິຖຸນາ 2019 ອະນຸມັດ ໂອນເງິນຄ່າຊົດເຊີຍ ໃຫ້ຜູ້ທີ່ໄດ້ຮັບຜົນກະທົບ ຈາກໂຄງການກໍ່ສ້າງທາງລົດໄຟ ລາວ-ຈີນ ຮວມມີ ແຂວງຫຼວງນໍ້າທາ, ອຸດົມໄຊ, ຫຼວງພຣະບາງ, ວຽງຈັນ ແລະ ນະຄອນຫຼວງວຽງຈັນ ຕົກເປັນງເງິນ 143 ຕື້ປາຍກີບ (ນຶ່ງຮ້ອຍສີ່ສິບສາມຕື້ປາຍກີບ) (143,335,120,742 ກີບ). ບ້ວງເງິນດັ່ງກ່າວນີ້ ລັດຖະບານ ໃຫ້ເບີກຈ່າຍ ໃນແຜນງົບປະມານ 2019 ແຕ່ບໍ່ໄດ້ລະບຸແຈ່ມແຈ້ງວ່າ ຈະຈ່າຍໃຫ້ ເມື່ອໃດ.

LEAVE A REPLY

Please enter your comment!
Please enter your name here