ອັນຕະລາຍ! ໄຊຍະບູລີ ມີຜູ້ເປັນໄຂ້ຍຸງລາຍ 484 ກໍລະນີ ເສຍຊີວິດ 1

0
119



ຕາມການໃຫ້ຂໍ້ມູນຈາກພະແນກສາທາລະນະສຸກແຂວງໄຊຍະບູລີໃນຕົ້ນເດືອນສິງຫານີ້ວ່າ: ປີນີ້ ການລະບາດໄຂ້ຍຸງລາຍ ໄດ້ເພີ້ມຄວາມຮຸນແຮງຂື້ນຢ່າງໄວວາ ແລະ ອາດຈະມີການລະບາດຄັ້ງໃຫຍ່ ມີຄວາມຮຸນແຮງຫຼາຍຂື້ນໃນທົ່ວປະເທດເວົ້າລວມ ເວົ້າສະເພາະກໍ່ຄື ແຂວງໄຊຍະບູລີ ແມ່ນພົບພະຍາດໄຂ້ຍຸງລາຍເປັນກໍລະນີທຳອິດ 1 ກໍລະນີ ຢູ່ບ້ານໂພນງາມ ເມືອງປາກລາຍໃນກາງເດືອນ ມີນາ 2019 ແຕ່ການລະບາດບໍ່ສາມາດສະກັດກັ້ນໄດ້ ແຕ່ເດືອນ ມີນາ 2019 ຫາເດືອນ ສິງຫານີ້

ທົ່ວແຂວງໄຊຍະບູລີມີການລະບາດໄຂ້ຍຸງລາຍກວມ 8 ເມືອງ ມີ 92 ບ້ານ 484 ກໍລະນີ ເສຍຊີວິດ 1 ກໍລະນີ, ໃນນີ້ ເມືອງໄຊຍະບູລີ ມີ 37 ບ້ານ 252 ກໍລະນີ ເສຍຊີວິດ 1 ກໍລະນີ , ເມືອງປາກລາຍມີ 8 ບ້ານມີ 23 ກໍລະນີ, ເມືອງພຽງ 26 ບ້ານ ມີ 123 ກໍລະນີ, ເມືອງບໍ່ແຕນ 6 ບ້ານ ມີ 50 ກໍລະນີ, ເມືອງຫົງສາ 7 ບ້ານ ມີ 9 ກໍລະນີ, ເມືອງແກ່ນທ້າວ 6 ບ້ານ ມີ 25 ກໍລະນີ, ເມືອງຊຽງຮ່ອນ ມີ 1 ບ້ານ ມີ 1 ກໍລະນີ ແລະ ເມືອງທົ່ງມີໄຊ 1 ບ້ານ ມີ1 ກໍລະນີ, ສ່ວນຫຼາຍແມ່ນນອນໃນກຸ່ມອາຍຸ 15-35 ປີ ກວມ 51,19% ,

ຮູບພາບປະກອບ

ກຸ່ມອາຍຸ 35 ປີ ຂື້ນໄປກວມ 35,28 %ແລະ ກຸ່ມ ອາຍຸ 15 ປີ ລົງມາກວມ 13,53 % ຕໍ່ກັບສະພາບດັ່ງກ່າວເພື່ອເປັນການຕອບໂຕ້ການລະບາດ ແລະ ສະກັດກັ້ນການລະບາດໄຂ້ຍຸງລາຍບໍ່ໃຫ້ແຜ່ກ້ວາງອອກ ອົງການປົກຄອງແຂວງກໍ່ຄືປະທານຄະນະກຳມະການກັນ ແລະ ຕ້ານ ຄວບຄຸມໄຂ້ຍຸງລາຍຂັ້ນແຂວງພ້ອມດ້ວຍທຸກຂະແໜງການ,

ໜ່ວຍງານຕະຫຼອດຮອດພໍ່ແມ່ປະຊາຊົນລົງໂຕ້ຕອບການລະບາດຢູ່ບ້ານທີ່ມີການລະບາດໄຂ້ຍຸງລາຍເຕົ້າໂຮມຊາວບ້ານເຮັດສຸຂະສຶກສາອະນາໄມຂ້ວມກະໂປະ, ກະປ໋ອງ, ອະນາໄມຖາງຫຍ້າທີ່ຮົກເຮື້ອເພື່ອທຳລາຍແຫຼ່ງເພາະພັນຂອງຍຸງລາຍໃນທຸກໆອາທິດ ສະນັ້ນເພື່ອບໍ່ຢາກໃຫ້ຍຸງກັດເຮົາຕ້ອງຫຼຸດຜ່ອນຄວາມແໜ້ນໜາຂອງຍຸງລາຍລົງດ້ວຍການປະຕິບັດ 5 ປ ໃຫ້ເປັນປົກກະຕິຄື:

ປິດພາສະນະທີ່ບັນຈຸນໍ້າໃນເຮືອນແລະ ນອກເຮືອນ, ປ່ຽນນ້ຳ ແລະ ພັດຖູພາຊະນະ, ປ່ອຍປາຫາງນົກຍຸງໃສ່ພາຊະນະທີ່ບັນຈຸນ້ຳເພື່ອໃຫ້ກິນໜອນນໍ້າຍຸງລາຍ, ປັບປຸງອະນາໄມບໍລິເວນທີ່ຢູ່ອາໄສທັງໃນ ແລະ ນອກເຮືອນໃຫ້ສະອາດ. ປະຕິບັດ 5 ປ ໃຫ້ເປັນນິໄສປະຕິບັດເປັນປະຈຳທຸກໆອາທິດສິ່ງສຳຄັນຕ້ອງກຽມຄວາມພ້ອມດ້ານ:

ຢາ, ອຸປະກອນການແພດ, ສະຖານທີ່ບໍລິການ, ບຸກຄະລາກອນດ້ານການແພດ, ພາກສ່ວນອໍານວຍຄວາມສະດວກ, ຈັກຜົ່ນຢາ, ນ້ຳຢາຂ້າໜອນນ້ຳ.

ໂຮງໝໍແຂວງຕ້ອງຊີ້ນໍາດ້ານວິຊາການໂຮງໝໍຂັ້ນລຸ່ມຂອງຕົນ ແລະ ກຽມພ້ອມຮັບມືໃຫ້ແກ່ການລະບາດ. ມີການປະສານງານກັບຂະແໜງປິ່ນປົວພະແນກ ສາທາລະນະສຸກແຂວງ ແລະ ຂະແໜງການທີ່ກ່ຽວຂ້ອງພ້ອມທັງກະກຽມພະນັກງານຂອງຕົນລົງຊ່ວຍໂຮງໝໍຊຸມຊົນ ແລະ ໂຮງໝໍນ້ອຍ.

ຂ່າວ: ບຸນທີ

LEAVE A REPLY

Please enter your comment!
Please enter your name here