ຕຳຫລວດໄທ ຈັບອະດີດທະຫານລາວ ຮັບຈ້າງຂົນຢາບ້າຂ້າມຝັ່ງໄທ 70 ພັນກ່ວາເມັດ

0
189


ສື່ໄທລາຍງານໃຫ້ຮູ້ວ່າ ເມື່ອເວລາ 11:30 ໂມງ ຂອງວັນທີ່ 5 ສິງຫາ 2019 ທີ່ຫນ່ວຍເຮືອໂພນພິໄສ ແຂວງຫນອງຄາຍ ນາວາຕີ ກາຣັນ ມິນວົງ ຫົວຫນ້າຫນ່ວຍເຮືອໂພນພິໄສ ພ້ອມເຈົ້າຫນ້າທີ່ທະຫານ ແລະຫນ່ວຍງານທີ່ກ່ຽວຂ້ອງ ໄດ້ຮ່ວມກັນຖະແຫຼງຂ່າວການຈັບກຸມ ທ້າວໂກ ຂັນທະວົງ ອາຍຸ 33 ປີ ປະຊາຊົນບ້ານດົງກະລືມ ເມືອງປາກງື່ມ ນະຄອນຫລວງວຽງຈັນ ສປປ ລາວ ພ້ອມຢາບ້າຈຳນວນ 76.000 ເມັດ ຢາໄອຊ 19.15 ກຼາມ ປືກສັ້ນຂະຫນາດ 357 ຈຳນວນ 1 ກະບອກ ລູກປືນ 357 ອີກຈຳນວນ 6 ນັດ

ການຈັບກຸມຄັ້ງນີ້ເມື່ອເວລາປະມານ 18.00 ໂມງ ວັນທີ່ 4 ສິງຫາ 2019 ນາວາຕີ ກາຣັນ ມິນວົງ ຫົວຫນ້າຫນ່ວຍເຮືອໂພນພິໄສ ໄດ້ຮັບແຈ້ງຈາກສາຍວ່າຈະມີການລັກລອບສົ່ງມອບຢາເສບຕິດບໍລິເວນແຄມຝັ່ງແມ່ນ້ຳຂອງ ຂ້າງຫ້ວຍລິງໂລດ ບ້ານປາກສວຍ ຄຸ້ມວັດຫລວງ ເມືອງໂພນພິໄສ ແຂວງຫນອງຄາຍ ຈື່ງໄດ້ລາຍງານຜູ້ບັງຄັບບັນຊາ ພ້ອມປະສານກັບຫນ່ວຍງານທີ່ກ່ຽວຂ້ອງເພື່ອຮ່ວມກັນວາງແຜນຈັບກຸມໂດຍໄດ້ຈັດກຳລັງໄປດັກຊຸ້ມບໍລິເວນໃກ້ຈຸດທີ່ໄດ້ຮັບແຈ້ງ

ຈົນກະທັ້ງເວລາປະມານ 04.30 ໂມງ ວັນທີ່ 5 ສິງຫາ 2019 ໄດ້ມີເຮືອຕ້ອງສົງໄສແລ່ນມາຈາກຝັ່ງປະເທດເພື່ອນບ້ານເຂົ້າມາໃກ້ກັບຈຸດທີ່ເຈົ້າຫນ້າທີ່ດັກຊຸ້ມຢູ່ ພົບມີຜູ້ຊາຍ 1ຄົນ ພາຍກະເປົາເປ້ຂະຫນາດໃຫ່ຍລົງມາຈາກເຮືອ ພໍຂື້ນຝັ່ງເຈົ້າຫນ້າທີ່ໄດ້ສະແດງໂຕຂໍກວດຄົ້ນ ຊື່ງຈາກການກວດຄົ້ນພາຍໃນກະເປົາເປ້ພົບຢາບ້າ ແລະຢາໄອຊຈຳນວນດັ່ງກ່າວຊຸກເຊື່ອງຢູ່ ແລະພົບອາວຸດປືນສັ້ນ ພ້ອມລູກປືນຢູ່ພາຍໃນກະເປົາພາຍນ້ອຍ ເຈົ້າຫນ້າທີ່ຈື່ງໄດ້ຄວບຄຸມໂຕມາທີ່ຫນ່ວຍເຮືອໂພນພິໄສເພື່ອທຳການສອບສວນໂດຍລະອຽດ

ຈາກການສອບຖາມເບື້ອງຕົ້ນ ທ້າວໂກ ໃຫ້ການວ່າຕົນເອງເຄີຍເປັນອະດີດທະຫານກອງທັບລາວ ຍົດຮ້ອຍຕີ ຫລັງຈາກມີຄອບຄົວເລີຍຕ້ອງອອກຈາກທະຫານ ກ່ອນຈະມາຮັບຈ້າງທົ່ວໄປ ເມື່ອຄືນທີ່ຜ່ານມາ 4 ສິງຫາ 2019 ຕົນໄດ້ຮັບການ ຈ້າງຈາກທ້າວສອນ ຊື່ງເປັນຄົນລາວໃຫ້ນຳຢາບ້າມາສົ່ງໃນຝັ່ງໄທ ໂດຍຫາກສົ່ງຢາບ້າສຳເລັດຈະໄດ້ຄ່າຈ້າງເປັນເງີນ 20.000 ບາດ (ຫລືປະມານ 5.800.000 ກີບ)

ສ່ວນຄົນທີ່ຈະມາຮັບຢາບ້ານັ້ນ ທ້າວສອນຈະເປັນຄົນປະສານງານທາງໂທລະສັບໃຫ້ມາຮັບຢາບ້າຈາກຕົນ ແຕ່ກໍ່ມາຖືກຈັບກຸມໄດ້ເສຍກ່ອນ
ຈາກນັ້ນເຈົ້າຫນ້າທີ່ຈື່ງແຈ້ງຂໍ້ຫາ ນຳຢາເສບຕິດໃຫ້ໂທດປະເພດ 1 (ຢາບ້າ,ຢາໄອຊ) ເຂົ້າມາໃນໄທໂດຍຜິດກົດຫມາຍ, ມີຢາເສບຕິດໃຫ້ໂທດປະເພດ 1 (ຢາບ້າ,ຢາໄອຊ) ໄວ້ໃນຄອບຄອງເພື່ອຈຳຫນ່າຍ ແລະພົກພາອາວຸດປືນ ແລະລູກປືນໄວ້ໃນຄອບຄອງໂດຍບໍ່ໄດ້ຮັບອະນຸຍາດ ເປັນຄົນຕ່າງດ້າວເຂົ້າມາໃນໄທໂດຍຜິດກົດຫມາຍ ກ່ອນຄວບຄຸມໂຕພ້ອມຂອງກາງສົ່ງພະນັກງານສອບສວນ ສນ ໂພນພິໄສ ດຳເນີີນຄະດີຕາມກົດຫມາຍຕໍ່ໄປ

ຂໍຂອບໃຈ ຂ່າວຫນ້າ1 ແລະ ຜູ້ຈັດການອອນໄລນ໌



LEAVE A REPLY

Please enter your comment!
Please enter your name here