ໃຫ້ລະວັງ! ພະຍາດອະຫິວາໝູອາຟຣິກາລະບາດເພີ່ມຂຶ້ນໃນ 10 ບ້ານຢູ່ແຂວງບໍລິຄຳໄຊ

0
184


ໃນວັນທີ 25 ກໍລະກົດ 2019 ທ່ານ ພອນສະຫວັນ ຫອມນະບຸນລັດ ຫົວໜ້າພະແນກກະສິກຳ ແລະ ປ່າໄມ້ ແຂວງບໍລິຄຳໄຊໄດ້ໃຫ້ສຳພາດຕໍ່ສື່ມວນຊົນທ້ອງຖິ່ນວ່າ ປັດຈຸບັນສາມາດກວດພົບເຊື້ອພະຍາດອະຫິວາໝູອາຟຣິກາລະບາດຂະຫຍາຍອອກຕື່ມອີກຢູ່ໃນ 10 ບ້ານຂອງ 3 ເມືອງຄື ເມືອງບໍລິຄັນ ວຽງທອງ ແລະ ເມືອງຄຳເກີດ ຊຶ່ງໄດ້ຂ້າທຳລາຍໝູທີ່ຕິດເຊື້ອແລ້ວ 1.000 ກ່ວາໂຕ ດ້ວຍວິທີການໃຊ້ໄຟເຜົາ ແລະ ຂຸດຂຸມຝັງດິນ ພ້ອມນີ້ ຍັງມີການສືບຕໍ່ກວດເຊື້ອພະຍາດດັ່ງກ່າວຖ້າພົບຢູ່ເຂດໃດຕ້ອງໄດ້ທຳລາຍໝູທັງໝົດ.

ພາຍຫຼັງທີມງານຄະນະສະເພາະກິດຕ້ານການແຜ່ລະບາດຂອງເຊື້ອພະຍາດອະຫິວາໝູອາຟຣິກາໄດ້ກວດພົບເຊື້ອພະຍາດດັ່ງກ່າວຢູ່ບ້ານປາກເຫືອງ ເມືອງບໍລິຄັນເມື່ອອາທິດທີ່ຜ່ານມາໂດຍສູນວິໄຈພະຍາດສັດ ກະຊວງກະສິກຳ ແລະ ປ່າໄມ້ ໄດ້ມີການຂ້າທຳລາຍແລ້ວກວ່າ 100 ໂຕ ຈາກນັ້ນ ທາງພະແນກກະສິກໍາ ແລະ ປ່າໄມ້ແຂວງກໍໄດ້ສືບຕໍ່ປະສານສົມທົບກັບພາກສ່ວນທີ່ກ່ຽວຂ້ອງເພື່ອຈັດຕັ້ງປະຕິບັດການຄວບຄຸມປ້ອງກັນການແຜ່ລະບາດ ໂດຍແຕ່ງຕັ້ງຄະນະວິຊາການລົງຕິດຕາມປະຈຳຢູ່ພາກສະໜາມ ແລະ ໜ່ວຍງານສະເພາະກິດຂັ້ນແຂວງ ເມືອງ ລົງສົມທົບກັບອຳນາດການປົກຄອງທ້ອງຖິ່ນເພື່ອຕິດຕາມເຝົ້າລະວັງຢູ່ແຕ່ລະຈຸດ ໂດຍສະເພາະເຂດທີ່ພົບເຊື້ອ ທັງເກັບກຳສະຖິຕິ ສົ່ງຂ່າວ ແລະ ໂຄສະນາເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຕໍ່ຄວາມຮ້າຍແຮງຂອງເຊື້ອພະຍາດດັ່ງກ່າວ ພ້ອມນີ້ ກໍໄດ້ຕັ້ງຈຸດກວດກາ 20 ກ່ວາຈຸດໃນທົ່ວແຂວງເພື່ອຄວບຄຸມບໍ່ໃຫ້ມີການເຄື່ອນຍ້າຍໝູເຂົ້າ-ອອກແຂວງໂດຍເດັດຂາດ.

ຜ່ານການຈັດຕັ້ງປະຕິບັດມາຮອດປັດຈຸບັນສາມາດກວດພົບເຊື້ອພະຍາດທີ່ໄດ້ແຜ່ລະບາດໄປໃນວົງກວ້າງເຖິງ 10 ບ້ານ ຢູ່ 3 ເມືອງດັ່ງກ່າວ ຈຶ່ງດໍາເນີນການຂ້າທຳລາຍຖິ້ມໂດຍດ່ວນ ພ້ອມທັງແນະນຳປະຊາຊົນໃຫ້ຮູ້ຈັກກ່ຽວກັບການແຜ່ລະບາດຂອງເຊື້ອພະຍາດອະຫິວາໝູອາຟຣິກາ ຊຶ່ງສາມາດຕິດຕໍ່ທາງເລືອດ ແລະ ທາງນ້ຳລາຍຂອງສັດ ທັງເປັນເຊື້ອພະຍາດທີ່ຮ້າຍແຮງ ບໍ່ມີຢາວັກຊີນປ້ອງກັນ ບໍ່ມີຢາປິ່ນປົວໂດຍກົງ ສັດທີ່ຕິດເຊື້ອພະຍາດດັ່ງກ່າວອາດຈະຕາຍເຖິງ 100% ແຕ່ມັນບໍ່ສາມາດຕິດໃສ່ຄົນໄດ້ ດັ່ງ ນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນຫ້າມບໍລິໂພກ ແລະ ເຄື່ອນຍ້າຍໝູອອກຈາກພື້ນທີ່ ແລະ ນຳເຂົ້າຈາກບ່ອນອື່ນເດັດຂາດ.

ໂດຍ: ສະຫະລັດ ວອນທິວົງໄຊ

ຂ່າວຈາກ ລາວໂພສຕ໌



LEAVE A REPLY

Please enter your comment!
Please enter your name here