ຫນ້າເປັນຫ່ວງ! ຕົ້ນກຳເນີດຂອງແມ່ນ້ຳຂອງກຳລັງຈະມີບັນຫາ

0
101



ຕົ້ນກຳເນີດຂອງແມ່ນ້ຳຂອງ ແລະ ແມ່ນ້ຳສາຍຫຼັກໃນອາຊີມາຈາກທານນ້ຳກ້ອນຂອງພູຫີມະໄລ ແລະ ທານນ້ຳກ້ອນຫີມະໄລ-ຮິນດູກູຊ ຊຶ່ງຖືກຂະໜານນາມວ່າເປັນຂວັ້ນໂລກທີ 3 ເພາະວ່າມີນ້ຳກ້ອນປະລິມານມະຫາສານກວມພື້ນທີ່ເຖິງ 100.000 ກີໂລຕາ ແມັດ ແລະ ເປັນແຫຼ່ງນ້ຳຈືດສຳຄັນຂອງໂລກບໍ່ວ່າຈະເປັນແມ່ນ້ຳແຢງຊີກຽງ ແມ່ນ້ຳເຫຼືອງ ແມ່ນ້ຳຄົງຄາ ແມ່ນ້ຳພຣົມມະບຸດ ແມ່ນ້ຳສິນທຸ ແມ່ນ້ຳສາລະວິນ ແລະ ແມ່ນ້ຳຂອງ ເຫຼົ່ານີ້ເປັນຕົ້ນ.

ແຕ່ວ່າໃນຊ່ວງ 50 ປີຜ່ານມາທານນ້ຳກ້ອນໃນຫີມະໄລໄດ້ລະລາຍໄວຂຶ້ນກວ່າປົກກະຕິ ແລະ ປະລິມານກໍຫຼຸດລົງຢ່າງໜ້າຕົກໃຈນັບແຕ່ຊ່ວງປີ 1993 ເປັນຕົ້ນມາສະຖິຕິທີ່ສະແດງການຫຼຸດລົງຂອງທານນ້ຳກ້ອນຢູ່ໃນລັກສະນະຫຼຸດລົງເລື້ອຍໆ ໂດຍສະເພາະທານນ້ຳ ກ້ອນຄັ້ງອູເຣີ່ໃນທິເບດຊຶ່ງເສຍພື້ນທີ່ໄປແລ້ວເຖິງ 34,2% ແລະ ເສຍປະລິມານນ້ຳກ້ອນເຖິງ 48,2% ຈາກການສຶກສາທີ່ຕີພິມໃນວາລະສານ Chinese Science Bulletin ເມື່ອເດືອນກໍລະກົດ 2010 ທີ່ລະບຸວ່າ “ຜົນການວິໄຈໄດ້ເປີດເຜີຍວ່າປະລິມານການສູນເສຍນ້ຳກ້ອນຂອງທານນ້ຳກ້ອນຫີມະໄລຮ້າຍແຮງກວ່າທີ່ຄາດການໄວ້” ທັງນີ້ ຜ່ານມາເກືອບ 10 ປີແລ້ວພາຍຫຼັງການສຶກສາຄັ້ງນີ້ພົບວ່າ ທານນ້ຳກ້ອນໃນທິເບດຍິ່ງພົບກັບສະຖານະການຮຸນແຮງຂຶ້ນເລື້ອຍໆ ຈາກພາບຖ່າຍດາວທຽມຫຼ້າສຸດຂອງປີນີ້ພົບວ່າ ທານນ້ຳກ້ອນຫີມະໄລລະລາຍໄວຂຶ້ນກວ່າປີ 2000 ເຖິງ 2 ເທົ່າ ແລະ ມີນ້ຳກ້ອນຫາຍໄປເຖິງປີລະ 8.000 ລ້ານໂຕນ ຄວາມສູງຂອງທານນ້ຳກ້ອນຫາຍໄປ 5 ແມັດຕໍ່ປີ.

ຂະນະທີ່ຕົ້ນກຳເນີດຂອງແມ່ນ້ຳຂອງຍັງບໍ່ໄດ້ສະຫຼຸບຢ່າງຊັດເຈນວ່າມີແຫຼ່ງກຳເນີດມາຈາກໄສແທ້ ແຕ່ຈາກາກນສຳຫຼວດໂດຍ Tokyo University of Agriculture ຂອງຍີ່ປຸ່ນກັບທີມສຳຫຼວດຂອງຈີນລະບຸວ່າ ຢູ່ທີ່ທານນ້ຳກ້ອນດ້ານທິດເໜືອຂອງພູກົວຊາງມູສາ ໃນທິເບດທີ່ມີຄວາມສູງ 5.224 ແມັດ ນ້ຳທີ່ລະລາຍຈາກທານນ້ຳກ້ອນໄຫຼລົງໄປເປັນທານນ້ຳທີ່ຊື່ວ່າ “ລາຊາກົງມາ” ຈາກນັ້ນກະແສນ້ຳກໍໄດ້ລວມຕົວເປັນແມ່ນ້ຳ “ຈາຢາຊູ” ແລ້ວກາຍເປັນແມ່ນ້ຳ “ຫຼາຍຊາງຈຽງ” ຫຼື ແມ່ນ້ຳລ້ານຊ້າງໃນແຄວ້ນອຳໂດ (ໃນ ສປ ຈີນ ເອີ້ນແມ່ນ້ຳນີ້ວ່າແມ່ນ້ຳຂອງລ້ານຊ້າງ).

ຂະນະທີ່ທານນ້ຳກ້ອນໃນທິເບດກຳລັງລະລາຍຢ່າງຜິດປົກກະຕິ ທານນ້ຳກ້ອນຂອງແມ່ນ້ຳຂອງກໍຕົກຢູ່ໃນສະຖານະການດຽວກັນ ບັນຫາໄລຍະສັ້ນທີ່ເກີດຂຶ້ນກໍຄືນ້ຳທີ່ໄຫຼລົງສູ່ທະເລຈະມີປະລິມານຫຼາຍເກີນໄປເຮັດໃຫ້ພື້ນທີ່ແຄມຝັ່ງຕ້ອງໄດ້ຮັບຜົນກະທົບ ແລະ ຈົມນ້ຳໄວຂຶ້ນ ດັ່ງນັ້ນ ປະເທດທຳອິດທີ່ຈະໄດ້ຮັບຜົນກະທົບກໍຄື ສສ ຫວຽດນາມ ຊຶ່ງເປັນສາມຫຼ່ຽມປາກແມ່ນ້ຳ.

ທັງນີ້ ທານນ້ຳກ້ອນຂອງແມ່ນ້ຳຂອງທີ່ລະລາຍໄວຜິດປົກກະຕິບໍ່ໄດ້ເຮັດໃຫ້ເກີດໄພແລ້ງໃນໄລຍະສັ້ນ ແຕ່ຈະເກີດບັນຫາຂາດແຄນນ້ຳໃນໄລຍະຍາວອີກດ້ວຍ ປະເທດຕໍ່ໄປທີ່ຈະກາຍເປັນເຫຍື່ອຂອງຫາຍະນະນ້ຳຂອງກໍຄື ສປປ ລາວ ໄທ ມຽນມາ ແລະ ສປ ຈີນ ຊຶ່ງຫຼ້າສຸດລັດຖະບານໃນປະເທດເຫຼົ່ານີ້ກໍພະຍາຍາມສ້າງເຂື່ອນເພື່ອຈຳກັດປະລິມານນ້ຳໃນພື້ນທີ່ຂອງຕົນເອງ ຂະນະທີ່ ທ່ານ ຟິລິບປັສ ເວສເຕີ ແຫ່ງສູນການພັດທະນາພູແບບບູລະນະນາໆຊາດຊຶ່ງເຮັດການສຶກສາການລະລາຍຂອງທານນ້ຳກ້ອນໃນຫີມະໄລເມື່ອຕົ້ນປີ 2019 ໄດ້ອະທິບາຍວ່າ “ມັນຄືວິກິດໂລກຮ້ອນທີ່ມະນຸດຍັງບໍ່ເຄີຍໄດ້ສຳຜັດ ແລະ ຮັບຮູ້ມາກ່ອນ”.

ຂ່າວຈາກ ລາວໂພສຕ໌

LEAVE A REPLY

Please enter your comment!
Please enter your name here