ແຂວງຈໍາປາສັກເກັບລາຍຮັບໄດ້ 700,9 ຕື້ກ່ວາກີບ

0
160


6 ເດືອນຕົ້ນປີ 2019 ແຂວງຈຳປາສັກຈັດເກັບລາຍຮັບໄດ້ທັງໝົດ 700,94 ຕື້ກີບ ທຽບໃສ່ແຜນການ 6 ເດືອນຕົ້ນປີປະຕິບັດໄດ້ 92,94% ຕົວເລກລາຍຮັບດັ່ງກ່າວເປີດເຜີຍຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານການເງິນ 6 ເດືອນຕົ້ນປີ ແລະ ວາງທິດທາງແຜນການທ້າຍ ປີ 2019 ຈັດຂຶ້ນໃນວັນທີ 18 ກໍລະກົດ 2019 ຢູ່ທີ່ສະໂມສອນວິທະຍາໄລການເງິນ ພາກໃຕ້ ໃຫ້ກຽດເຂົ້າຮ່ວມ ຂອງທ່ານ ບົວສອນ ວົງສອງຄອນ ຮອງເຈົ້າແຂວງຈໍາປາສັກ, ທ່ານ ສົມບູນ ເຮືອງວົງສາ ຫົວໜ້າພະແນກການເງິນແຂວງ, ມີບັນດາຮອງເຈົ້າເມືອງ, ຮອງເຈົ້ານະຄອນປາກເຊ, ພະນັກງານທີ່ເຮັດວຽກການເງິນຂອງພະແນກການອ້ອມຂ້າງແຂວງ ແລະ ຫ້ອງການ-ການເງິນເມືອງເຂົ້າຮ່ວມ.


ທ່ານ ສົມບູນ ເຮືອງວົງສາ ລາຍງານໃຫ້ຮູ້ວ່າ : ໃນ 6 ເດືອນຕົ້ນປີທົ່ວແຂວງສາມາດເກັບລາຍຮັບງົບປະມານໄດ້ທັງໝົດ 700,94 ຕື້ກີບ, ລາຍຮັບປົກກະຕິ 700,27 ຕື້ກີບ, ທຽບໃສ່ແຜນການປີເທົ່າກັບ 48,92%, ທຽບໃສ່ແຜນ 6 ເດືອນຕົ້ນປີເທົ່າກັບ 92,94%, ທຽບໃສ່ໄລຍະດຽວປີກ່ອນຫຼຸດລົງ 5,43%, ລາຍຮັບພູດສູນກາງປະຕິບັດໄດ້ 348,40 ຕື້ກີບ, ລາຍ ຮັບປົກກະຕິໄດ້ 347,75 ຕື້ກີບ, ທຽບໃສ່ແຜນການປີເທົ່າກັບ 51,50%, ທຽບໃສ່ແຜນ 6 ເດືອນຕົ້ນປີ ລື່ນແຜນ 3,15% ທຽບໃສ່ໄລຍະດຽວປີກ່ອນຫຼຸດລົງ 1,82% ໃນນັ້ນແມ່ນມີລາຍຮັບຈາກພາສີ, ສ່ວຍສາອາກອນ, ລາຍຮັບຈາກໄມ້, ນອກນີ້ກໍ່ມີລາຍຮັບພູດທ້ອງຖິ່ນ ປະຕິບັດໄດ້ 352,54 ຕື້ກີບ, ທຽບໃສ່ແຜນ ການປີເທົ່າກັບ 46,61%, ທຽບໃສ່ແຜນ 6 ເດືອນຕົ້ນປີເທົ່າກັບ 84,74%, ທຽບໃສ່ໄລຍະດຽວປີກ່ອນຫຼຸດລົງ 8,73% ແລະ ສໍາລັບແຜນລາຍຮັບງົບປະມານໝົດປີ 2019 ທົ່ວແຂວງ 1.431,56 ຕື້ກີບ, ໃນນັ້ນພູດສູນກາງ 675,20 ຕື້ກີບ, ພູດທ້ອງຖິ່ນ 756,36 ຕື້ກີບ. ການເບີກຈ່າຍເງິນເດືອນ ແລະ ເງິນນະໂຍບາຍໃຫ້ແກ່ພະນັກງານລັດຖະກອນໃນ 6 ເດືອນຕົ້ນປີແມ່ນສໍາເລັດໃນທົ່ວແຂວງ, ຫັນການເບີກຈ່າຍເງິນເດືອນໃຫ້ພະນັກງານ ຜ່ານທະນາຄານ (ATM) ໄດ້ປະມານ 70% ຂອງພະນັກງານໃນທົ່ວແຂວງ.


ທ່ານ ສົມບູນ ເຮືອງວົງສາ ໃຫ້ຮູ້ຕື່ມວ່າ: ການຈັດເກັບລາຍຮັບ 6 ເດືອນຕົ້ນປີບໍ່ສາມາດບັນລຸໄດ້ຕາມແຜນການຍ້ອນມີຫຼາຍປັດໄຈ ເຊັ່ນ: ດ້ານເສດຖະກິດມີການສະລໍຕົວ, ທຸລະກິດຂາອອກ-ຂາເຂົ້າເຄື່ອນ ໄຫວຈໍານວນໜ້ອຍ, ມີການນໍາເຂົ້າໜ້ອຍ ແລະ ການສົ່ງອອກກໍ່ປະສົບບັນຫາດ້ານລາຄາຕົກຕໍ່າ ຄື: ກາເຟ, ຢາງພາລາ ທີ່ເປັນສິນຄ້າຍຸດທະສາດຂອງແຂວງ, ການເຂົ້າມາທ່ຽວຂອງນັກທ່ອງທ່ຽວກໍ່ຫຼຸດລົງ.


ກອງປະຊຸມຄັ້ງນີ້ໄດ້ມີການປະກອບຄໍາເຫັນເພື່ອເຮັດໃຫ້ວຽກງານການເງິນ ກໍ່ຄືການຈັດເກັບລາຍ ຮັບເຂົ້າງົບປະມານໃຫ້ບັນລຸຕາມລະດັບຄາດໝາຍ.

ຂໍ້ມູນຈາກ: ໜັງສືພິມຈຳປາໃຫມ່



LEAVE A REPLY

Please enter your comment!
Please enter your name here