ລັດຊົດເຊີຍໃຫ້ 500 ກວ່າຄົວເຮືອນຈາກເຫດເຂື່ອນໄຟຟ້າແຕກທີ່ອັດຕະປື

0
213



ໃນວັນທີ 23 ກໍລະກົດ 2019 ທີ່ສູນພັກຊົ່ວຄາວຈຸດດົງບາກ ​ໄດ້​ມີ​ພິທີ​ມອບ​ເງິນ​ຊົດ​ເຊີຍ​ໃຫ້​ແຫ່ 500 ກວ່າຄອບຄົວ​ທີ່​ໄດ້​ຮັບ​ຜົນ​ກະທົບ​ຈາກ​ເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ເມືອງສະໜາມໄຊ ລວມມູນຄ່າຈໍ​ານວນ 26 ຕື້ກວ່າ​ກີບ​ໂດຍໃຫ້ກຽດມອບຂອງທ່ານ ເລັດ ໄຊຍະພອນ ເຈົ້າແຂວງອັດຕະປື ທັງເປັນຮອງຫົວໜ້າຄະນະສະເພາະກິດແກ້ໄຂໄພພິບັດລະດັບຊາດ ຕ່າງໜ້າຮັບໂດຍແມ່ນນາຍບ້ານທັງ 4 ບ້ານ ມີການນຳຂອງແຂວງ ເມືອງ ແລະ ພາກສ່ວນທີ່ກ່ຽວຂ້ອງຕະຫຼອດຮອດປະຊາຊົນຜູ້ປະສົບໄພເຂົ້າຮ່ວມ.

ຜູ້ໄດ້ຮັບຜົນກະທົບຢູ່ເມືອງສະໜາມໄຊຈໍານວນ 587 ຄົວເຮືອນ ໄດ້ຮັບເງິນຊົດເຊີຍ ດ້ານເສດຖະກິດຄົວເຮືອນ 50% ອັດຕະປື ຈ່າຍເງິນຊົດເຊີຍ 50% ໃຫ້ຜູ້ທີ່ໄດ້ຮັບຜົນກະທົບດ້ານເສດຖະກິດຄົວເຮືອນຈາກອຸບັດຕິເຫດເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ເມືອງສະໜາມໄຊ​ຊຶ່ງລວມມີ 4 ບ້ານເປົ້າໝາຍ ໃນນັ້ນ ບ້ານສະໝອງ 75 ຄົວເຮືອນ ມູນຄ່າ 4 ຕື້ກວ່າກີບ ບ້ານທ່າຫີນ 184 ຄົວເຮືອນ ມູນຄ່າ 8 ຕື້ກວ່າກີບ ບ້ານໂຄກກ່ອງ 225 ຄົວເຮືອນ ມູນຄ່າ 8 ຕື້ກວ່າກີບ ແລະ ບ້ານທ່າແສງຈັນ 103 ຄົວເຮືອນ ມູນຄ່າ 5 ຕື້ກວ່າກີບ ລວມມູນຄ່າທັງໝົດ 26 ຕື້ກວ່າກີບ ເງິນຊົດເຊີຍ 50% ທີ່ຈ່າຍໃຫ້ຜູ້ທີ່ຖືກຜົນກະທົບດ້ານເສດຖະ ກິດຄົວເຮືອນຄັ້ງນີ້ລວມມີດ້ານພາຫະນະ ເຄື່ອງໃຊ້ພາຍໃນຄົວເຮືອນ ສັດລ້ຽງ ສະບຽງອາຫານ ແລະ ເຄື່ອງໃຊ້ກະສິກຳ ສ່ວນດ້ານສິ່ງປຸກສ້າງ ຜົນລະປູກ ທາດບັນຈຸອັດທິຂອງບັນພະບູລຸດນັ້ນແມ່ນຍັງບໍ່ທັນໄດ້ຄິດໄລ່ມູນຄ່າການຊົດເຊີຍ ຊຶ່ງປັດຈຸບັນທາງບໍລິສັດພັດ ທະນາໂຄງການເຂື່ອນໄຟຟ້າເຊປຽນ-ເຊນ້ຳນ້ອຍພວມກຳລັງຄິດໄລ່ມູນຄ່າຄາມເສຍຫາຍຢູ່ ແລະ ຈະໄດ້ມີການຊົດເຊີຍໃນຄັ້ງຕໍ່ໄປ.

ໃນຕະຫລອດໄລຍະໜຶ່ງປີທີ່ຜ່ານມາເຫັນໄດ້ວ່າ ສູນກາງພັກ-ລັດຖະບານ ອົງການປົກຄອງທ້ອງຖິ່ນ ແລະ ບໍລິສັດຜູ້ພັດທະນາໂຄງ ການເຂື່ອນໄຟຟ້າເຊປຽນ-ເຊນ້ຳນ້ອຍ ຍັງໄດ້ໃຫ້ການຊ່ວຍເຫຼືອເບິ່ງແຍງດ້ານຊີວິດການເປັນຢູ່ຂອງປະຊາຊົນຜູ້ປະສົບໄພໃຫ້ມີຊີວິດການເປັນຢູ່ດີຂຶ້ນເທື່ອລະກ້າວຢ່າງຕໍ່ເນື່ອງຢູ່ ດັ່ງນັ້ນ ການມອບ-ຮັບໃນເທື່ອນີ້ກ່ໍຖືວ່າເປັນໂອກາດອັນສຳຄັນໜຶ່ງ ຊຶ່ງເປັນວັນຄົບ ຮອບ 1 ປີ ຂອງເຫດການເຂື່ອນແຕກ ເພື່ອມອບເປັນຂອງຂວັນໃນການປຸກລະດົມຈິດໃຈພໍ່ເເມ່ປະຊາຊົນໃຫ້ມີຄວາມເຂັ້ມແຂງ ໃຫ້ເປັນທຶນຮອນສືບຕໍ່ພັດທະນາເສດຖະກິດຄອບຄົວ ແລະ ສາມາດຜ່ານຜ່າວິກິດການຕ່າງໆນີ້ໂດຍໄວ ຄະນະດຽວກັນການນຳຂອງແຂວງຍັງໄດ້ລົງເຄື່ອນໄຫວມອບເຄື່ອງຊ່ວຍເຫຼືອດ້ານອຸປະໂພກ-ບໍລິໂພກຢູ່ແຕ່ລະສູນພັກຊົ່ວຄາວ ແລະ ບາງບ້ານທີ່ໄດ້ຮັບຜົນກະທົບນຳອີກ.

ໂດຍ: ສະຫະລັດ ວອນທິວົງໄຊ

ຂ່າວຈາກ ລາວໂພສຕ໌

LEAVE A REPLY

Please enter your comment!
Please enter your name here