28.9 C
Vientiane
ວັນຈັນ, ເດືອນພຶດສະພາ 10, 2021

ໂຄງການຮ່ວມໃຈສາຍໄຍໂລມາຄຳ ຊ່ວຍສ້າງອາຊີບໝັ້ນຄົງໃຫ້ປະຊາຊົນເມືອງນອງ 142 ຄອບຄົວ

Array

ຕາມຂ່າວສານ ຂປລ. ປະຊາຊົນ 142 ຄອບຄົວຢູ່ບ້ານບ້ານຕະຢົງ ແລະ ບ້ານປະແນະ ຈຸດສຸມຕັງອາໄລ-ລະແບງ ເມືອງນອງ ແຂງສະຫວັນນະເຂດ ໄດ້ມີອາຊີບໝັ້ນຄົງແລ້ວພາຍຫລັງໂຄງການຮ່ວມໃຈສາຍໄຍໂລມາຄຳ ຊຶ່ງເປັນໂຄງການຮ່ວມມືລະຫວ່າງ ທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າກ້ອນແລະ ນໍ້າດື່ມໂລມາຄຳ ແລະ ທ່ານ ສາຍສະໝອນ ກວານເມືອງຈັນ ຜູ້ອຳນວນການສະຖາບັນການເງິນຈຸລະພາກ ທີ່ຮັບເງິນຝາກສາຍໄຍສຳພັນ ເຂົ້າໄປຊ່ວຍເຫລືອເພື່ອລຶບລ້າງຄວາມທຸກຍາກຂອງປະຊາຊົນ ແລະ ສ້າງເງື່ອນໄຂໃຫ້ເມືອງນອງພົ້ນທຸກ.

ໃນກອງປະຊຸມສະຫລຸບການຈັດຕັ້ງປະຕິບັດ ໂຄງການຮ່ວມໃຈສາຍໄຍໂລມາຄຳ ຢູ່ບ້ານຕະຢົງ ແລະ ບ້ານປະແນະ ຈຸດສຸມຕັງອາໄລ-ລະແບງ ເມືອງນອງແຂວງສະຫວັນນະເຂດ ທີ່ຈັດຂຶ້ນໃນວັນທີ 26 ມີນາ 2021 ນີ້ ທ່ານ ເກຍ ອູ໊ສິດທິເດດ ໄດ້ຍົກໃຫ້ເຫັນວ່າ: 1 ປີຜ່ານມາ, ໂຄງການໄດ້ກຳນົດຮູບແບບການຈັດຕັ້ງປະຕິບັດໂດຍການ ຊຸກຍູ້ສົ່ງເສີມອາຊີບໝັ້ນຄົງໃຫ້ປະຊາຊົນ ແລະ ໃຊ້ງົບປະມານ 2,3 ຕື້ກວ່າກີບ ຊື້ເຄື່ອງມືການຜະລິດທີ່ຈຳເປັນໃຫ້ປະຊາຊົນທັງໃນ ແລະ ນອກເປົ້າໝາຍ 142 ຄອບຄົວຢູ່ 2 ບ້ານດັ່ງກ່າວ.

ຂະນະດຽວກັນກໍ່ໄດ້ເຈາະສ້າງບາດານ 10 ບໍ່ໃຫ້ 5 ບ້ານ ເຊັ່ນບ້ານຕະຢົງ 4 ບໍ່, ບ້ານປະແນະ 3 ບໍ່, ບ້ານລະແບງນ້ຳ, ບ້ານຕັງອາໄລກາງ ແລະ ບ້ານຕັງອາໄລເກົ່າ ບ້ານລະ 1 ບໍ່ ລວມທັງໄດ້ກໍ່ສ້າງຝາຍເບຕົງ ເກັບນ້ຳ 2 ແຫ່ງຢູ່ບ້ານຕະຢົງ 1 ແຫ່ງ ໂດຍສາມາດເກັບນໍ້າໄດ້ 10.000 ແມັດກ້ອນ ແລະ ບ້ານປະແນະ 1 ແຫ່ງເກັບນໍ້າໄດ້ 22.000 ແມັດກ້ອນ. ນອກນີ້ຍັງໄດ້ປູທາງຍ່າງເບຕົງ, ຈົກໜອງໃຫຍ່ 1 ໜອງຢູ່ບ້ານຕະຢົງ ເກັບນ້ຳໄດ້ 20.000 ແມັດກ້ອນ, ສະໜອງປຸ໋ຍ 150 ສອບໃຫ້ປະຊາຊົນ 136 ຄອບຄົວ ແລະ ສະໜອງດິນດໍາ 720 ແມັດກ້ອນໃຫ້ປະຊາຊົນໄດ້ໃສ່ຜົນລະປູກພ້ອມຍົກຄວາມຮູ້ການກ້າເບ້ຍໄມ້ທີ່ຖືກວິທີໃຫ້ແກ່ປະຊາຊົນ.

ພ້ອມນີ້ກໍ່ໄດ້ຊຸກຍູ້, ແນະນຳປະຊາຊົນ 2 ບ້ານປູກພືດປະສົມປະສານ ທັງໄລຍະສັ້ນ, ກາງ ແລະ ໄລຍະຍາວ ຢູ່ດິນສວນປູກເຂົ້າຕອນດຽວກັນໂດຍການປູກໝາກເຜັດ, ສາລີ, ໝາກນັດ, ກ້ວຍ, ແຂມ, ຫວາຍ ແລະ ອື່ນໆ, ຊຸກຍູ້ສົ່ງເສີມ, ແນະນຳປະຊາຊົນ 49 ຄອບຄົວຕ່ຳຫູກກີ່ແອວ, ສະໜອງເປັດ, ໄກ່ ແລະ ພໍ່ພັນແມ່ພັນໝູຈຳນວນໜຶ່ງ, ປັບປຸງເດີ່ນໂຮງຮຽນປະຖົມບ້ານຕະຢົງ ແລະ ຕິດຕັ້ງຈັກສູບນໍ້າໄຟຟ້າເພື່ອຫົດສວນຂອງໂຮງຮຽນທັງສອນນັກຮຽນຮູ້ວິທີປູກແລະ ລ້ຽງ.

ທ່ານ ເກຍ ອູ໊ສິດທິເດດ ຍັງກ່າວວ່າ: ພາຍຫລັງຈັດຕັ້ງປະຕິບັດໂຄງການ 1 ປີຜ່ານມາ ເຮັດໃຫ້ປະຊາຊົນດີໃຈຫລາຍ. ຈາກນີ້ຈຶ່ງເຊື່ອວ່າຈະເກີດໜໍ່ແໜງຄວາມສົມດຸນຂອງລະບົບນິເວດດີຂຶ້ນ ກໍ່ເກີດວົງຈອນຂອງຊີວະນາໆພັນຢູ່ທ້ອງຖິ່ນນີ້, ເກີດມີພືດຫລາຍໆຊະນິດ ກາຍເປັນແຫລ່ງອາຫານຂອງປະຊາຊົນ, ຖ້າເຫລືອກິນແລ້ວຈະກ້າວໄປເຖິງການແລກປ່ຽນຊື້-ຂາຍ ສ້າງລາຍຮັບເຂົ້າຄອບຄົວໄດ້ຫລາຍຂຶ້ນ.

ດ້ານໜຶ່ງເພື່ອເຮັດໃຫ້ປະຊາຊົນຖອຍອອກຈາກການຖາງປ່າເຮັດໄຮ່ປູກເຂົ້າຢ່າງດຽວທັງເລື່ອນລອຍທັງບໍ່ກຸ້ມກິນ ຫັນມາສູ່ການດຳລົງຊີວິດໂດຍ ການມີອາຊີບໝັ້ນທີ່ສາມາດກຸ້ມຢູ່ກຸ້ມກິນ ແລະ ຂາຍເປັນສິນຄ້າໃນຕໍ່ໜ້າ.

Latest news

- Advertisement -spot_img

Related news

- Advertisement -spot_img