ພົບເຊື້ອພະຍາດອະຫິວາໝູອາຟຣິກກາຢູ່ພາກເຫນືອເຮັດໃຫ້ຫມູຕາຍກວ່າ 300 ໂຕ

0
201


ໃນວັນທີ 11 ກໍລະກົດ 2019 ເປັນຕົ້ນມາ ວິຊາການສັດຕະວະແພດຫ້ອງການກະສິກໍາ ແລະ ປ່າໄມ້ເມືອງຂວາໄດ້ລົງກວດກາ ແລະ ເຝົ້າລະວັງການລະບາດຂອງພະຍາດສັດ(ໝູ) ພ້ອມທັງເກັບສິ້ນສ່ວນໝູທີ່ຕາຍ ສົ່ງໃຫ້ສູນວິໄຈພະຍາດສັດ (ສູນກາງ) ຫຼາສຸດ, ວັນທີ 14 ກໍລະກົດ 2019ໄດ້ຮັບການຢັ້ງຢືນຈາກສູນວິໄຈພະຍາດສັດວ່າ ພົບເຊື້ອພະຍາດອະຫິວາໝູອາຟຣິກກາ ຢູ່ 2 ບ້ານຄື: ບ້ານມອນສະຫວັນ ແລະ ບ້ານ ຫາດເຊີຍ ເມືອງຂວາ ແຂວງ ຜົ້ງສາລີ ,ເຊິ່ງຜ່ານການເກັບຂໍ້ມູນຂອງວິຊາການປະຈໍາສະໜາມ ໄດ້ລາຍງານວ່າ : ນັບແຕ່ວັນທີ 11 – 17 ກໍລະກົດ 2019 ທັງ 2 ບ້ານໄດ້ລ້ຽງໝູທັງໝົດ 1.051 ໂຕໃນຈໍານວນ 47 ຄອບຄົວ, ໃນນີ້ ມີໝູທີ່ຕິດເຊື້ອພະຍາດອະຫິວາໝູອາຟຣິກກາ ແລະ ຕາຍໄປແລ້ວຈໍານວນ 338 ໂຕ ໃນຈໍານວນ 35 ຄອບຄົວ.

ປັດຈຸບັນວິຊາການປະຈໍາສະໜາມໄດ້ເຝົ້າລະວັງການລະບາດ ພ້ອມທັງນໍາພາເຈົ້າຂອງສັດທໍາລາຍ, ຂ້າເຊື້ອ ຊາກສັດທີ່ຕາຍ ແລະ ກໍ່ຍັງມີທ່າທີສືບຕໍ່ລະບາດຢູ່. ດັ່ງນັ້ນ, ຫ້ອງການກະສິກໍາ ແລະ ປ່າໄມ້ ຈຶ່ງໄດ້ແຈ້ງມາຍັງປະຊາຊົນພາຍໃນເມືອງ ຂວາ ແລະ ເມືອງອ້ອມຂ້າງ ຫ້າມມີການຊື້-ຂາຍ, ເຄື່ອນຍ້າຍສັດ(ໝູ), ຫ້າມມີການຈໍານ່າຍຊີ້ນສັດ(ໝູ) ແລະ ບໍ່ຄວນບໍລິໂພກຊີ້ນໝູໃນຊ່ວງໄລຍະນີ້ ເພື່ອສະກັດກັ້ນການລະບາດຂອງພະຍາດດັ່ງກ່າວບໍ່ໃຫ້ເປັນວົງກວ້າງ

ທີ່ມາ ຫນັງສືພິມເສດຖະກິດການຄ້າ



LEAVE A REPLY

Please enter your comment!
Please enter your name here