ອັງກິດ ຊ່ວຍເຫລືອໃຫ້ເງິນເພື່ອແກ້ໄຂບັນຫາລະເບີດບໍ່ທັນແຕກໃນ ສປປ ລາວ

0
93



ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ລະ­ຫວ່າງ ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຕົກ​ຄ້າງ ຢູ່ ສປປ ລາວ (ຄຊກລ) ແລະ ອົງ­ການ​ຊ່ວຍ­ເຫຼືອ​ລ້າ​ຂອງ​ປະ­ຊາ­ຊົນ​ນ໋ອກ​ແວ ປະ­ຈຳ ລາວ “ໂຄງ­ການ​ກວດ​ກູ້​ເນື້ອ­ທີ່​ດິນ ພາຍ​ໃຕ້​ໂຄງ­ການ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ສາ­ກົນ II  (ຈີ​ແມັບ II) ລວມ​ມູນ​ຄ່າ 1.078.253 ໂດ​ລາ​ສະ­ຫະ­ລັດ ຫຼື ປະ­ມານ 9,4 ຕື້​ກີບ ສະ­ໜັບ­ສະ­ໜູນ​ທຶນ​ໂດຍ​ລັດ­ຖະ­ບານ​ອັງ­ກິດ ໄດ້​ຈັດ​ຂຶ້ນ​ວັນ​ທີ 17 ກໍ­ລະ­ກົດ 2019 ທີ່​ຫ້ອງ­ການ​ດັ່ງ­ກ່າວ ການ​ເຊັນ​ບົດ​ບັນ­ທຶກ​ໃນ​ຄັ້ງ​ນີ້​ມີ​ຂຶ້ນ​ລະ­ຫວ່າງ ທ່ານ ໂຈມ​ແຍງ ແພງ​ທອງ​ສະ​ຫວັດ ຫົວ­ໜ້າ​ຫ້ອງ­ການ​ຄະ­ນະ​ກຳ­ມະ­ການ​ຄຸ້ມ​ຄອງ​ແຫ່ງ​ຊາດ ເພື່ອ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ ແລະ ທ່ານ ໂອ​ເບຼ ຊັດ​ເທີ​ແລນ ຫົວ­ໜ້າ​ອົງ­ການ​ຊ່ວຍ­ເຫຼືອ​ລ້າ​ຂອງ​ປະ­ຊາ­ຊົນ​ນ໋ອກ​ແວ ປະ­ຈຳ ລາວ ມີ​ທ່ານ ລີ​ປາວ ຢ່າງ ຫົວ­ໜ້າ​ຫ້ອງ­ການ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ທ່ານ ເຈ​ຟ ແມັດ​ທິວ​ແມນ ອຸ­ປະ​ທູດ​ອັງ­ກິດ​ປະ­ຈຳ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

ໃນ​ການ­ຈັດ­ຕັ້ງ​ປະ­ຕິ­ບັດ​ການ​ກວດ​ກູ້​ລະ­ເບີດ​ບໍ່​ທັນ​ແຕກ​ອອກ​ຈາກ​ທີ່​ດິນ ພາຍ​ໃຕ້​ໂຄງ­ການ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ສາ­ກົນ II ຈັດ​ຕັ້ງ​ປະ­ຕິ­ບັດ​ໃນ 4 ແຂວງ ຄື: ແຂວງ​ຈຳ­ປາ​ສັກ ສາ­ລະ​ວັນ ເຊ​ກອງ ແລະ ອັດ​ຕະ​ປື ຈັດ​ຕັ້ງ​ປະ­ຕິ­ບັດ​ໂດຍ​ອົງ­ການ​ຊ່ວຍ­ເຫຼືອ​ລ້າ​ຂອງ​ປະ­ຊາ­ຊົນ​ນ໋ອກ​ແວ ປະ­ຈຳ​ລາວ ຫຼື ອົງ­ການ​ເອັນ​ພີ​ເອ ໄລ­ຍະ​ຈັດ​ຕັ້ງ​ປະ­ຕິ­ບັດ​ແມ່ນ​ແຕ່​ນີ້​ເຖິງ​ວັນ​ທີ 31 ມີ­ນາ 2020 ສຳ­ລັບ​ງົບ­ປະ­ມານ​ຊ່ວຍ­ເຫຼືອ​ໃນ​ຄັ້ງ​ນີ້​ເມື່ອ​ນຳ­ໄປ​ລວມ​ເຂົ້າ​ກັບ​ງົບ­ປະ­ມານ​ທີ່​ລັດ­ຖະ­ບານ​ອັງ­ກິດ​ໄດ້​ປະ­ກອບ­ສ່ວນ​ໃນ​ຂະ­ແໜງ­ການ​ແກ້​ໄຂ​ບັນ­ຫາ​ລະ­ເບີດ​ບໍ່​ທັນ​ແຕກ​ຕົກ​ຄ້າງ​ໃນ​ລາວ ນັບ​ແຕ່​ປີ 2019-2020 ລວມ​ມູນ​ຄ່າ​ຫຼາຍ​ກວ່າ 9.800.000 ໂດ​ລາ​ສະ­ຫະ­ລັດ ຫຼື ປະ­ມານ 85,4 ຕື້​ກີບ ງົບ­ປະ­ມານ​ທັງ​ໝົດ​ແມ່ນ​ນຳ­ໄປ​ໃຊ້​ສະ­ໜັບ­ສະ­ໜູນ​ໃຫ້​ແກ່​ວຽກ​ງານ​ກວດ​ກູ້​ລະ­ເບີດ​ບໍ່​ທັນ​ແຕກ  ແລະ ການ​ພັດ­ທະ­ນາ​ຄວາມ​ອາດ​ສາ­ມາດ​ຂອງ​ຫ້ອງ­ການ ຄຊກລ.

ບັນ­ຫາ​ການ​ຕົກ​ຄ້າງ​ຂອງ​ລະ­ເບີດ​ລູກ​ຫວ່ານ​ຢູ່​ໃນ ສປປ ລາວ ເປັນ​ປະ­ເທດ​ທີ່​ສູງ​ທີ່​ສຸດ ທຽບ­ໃສ່​ຈຳ­ນວນ​ປະ­ຊາ­ກອນ ບັນ­ຫາ​ຜົນ​ກະ­ທົບ​ຈາກ​ການ​ຕົກ​ຄ້າງ​ຂອງ​ລະ­ເບີດ​ລູກ​ຫວ່ານ​ແມ່ນ​ໄດ້​ກໍ່­ໃຫ້­ເກີດ​ມີ​ຄວາມ​ສ່ຽງ​ຕໍ່​ການ​ດຳ­ລົງ​ຊີ­ວິດ ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ຄຸນ​ນະ​ພາບ​ຊີ­ວິດ​ຂອງ​ປະ­ຊາ­ຊົນ ທີ່​ດຳ­ລົງ​ຊີ­ວິດ​ໃນ​ເຂດ​ຊຸມ​ຊົນ​ທີ່​ໄດ້​ຮັບ​ຜົນ​ກະ­ທົບ ການ​ກວດ​ກູ້​ລະ­ເບີດ​ລູກ​ຫວ່ານ​ແມ່ນ​ມີ​ຄວາມ​ສຳ­ຄັນ​ໃນ​ການ​ປັບ­ປຸງ​ຊີ­ວິດ ແລະ ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ອາ­ໄສ​ຢູ່ ສປປ ລາວ ເຊິ່ງ​ການ​ປະ­ຕິ­ບັດ​ກິດ­ຈະ­ກຳ​ຂອງ​ອົງ­ການ​ເອັນ​ພີ​ເອ ຈະ​ສ້າງ​ຜົນ​ປະ­ໂຫຍດ​ໃຫ້​ແກ່​ປະ­ຊາ­ຊົນ​ລາວ​ທີ່​ມີ​ຄວາມ​ສ່ຽງ​ທີ່​ອາ­ໄສ​ຢູ່​ໃນ​ພື້ນ​ທີ່ ທີ່​ມີ​ຜົນ​ກະ­ທົບ​ສູງ​ສຸດ ທັງ​ຈະ​ເປັນ​ການ​ຊ່ວຍ­ເຫຼືອ​ໃຫ້​ປະ­ຊາ­ຊົນ​ລາວ​ສາ­ມາດ​ນຳ​ໃຊ້​ດິນ​ຂອງ​ພວກ​ເຂົາ​ໂດຍ​ປັດ​ສະ​ຈາກ​ຄວາມ​ຢ້ານ​ກົວ​ຕໍ່​ການ​ບາດ­ເຈັບ ແລະ ລົ້ມ​ຕາຍ ອັນ​ເນື່ອງ​ມາ​ຈາກ​ລະ­ເບີດ​ລູກ​ຫວ່ານ ເຊິ່ງ​ກົມ​ພັດ­ທະ­ນາ​ສາ­ກົນ​ແຫ່ງ​ລາ­ຊະ​ອາ­ນາ­ຈັກ​ອັງ­ກິດ(ດີ​ຟິດ) ໄດ້​ສະ­ແດງ​ໃຫ້​ເຫັນ​ຢ່າງ​ຊັດ​ເຈນ​ຕໍ່​ຄຳ​ສັນ­ຍາ​ໃນ​ການ​ຊ່ວຍ­ເຫຼືອ​ແກ່ ສປປ ລາວ ເພື່ອ​ຫຼຸດ­ຜ່ອນ​ບັນ­ຫາ​ຜົນ​ກະ­ທົບ​ຈາກ​ລະ­ເບີດ​ລູກ​ຫວ່ານ​ທີ່​ຍັງ​ບໍ່​ທັນ​ແຕກ ແລະ ເພື່ອ​ປະ­ຕິ­ບັດ​ພັນ­ທະ​ຂອງ​ຕົນ​ພາຍ​ໃຕ້​ສົນ­ທິ­ສັນ­ຍາ​ວ່າ​ດ້ວຍ​ການ​ເກືອດ​ຫ້າມ​ລະ­ເບີດ​ລູກ​ຫວ່ານ ແລະ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ SDG 18 ຊີ­ວິດ​ທີ່​ປອດ​ໄພ​ຈາກ​ລະ­ເບີດ​ບໍ່​ທັນ​ແຕກ.

ຂໍຂອບໃຈ ພາບແລະເນື່ອຫາໂດຍ ຫນັງສືພິມວຽງຈັນໃຫມ່

LEAVE A REPLY

Please enter your comment!
Please enter your name here