ຕະຫຼາດຫຼັກຊັບລາວ ມອບ-ຮັບ ຕຳແຫນ່ງຜູ້ອຳນວຍການໃຫຍ່ຄົນໃໝ່

0
301


ພິທີມອບ-ຮັບໜ້າທີ່ຜູ້ອຳນວຍການໃຫຍ່ຕະຫຼາດຫຼັກຊັບລາວ (ຕລຊລ) ໄດ້ຈັດຂຶ້ນໃນວັນ​ທີ 18 ກໍລະກົດ 2019 ລະຫວ່າງ ທ່ານ ວັນຄໍາ ວໍຣະວົງ ຜູ້ອຳນວຍການໃຫຍ່ ຕລຊລ ຄົນເກົ່າ ແລະ ທ່ານ ອ໊ອດ ພົນຊຽງດີ ຜູ້ອຳນວຍການໃຫຍ່ ຕລຊລ ຄົນໃໝ່ ທັງ​ນີ້ ກໍ​ເພື່ອ​ໃຫ້​ສອດ​ຄ່ອງ​ກັບ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ໜ້າ​ທີ່​ວຽກ​ງານ ແລະ ສະ​ພາບ​ເງື່ອນ​ໄຂຈໍາເປັນ​​ໃນ​ຂົງ​ເຂດ​ຕະຫຼາດທຶນ ​ຊຶ່ງມີ​ຫຼາຍວຽກງານທີ່​ເລັ່ງທວງ​ໃຫ້ມີການປັບປຸງກົງຈັກການຈັດຕັ້ງ ແລະ​ ສັບຊ້ອນຈັດ​ວາງພະນັກງານ​ຢູ່ແຕ່​ລະ​ຕຳ​ແໜ່​ງງານເພື່ອຍົກສູງປະສິດທິພາບຂອງວຽກງານໃຫ້ສູງຂຶ້ນ ຍົກສູງໜ້າທີ່ ແລະ ຄວາມຮັບຜິດຊອບໃຫ້ແທດເໝາະກັບ​ປະສົບ​ການ ​ແລະ ຄວາມຊໍານານງານ ທັງໃຫ້ສອດຄ່ອງກັບມາດຕະຖານ-​ເງື່ອນ​ໄຂ​ຂອງ​ແຕ່ລະ​ເປົ້າ​ໝາຍ ສ່ວນ​ທ່ານຜູ້ອຳນວຍການໃຫຍ່ ຕລຊລ ຄົນ​ເກົ່າ​ ແມ່ນ​ໄປ​ຮັບ​ໜ້າ​ທີ່​ໃໝ່​ຢູ່ທະນາຄານ​ແຫ່ງ ສປປ ລາວ.

ຕະຫລາດຫລັກຊັບລາວ ຈາກເວັບ sanook.com

ໃນໂອກາດນີ້ ທ່ານ ສອນໄຊ ສິດພະໄຊ ຜູ້ວ່າການທະນາຄານ​ແຫ່ງ ສປປ ລາວ ກໍ​ໄດ້​ສະ​ແດງ​ຄວາມຍ້ອງຍໍຊົມ​ເຊີຍຕໍ່ການບໍລິຫານຕະຫຼາດຫຼັກຊັບລາວຂອງຜູ້ອຳນວຍການໃຫຍ່ຄົນເກົ່າໃນໄລຍະຜ່ານມາ ແລະ ໄດ້​ເນັ້ນ​ໜັກໃຫ້ຜູ້ອຳນວຍການໃຫຍ່ຄົນໃໝ່ເອົາໃຈໃສ່ຄຸ້ມຄອງຕະຫຼາດຫຼັກຊັບລາວໃຫ້ມີບາດກ້າວຫັນປ່ຽນທີ່ຕັ້ງໜ້າກວ່າເກົ່າ ໂດຍສະເພາະການປັບປຸງການເຄື່ອນໄຫວວຽກ​ງານໃຫ້ມີປະສິດທິຜົນ ມີບັນຍາກາດການຊື້-ຂາຍຄຶກຄັກ ແລະ ປະຕິບັດຫຼັກການຄຸ້ມຄອງບໍລິຫານທີ່ດີໃຫ້ສອດຄ່ອງກັບສາກົນ ພ້ອມນີ້ ກໍຕ້ອງ​ໄດ້ຄົ້ນຄວ້າກົນໄກ ແລະ ວິທີການໃນການຊຸກຍູ້ໃຫ້ບໍລິສັດທີ່ມີເງື່ອນຄົບຖ້ວນເຂົ້າລະດົມທຶນ ແລະ ຈົດທະບຽນໃນຕະຫຼາດຫຼັກກຊັບລາວໃຫ້ຫຼາຍຂຶ້ນເພື່ອເປັນຊ່ອງທາງໃນການລະດົມທຶນໃຫ້ແກ່ຫົວໜ່ວຍວິສາຫະກິດຂະຫຍາຍຖານທຸລະກິດ ໃຫ້ເປັນກໍາລັງແຮງຊຸກ ຍູ້ພື້ນຖານເສດຖະກິດແຫ່ງຊາດ ໃຫ້ມີການພັດທະນາ ແລະ ຂະຫຍາຍຕົວຢ່າງໝັ້ນທ່ຽງຕາມແຜນພັດທະນາເສດຖະກິດ-ສັງຄົມແຫ່ງຊາດ.

ການປັບປຸງການຈັດຕັ້ງຂັ້ນບໍລິຫານລະດັບຂອງ ຕລຊລ ໃນຄັ້ງນີ້ແມ່ນເປັນເທື່ອທີ 3 ນັບແຕ່ ຕລຊລ ໄດ້ຮັບການສ້າງຕັ້ງຂຶ້ນໃນວັນທີ 10 ຕຸລາ 2010 ແລະ ເລີ່ມມີການຊື້-ຂາຍຮຸ້ນໃນວັນທີ 11 ມັງກອນ 2011 ໂດຍແມ່ນ ທ່ານ ເດດພູວັງ ມູລຣັຕນ ເປັນປະທານ-ຜູ້ອຳນວຍການໃຫຍ່ຜູ້ທໍາອິດ ຈາກນັ້ນກໍແມ່ນ ທ່ານ ວັນຄໍາ ວໍຣະວົງ ເປັນຜູ້ອຳນວຍການໃຫຍ່ ຕລຊລ ນັບແຕ່ປີ 2015 ເປັນຕົ້ນ.

ຂ່າວຈາກ ລາວໂພສຕ໌



LEAVE A REPLY

Please enter your comment!
Please enter your name here